20 އަހަރުންދަށުގެ ވޯލްޑްކަޕް ފުޓްބޯޅަ މުބާރާތުގެ ފައިނަލުގައި 1-0 ގެ ނަތީޖާއަކުން އިޓަލީ ބަލިކޮށް މުބާރާތުގެ ޗެމްޕިއަންކަން އުރުގުއާއީ ހޯދައިފިއެވެ.

ރޭގެ ފައިނަލް މެޗުގެ ފުރަތަަމަ ހާފުގައި އުރުގުއާއީ އިން ގިނަވަގުތު ބޯޅަ ހިފަހައްޓައިގެން މޮޅަށް ކުޅުނުއިރު، މި ހާފުގައި އެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމުން އުފެއްދި ގިނަ ހަމަލާތަކުގެ ހުރަހަކަށްވީ އިޓަލީގެ ކީއްޕަރު ސެބެސްޓިއާނޯ ޑެސްޕްލޭންޗޭސް އެވެ. އޭނާ ވަނީ ފުރަތަަމަ ހާފުގައި އުރުގުއާއީ އިން އިޓަލީގެ ގޯލާއި އަމާޒުކޮށް ފޮނުވާލި ނުރައްކާތެރި ދެ ހަމަލާއެއް ވަރަށް ހުޝިޔާރުކަމާއެކު ދިފާއުކޮށްފައެވެ.

މިމުބާރާތުގައި ވަރަށް ވަރުގަދަ އެޓޭކިންގް ކުޅުމެއް އިޓަލީގެ ފަރާތުން ފެނިގެން ގޮސްފައިވީ ނަމަވެސް، މި މެޗުގެ ފުރަތަަމަ ހާފުގައި އުރުގުއާއީގެ ގޯލާއި އަމާޒުކޮށް އެންމެ ހަމަލާއެއް އެޓީމަށް ފޮނުވާލެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ އުރުގުއާއީ އިންނެވެ. ނަމަވެސް މި މެޗުގައި އެޓީމަށް ލަނޑެއް ކާމިޔާބުކުރެވޭވަރުވީ މެޗު ނިމެން ހަތަރު މިނެޓަށްވީ ފަހުންނެވެ. މިލަނޑު އެޓީމަށް ކާމިޔާބުކޮށްދިނީ ލޫސިއާނޯ ރޮޑްރިގޭޒް އެވެ. މިއީ ފަހުހާފު 86 ވަނަ މިނެޓުގައި އިޓަލީގެ ގޯލު އޭރިޔާތެރެއިން ވަރަށް ހުސްކޮށް ލިބުނު ފުރުސަތެއްގައި ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން އުރުގުއާއީ ކުރީގައި އޮވެގެންނެވެ.

މުބާރާތުގެ އެންމެ މޮޅު ކުޅުންތެރިއާއަށް ދޭ އެޑިޑާސް ގޯލްޑަން ބޯލް އަދި މުބާރާތުގެ އެންމެ ގިނަ ލަނޑުޖެހި ކުޅުންތެރިއާއަށް ދޭ އެޑިޑާސް ގޯލްޑަން ބޫޓް ލިބުނީ މުބާރާތުގައި ކުޅުނު 07 މެޗުގައި 07 ލަނޑު ކާމިޔާބުކުރި އިޓަލީގެ ކެޕްޓަން ސެސަރޭ ކަސަޑޭ އަށެވެ.

މުބާރާތުގެ އެޑިޑާސް ސިލްވާ ބޯލް އުރުގުއާއީގެ އެލަން މަޓޫރޯ އަށް ލިބުނުއިރު، އެޑިޑާސް ބްރޯންޒް ބޯލް ލިބުނީ ސައުތު ކޮރެއާ ގެ ލީ ސެއުންގްވޮން އަށެވެ.

މީގެއިތުރުން މުބާރާތުގެ އެޑިޑާސް ސިލްވާ ބޫޓް ބްރެޒިލް ގެ މާކޯސް ލިއޮނާޑޯ ކާމިޔާބުކުރިއިރު، މި މުބާރާތުގައި ކުޅުނު 5 މެޗުގައި އޭނާ ވަނީ ފަސް ލަނޑު ކާމިޔާބުކޮށްފައެވެ. އަދިއެޑިޑާސް ބްރޯންޒް ބޫޓް ހޯދި ކޮލަމްބިއާގެ ފޯވާޑް އޮސްކާ ކޯޓްސް ވަނީ މުބާރާތުގައި ކުޅުނު ފަސް މެޗުގައި ހަތަރު ލަނޑު ކާމިޔާބުކޮށްފައެވެ.

މުބާރާތުގެ އެންމެ މޮޅު ގޯލްކީޕަރަށް ދޭ އެޑިޑާސް ގޯލްޑަން ގްލޯވް ލިބުނީ ފައިނަލް މެޗުގައި މޮޅު ކުޅުމެއް ދެއްކި އިޓަލީގެ ސެބެސްޓިއާނޯ ޑެސްޕްލާންޗެސް އަށެވެ. އަދި މުބާރާތުގެ ފެއާޕްލޭ ޓީމަކަށް ހޮވުނީ އެމެރިކާ އެވެ.