އައްޑޫ ސިޓީގެ އިގްތިސާދީ ލޭންޑްސްކޭޕް ބަދަލުކޮށްލުމަށް އެހީތެރިވުމަށް ހިންގާ ވިޔަފާރިތަކަށް ޓެކްސް ލުއިކޮށްދޭން ސަރުކާރުން ނިންމައިފިއެވެ.

އެކަން އިއުލާނު ކުރެއްވީ ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ކުރެއްވި ޓުވީޓެއްގައެވެ.

ހަމްދާން ވިދާޅުވީ، އައްޑޫގެ ތަރައްގީއަށް ހާއްސަ އިސްކަމެއް ދީގެން ގިނަ ކަންތައްތަކެއް ކުރަމުން އަންނަ ކަމަށާއި އައްޑޫގެ މުޅި އިގުތިސާދީ ލޭންޑްސްކޭޕް ބަދަލުކޮށްލުމަށް އެހީތެރިވެދިނުމުގެ ގޮތުން، އައްޑޫގައި ހިންގާ ވިޔަފާރިތަކަށް ޓެކްސް ކޮންސެޝަންތަކެއް ދިނުމަށް ކުރަން ޖެހޭ މަސައްކަތްތައް ސަރުކާރުން ކުރަމުން އަންނަ ކަމަށެވެ.

Advertisement

މީގެ އިތުރުން ހަމްދާން ވިދާޅުވީ، ޓޫރިޒަމް ކުރިއެރުވުމަށްޓަކައި، ކުރިން އަކަ މީޓަރަކަށް އަށް ޑޮލަރަށް ދެމުންއައި އައްޑޫ ބިމު ކުލި 2021 ވަނަ އަހަރުން ފެށިގެން ދެ ދެ ޑޮލަރަށް ކުޑަކޮށްފައިވާނެ ކަމަށެވެ. އަދި އެންމެ ބޮޑުވެގެން ދައްކަން ޖެހޭ ކުލި ދެ މިލިއަން ޑޮލަރުން، އަށް ލައްކަ ޑޮލަރަށް ކުޑަކޮށްދީފައި ވާނެ ކަމަށެވެ.

ޝަންގްރިއްލާގެ ހިއްސާ ސަރުކާރުން ދޫކޮށްލުމުގެ ކަންކަން ކުރިއަށް ދާކަމަށް ވެސް ހަމްދާން ވިދާޅުވިއެވެ.

ހަމްދާން ވިދާޅުވީ ހަންކެޑެގައި 143 މިލިއަން ޑޮލަރަށް އިންޓެގްރޭޓެޑް ރިސޯޓެއް ހެދުމުގެ އަމަލީ މަސައްކަތް ފަށަން ތައްޔާރުވަމުން އަންނަ ކަމަށެވެ.

ޖުމުލަ 14 ހޮޓަލާއި ވިލާތަކާއި އެޕާޓްމަންޓްތަކުން 2،082 އެނދު އުފެއްދޭނެ މި މަޝްރޫއު ޑިޒައިން ކޮށްފައި ވަނީ އިގުތިސާދީ ފުރުސަތުތައް އައްޑޫގެ މީހުންނަށް ލިބޭނެ ގޮތަށެވެ.

އެ މަޝްރޫއުގެ ތެރޭގައި، އައްޑޫގެ މީހުން ދިރިއުޅޭ ރަށްތަކުގައި 75 ކޮޓަރީގެ ހަތަރު ގެސްޓް ހައުސް ހެދުމަށް ހިމަނާފައިވެއެވެ.