ގެންބިއާގެ ސަރުކާރާއި ރާއްޖޭގެ ސަރުކާރާއި ދެމެދު ވިސާ ލުއިކުރުމުގެ އެއްބަސްވުމެއްގައި ސޮއިކޮށްފިއެވެ.

ސައުދީ އަރަބިއްޔާގެ ވެރިރަށް ރިޔާޒުގައި ހުންނަ ދިވެހި އެމްބަސީގައި މިއަދު ބޭއްވި ރަސްމިއްޔާތުގައި، ދިވެހިރާއްޖޭގެ ފަރާތުން އެއްބަސްވުމުގައި ސޮއިކުރައްވާފައިވަނީ ސައުދީ އަށް ރާއްޖެއިން ކަނޑައަޅާފައި ހުންނަވާ ސަފީރު މުހައްމަދު ހަލީލެވެ. އަދި ގެމްބިއާގެ ފަރާތުން ސޮއިކުރައްވާފައިވަނީ އެ ގައުމުން ސައުދީ އަށް ކަނޑައަޅާފައި ހުންނަވާ ސަފީރު އުމަރު ޖިބްރީލް ސޮލާހެވެ.

މިކަމާއި ގުޅިގެން ފޮރިން މިނިސްޓްރީއިން ނެރުން ނޫސް ބަޔާނެއްގައި ބުނެފައިވަނީ މިއަދު މި ދެ ސަރުކާރުގެ މެދުގައި ސޮއި ކުރެވުނު 'މިއުޗުއަލް އެގްޒެމްޕްޝަން އޮފް ވިސާ ރިކުއަޔާމެންޓްސް' އެއްބަސްވުމަކީ ރާއްޖެ އަންނަ ގެމްބިއާ މީހުންނަށާއި ގެމްބިއާއަށް ދާ ދިވެހިންނަށް 30 ދުވަހުގެ މުއްދަތަކަށް ވިސާއާ ނުލައި ދަތުރު ކުރެވޭނެ މަގު ފަހި ކޮށްދޭނެ އެއްބަސްވުމެއް ކަމަށެވެ.

ފޮރިން މިނިސްޓްރީއިން އިތުރަށް ބުނެފައިވަނީ އެއްބަސްވުމުގައި ސޮއި ކުރެއްވުމަށްފަހު ދިވެހިރާއްޖޭގެ ސަފީރު ޚަލީލު ވަނީ ގެެމްބިއާއިން ދެ ގައުމުގެ ދެމެދުގައި އޮންނަ ރައްޓެހި ކަމުގެ ގުޅުމާއި އެއްބާރުލުން އިތުރަށް ބަދަހި ކުރުމަށް ކުރައްވާ މަސައްކަތަށް ޝުކުރުއަދާކޮށް، މި އެއްބަސްވުމުގެ ސަބަބުން ދެގައުމުގެ ރައްޔިތުންގެ މެދުގައި ގުޅުން ބަދަހި ކުރުމުގެ މަގުތައް އިތުރުވެގެންދާނެ ކަމަށް އުންމީދު ކުރައްވާ ކަމަށް ވިދާޅުވެފައި ކަމަށެވެ.

މިއާއިއެކު ގެމްބިއާގެ ސަފީރު ވަނީ ގެމްބިއާގެ ސަރުކާރާއި ރާއްޖެއާއި ދެމެދު އޮތް ގުޅުން އިތުރަށް ވަރުގަދަކުރުމަށް އެއްވައްތަރުގެ މަސްލަހަތުހުރި ދާއިރާތަކުން މަސައްކުރައްވާނެކަމަށް ވިދާޅުވެފައި ކަމަށް ފޮރިން މިނިސްޓްރީއިން ވަނީ ބުނެފައެވެ.

ރާއްޖެ އާއި ގެމްބިއާއާ ދެމެދު ހާރިޖީ ގުޅުން ގާއިމްކުރީ 1989 އަހަރު އެވެ.