ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ އަރި ޒޯނުގެ ފައިނަލުގައި 2-0 ގެ ނަތީޖާއަކުން ވިލަމެންދޫ ބަލިކޮށް ކޮންރެޑް އިން މުބާރާތުގެ ޗެމްޕިއަންކަން ހޯދައިފި އެވެ.

ރިސޯޓް ލީގު ފުޓްސަލް މުބާރާތުގެ އަރި ޒޯނުގައި މިއަހަރު ޖުމްލަ 05 ޓީމު ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމެއް ފައިނަލަށް ހޮވޭގޮތަށެވެ. އަދި ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅެ އެމެޗުން މޮޅުވާ ޓީމަކަށް ފައިނަލްގެ ދެވަނަ ޖާގަ ލީބޭގޮތަށެވެ.

ކޮންރެޑް މުބާރާތުގެ ފައިނަލްގެ ޖާގައެއް ހޯދީ ލީގު ބުރުގެ އެއްވަނަ ޓީމުގެ ގޮތުގައެވެ. އަދި ވިލަމެންދޫ ފައިނަލުގެ ޖާގައެއް ހޯދީ ޕްލޭއޮފް މެޗުގައި ލިލީ ބީޗު ބަލިކުރުމަށްފަހުގައެވެ.

ދެޓީމުގެ ގިނަ އަދަދެއްގެ ސަޕޯޓަރުންގެ ކުރިމަތީގައި މިއަދު ހަވީރު ކުޅެވުނު ފައިނަލް މެޗުގެ ވަރަށް ކުރީކޮޅު ކޮންރެޑް އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ އާދަމް އާޒިމް އެވެ. މިއީ ވިލަމެންދޫ ޕެނަލްޓީ ބޭރުން އެޓީމުގެ ހުސެއިން ޝައްފާހު ފުންނާބުން ޖައްސާލި ބޯޅަ އެއް ފަހަރުން ޖަހައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ކޮންރެޑްގެ ލަނޑަށްފަހު އެޓީމުން ޑިފެންސަށް އިސްކަންދީގެން ކުޅެމުންދިޔައިރު، ވިލަމެންދޫ އިން ކުރިއަށްޖެހި ލަނޑެއްޖެހޭތޯ ވަރަށް މަސައްކަތް ކުރި އެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ކޮންރެޑް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ތިންވަނަ މިނެޓުގައި ކޮންރެޑުން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރިއެވެ. މިލަނޑު އެޓީމަށް ކާމިޔާބުކޮށްދިނީ ހުސެއިން ޝައްފާހުއެވެ. މިއީ އެޓީމުގެ ހާފުތެރެއިން ލިބުނު ބޯޅައާއެކު ކުރިއަށް ގޮސް ވިލަމެންދޫގެ ތިން ކުޅުންތެރިން ކައިރިން ނައްޓާލުމަށް ޕެނަލްޓީ އޭރިއާ ބޭރުން ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފުގައި ދެޓީމުން ވެސް ލަނޑު ޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން ކޮންރެޑް ކުރީގައި އޮވެގެންނެވެ.

މިއީ މިމުބާރާތުގެ ޗެމްޕިއަންކަން ކޮންރެޑް އިން ހޯދި ހަވަނަ ފަހަރެވެ. މިއަދުގެ ފައިނަލް މެޗަށްފަހު ކޮންރެޑް ކެޕްޓަން އަލީ އުމަރު (އަކާ) ވަނީ ރަސްމީކޮށް ފުޓްސަލް ކުޅުން ހުއްޓާލިކަން އިއުލާން ކޮށްފައެވެ. އަދި ކޮންރެޑް މޯލްޑިވްސް ގެ ފަރާތުން އެރަށުގެ ޖެނެރަލް މެނޭޖަރު ވަނީ ގޯލްޑް ކެޕްޓަން އަލީ އުމަރު (އަކާ) އަށް އޮފިޝަލް 07 ނަންބަރު ޖާޒީ އާއިއެކު ކެޕްޓަން ބޭންޑް ހަވާލުކޮށްފައެވެ. 

ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކޮންރެޑް މޯލްޑިވްސްގެ އަހުމަދު ޝާހީން އެވެ. މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ލިބުނީ ވިލަމެންދޫގެ އިހްސާން މަންސޫރު އަށެވެ. އިހްސާން ވަނީ މި މުބާރާތުގައި 09 ލަނޑު ކާމިޔާބުކޮށްފައެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އިހްސާން މަންސޫރު (ވިލަމެންދޫ), ހުސެއިން އީސާ (ކޮންރެޑް މޯލްޑިވްސް)، ހުސެއިން ޝައްފާހު (ކޮންރެޑް މޯލްޑިވްސް), އާދަމް އާޒިމް (ކޮންރެޑް މޯލްޑިވްސް), ހުސެއިން ޒާދީ (ކޮންރެޑް މޯލްޑިވްސް) އެވެ.

މުބާރާތުގެ އެންމެ މޮޅު ކޯޗަކަށް ހޮވުނީ ކޮންރެޑް މޯލްޑިވްސްގެ ކޯޗު ހުސެއިން ޝަފީގު އެވެ. އަދި މުބާރާތުގެ އެންމެ މޮޅު ކުޅުންތެރިއާގެ މަގާމު ލިބުނީ ވިލަމެންދޫގެ ކެޕްޓަން އަލީ މާޖިދު އަށެވެ.