އެފްރިކާގެ ކުލަބު ތަކުގެ މެދުގައި ކުޅެވޭ އެންމެ ޝަރަފްވެރި ފުޓްބޯޅަ މުބާރާތް އެފްރިކަން ޗެމްޕިއަންސް ލީގުގެ ޗެމްޕިއަންކަން އެންމެ ފަހުގެ ޗެމްޕިއަން މޮރޮކޯގެ ވައިދާދު އެތްލެޓިކް ބަލިކޮށް މިސްރުގެ އަލް އަހްލީ އިން ހޯދައިފި އެވެ.

އަލް އަހްލީ ޗެންޕިއަންކަން ހޯދީ މޮރޮކޯގެ ކަސަބުލަންކާ މުހައްމަދު ވީ ސްޓޭޑިއަމްގައި ރޭ ކުޅެވުނު ފައިނަލްގެ ދެވަނަ ލެގް 1-1 ގެ ނަތީޖާއަކުން އެއްވަރުވެ، 3-2 ގެ އެގްރިގޭޓު ނަތީޖާއަކުންނެވެ. މިދެޓީމު މިސްރުގައި ކުޅުނު ފުރަތަަމަ ލެގް އަލް އަހްލީ އިން ކާމިޔާބުކުރީ 2-1 ގެ ނަތީއްޖާއަކުންނެވެ.

ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅެވުނު ރޭގެ ފައިނަލް މެޗުގައި ފުރަތަަމަ ލަނޑުޖަހައި ކުރިހޯދީ ވައިދާދު އިންނެވެ. ފުރަތަަމަ ހާފުގެ 27 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ޔަހިއާ އައްތިޔާތުالله އެވެ. މިއީ އަލް އަހްލީގެ ޕެނަލްޓީ އޭރިއާ ބޭރުން އެޓީމަށް ލިބުނު ހިލޭ ޖެހުމެއްގައި ފޮނުވާލި ބާރު ހަމަލާ ގޯލްގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

ފުރަތަަމަ ހާފުގައި އަލް އަހްލީގެ ފަރާތުން އާދައިގެ ކުޅުމެއް ފެނިގެންދިޔައިރު، މިހާފުގައި ވައިދާދުގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ވައިދާދު ކުރީގައި އޮވެގެންނެވެ.

ދެވަނަ ހާފުގައި އަލް އަހްލީއިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ދެވަނަ ހާފުގެ 78 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު މުޙައްމަދު ޢަބްދުލްމޮނީމް އެވެ. މިއީ އެޓީމަށް ލިބުނު ކޯނަރަކުން ޑިފެންޑަރު ޢަލީ މާލޫލް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފުގެ ފަހުބައިގައި ދެޓީމުން ވެސް ލަނޑެއްޖެހޭތޯ ވަރަށް މަސައްކަތް ކުރި ނަމަވެސް، މެޗުގެ ކުޅުން ނިމިގެންދިޔައީ ދެޓީމުންކުރެ ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިއީ އެފްރިކާގެ ޗެންޕިއަންކަން އަލް އަހްލީ އިން ހޯދި 11 ވަނަ ފަހަރެވެ. މި ކާމިޔާބީއާ އެކު މިއަހަރުގެ ކުލަބް ވޯލްޑް ކަޕްގެ ޖާގައެއް އެޓީމަށް ވަނީ ކަށަވަރުވެފައެވެ. އަދި މިއީ ކުލަބް ވޯލްޑް ކަޕުގައި އެޓީމު ކުޅޭ 09 ވަނަ ފަހަރެވެ.