ރައްޔިތުންގެ މަޖިލީސް މިހާރު ކުރިއަށްދާ ގޮތާއިމެދު ހުރި ކަންބޮޑުވުންތައް ހިއްސާ ކުރައްވަން، ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީގެ ޕާލިމެންޓަރީ ގްރޫޕުން މަޖިލީހުގެ އަމީން އާންމު ފާތިމަތު ނިޔުޝާއާ އާއެކު މަޝްވަރާ ބައްދަލުވުމެއް ބާއްވައިފި އެވެ. 

ރައްޔިތުންގެ މަޖިލީހުގެ ނައިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅައި، ނޯޓިސްދެއްވި މުއްދަތު ހަމަވުމުންވެސް އެ މައްސަލަ އެޖެންޑާ ނުކުރައްވާތީ، އެމްޑީޕީގެ ޕީޖީ ލީޑަރު މުހައްމަދު އަސްލަމް ވަނީ މައްސަލަ މިއަދަށް އެޖެންޑާ ކުރެއްވުމަށް އެދި އަމީން އާންމަށް މިމަހު 11 ވަނަ ދުވަހު ސިޓީއެއް ފޮނުއްވާފައެވެ. 

އެ ސިޓީގައި އަސްލަމާ ވަނީ، ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ (ނ) ގައި ރައްޔިތުންގެ މަޖިލީހުގެ ރައީސް އަދި ނައިބު ރައީސްގެ އިތުބާރު ނެތްކަމުގެ ގަރާރެއް މަޖިލީހަށް ލިބުމުން އެގަރާރުގެ ލިޔުންލިބޭތާ މަދުވެގެން 3 ދުވަހުގެ ތެރޭގައ،ި އެގަރާރުގެ ނޯޓިސް އަމީން ޢާންމު މެމްބަރުންނަށާއި މަޖިލީހުގެ ރައީސަށް ނުވަތަ ނައިބު ރައީސަށް ދިނުމަށްފަހ،ު އެނޯޓިހުގެ ތާރީހުން ފެށިގެން 14 ދުވަހުގެ މުއްދަތު ދިނުމަށްފަހު އެއްމެ އަވަހަށް އަންނަ ރަސްމީ ބަންދުނޫން ދުވަހަކު ބާއްވާ ޖަލްސާއަށް އެގަރާރު ހުށައަޅަންވާނެ ކަމަށް ބަޔާންކޮށްފައިވާ ކަން ފާހަގަކުރައްވާފައެވެ. 

އެހެންކަމުން، 12 ޖޫން 2023 ވަނަ ދުވަހު ރައްޔިތުންގެ މަޖިލީހުގެ ނައިބުރައީސްގެ އިތުބާރު ނެތްކަމުގެ މައްސަލަ އެޖެންޑާކުރުން ގަވާއިދު ލާޒިމުކުރާކަމުގައި ވެސް އަސްލަމް ވިދާޅުވި އެވެ.

އެހެންނަމަވެސް، މިއަދުގެ ޖަލްސާގައި އެ މައްސަލަ އެޖެންޑާ ކޮށްފައި ނުވާތީ، މަޖިލިސް ފެށުމާއި އެކުއެކީހެން، އެމްޑީޕީ މެމްބަރުން ވަނީ އަޑުގަދަ ކުރަން ފަށާފައެވެ. އެއާއެކު 5 މިނެޓަށް ޖަލްސާ މެދުވެސް ވަނީ ކަނޑާލާފައެވެ. އެއަށްފަހުވެސް ޖަލްސާ ފެށުމުން، އެމްޑީޕީ މެންބަރުން ގޮވަމުން ދިޔައީ މަޖިލިސް ހިނގަމުންދަނީ ގަވާއިދާއި ޚިލާފަށް ކަމަށެވެ. އަދި އީވާގެ މައްސަލަ ކުރިއަށް ނުގެންގޮސް މަޖިލީހުގެ މަސައްކަތްތައް ކުރިއަށް ނުގެންދެވޭނެ ކަމަށްވެސް މެންބަރުން ދިޔައީ ގޮވަމުންނެވެ. އެހެންކަމުން މަޖިލީހުގެ ކޮންޓްރޯލް ގެއްލި މިއަދަށް މަޖިލިސް ވަނީ ނިންމާލާފައެވެ. 

މަޖިލިސް ނިންމާލުމާއިއެކު، އެމްޑީޕީގެ މެންބަރުން ވަނީ އަމީން އާންމާއި ބައްދަލުކުރައްވާފައެވެ. މި ބައްދަލުމުގައި ރައްޔިތުންގެ މަޖިލީހުގައި މިވަގުތު ގަވާއިދާއި ހިލާފަށް ހިގަމުންދާ ގިނަ ކަންތައްތަކެއް ހައްލު ކުރުމާމެދު މަޝްވަރާކުރެވުނު ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވަނީ ވިދާޅުވެފަ އެވެ. ނަމަވެސް އެކަމުގެ ތަފްސީލެއް ނުދެއްވައެވެ. 

ބެލެވޭ ގޮތުގައި އެ ބައްދަލުވުމުގެ ތަފްސީލު މިއަދު އޮންނަ އެމްޑީޕީ ޕީޖީގެ ނޫސްވެރިންގެ ބައްދަލުވުމުގައި ލިބިގެންދާނެއެވެ.