ޔުއެފާ ޗެމްޕިއަންސްލީގު ފައިނަލް މެޗާއެކު ޔޫރަޕުގެ ފުޓްބޯޅަ ސީޒަން މިވަނީ ނިމުމަކަށް އައިސްފައެވެ. އާއެކު މިހާރު އެންމެ ގަދަޔަށް މި ދުވަސްކޮޅު ކުރެވޭ ބަހުސް އަކީ މިއަހަރުގެ ބެލެންޑޯ އެވޯޑް ލިބޭނީ ކޮން ކުޅުންތެރިއަކަށް ތޯ އެވެ.

ތުރުކީގެ އިސްތަންބޫލްގައި އިޓަލީގެ އިންޓަމިލާން ބަލިކޮށް މެންޗެސްޓާ ސިޓީން އެކުލަބުގެ ތާރީޚްގައި ފުރަތަމަ ފަހަރަށް ޔުއެފާ ޗެމްޕިއަންސްލީގުގެ ތަށި ހޯދުމާއެކު، އެޓީމުގެ އެޓޭކުތަކުގައި މިސީޒަނުގައި އެންމެ އިސް ދައުރެއް އަދާކޮށްފައިވާ ނޯވޭގެ ފޯވާޑް އެރްލިންގް ހާލަންޑް އަށް މި އަހަރުގެ ބެލެންޑޯ އެވޯޑް ލިބުމުގެ ފުރުސަތު ވަނީ ވަރަށް ބޮޑަށް ފަހިވެގެން ގޮސްފައެވެ.

ޖަރުމަނު ބޮރޫޝިއާ ޑޯޓްމަންޑް ދޫކޮށް އިގިރޭސި ޗެންޕިއަން މެންޗެސްޓާ ސިޓީއާއި މިދިޔައަހަރު ގުޅުނު ހާލަންޑް ވަނީ 2022/23 ވަނަ ސީޒަނުގައި ސިޓީއަށް ކުޅެދިން 53 މެޗުގައި 09 އެސިސްޓުގެ އިތުރުން 52 ލަނޑު އެކުލަބަށް ކާމިޔާބުކޮށްދީފައެވެ. މީގެ އިތުރުން ސިޓީއާއެކު އެފްއޭ ކަޕާއި ޕްރިމިއާ ލީގުގެ އިތުރުން މިއަހަރު ޗެންޕިއަންސް ލީގު ކާމިޔާބުކުރިއިރު ހާލަންޑް އަކީ މިސީޒަނުގެ ޕްރެމިއާ ލީގުގެ އިތުރުން ޔުއެފާ ޗެމްޕިއަންސްލީގުގެ ވެސް އެންމެ ގިނަ ލަނޑުޖެހި ކުޅުންތެރިއާއެވެ.

މީގެއިތުރުން ވެސް މިސީޒަނުގައި ހާލަންޑް ވަނީ ގިނަ ރެކޯޑުތަކެއް ހަދާފައެވެ. އޭގެ ތެރޭގައި ޕްރެމިއާ ލީގުގެ ތާރީހުގައި އެއް ސީޒަނެއްގައި އެންމެ ގިނަ ލަނޑުޖެހުމުގެ ރެކޯޑް ވަކިން ޚާއްޞަކޮށް ފާހަގަކޮށްލެވެއެވެ.

މިފަހަރުގެ ބެލެންޑޯ އެވޯޑަށް ހާލަންޑް އާއި އެންމެ ބޮޑަށް ވާދަކުރާނެކަމަށް ބެލެވެނީ މިހާރުވެސް ރެކޯޑް އަދަދަކަށް މި އެވޯޑް ހޯދާފައިވާ އާޖެންޓީނާގެ ކެޕްޓަން ލަޔޮނަލް މެސީ އެވެ. މި ސީޒަން ނިމުމާއެކު ފްރާންސްގެ ޗެމްޕިއަން ޕީއެސްޖީ ދޫކޮށް އެމެރިކާގެ އިންޓަ މިއާމީއަށް ބަދަލުވުމަށް ނިންމާފައިވާ، މެސީ ވަނީ ނިމިދިޔަ ސީޒަނުގައި ޕީއެސްޖީއަށް ކުޅެދިން 40 މެޗުގައި 20 އެސިސްޓުގެ އިތުރުން 20 ލަނޑު އެޓީމަށް ކާމިޔާބުކޮށްދީގައެވެ.

މީގެއިތުރުން ޕީއެސްޖީ އާއެކު ފްރާންސް ލީގު ކާމިޔާބުކުރުމުގެ އިތުރުން 2022 ވަނަ އަހަރުގެ ފަހުކޮޅު ގަތަރުގައި ބޭއްވުނު ފީފާ ވޯލްޑް ކަޕް ފުޓްބޯޅަ މުބާރާތުގެ ޗެމްޕިއަންކަން އާޖެންޓީނާ އަށް ހޯދައިދިނުމުގައި އެންމެ މުހިންމު ދައުރެއް އަދާކޮށްދިން ކުޅުންތެރިއަކީ ވެސް މެސީ އެވެ.

ވޯލްޑް ކަޕްގެ މޮޅު ކުޅުންތެރިއާގެ މަގާމުގެ އިތުރުން ފައިނަލް މެޗުގައި ފްރާންސް ކޮޅަށް ޖެހި ދެ ލަނޑާއެކު ފުޓްބޯޅައިގެ ތަޖުރިބާކާރުންގެ މެދުގައި މިއަހަރުގެ ބެލެންޑޯ އެވޯޑް ހޯދުމުގެ ފުރުސަތު އެންމެ ބޮޑީ ކޮންމެ ކުޅުންތެރިއެއް ކަމާއި މެދު ވަނީ ހޫނު ގަދަ ބަހުސެއް ފެށިފައެވެ.

މެސީއަށް ތާއިދުކުރާ ފަރާތްތަކުން ގަބޫލުކުރާ ގޮތުގައި ވޯލްޑްކަޕް އޮންނަ އަހަރުގައި ބެލެންޑޯ އެވޯޑް ލިބެންޖެހޭނީ ވޯލްޑްކަޕްގައި އެންމެ ރަގަޅު ކުޅުމެއް ދައްކާ ކުޅުންތެރިއަކަށެވެ. އަދި މީގެ އިތުރުން މިއަހަރުގެ ޗެންޕިްއަންސް ލީގުގެ ސެމީ ފައިނަލާއި ފައިނަލުގައި ހާލަންޑް ގެ ފަރާތުން އެންމެ އެދެވޭ ކުޅުމެއް ނުފެންނަ ކަމަށާއި އެފްއޭ ކަޕް ފައިނަލުގައި ވެސް ހާލަންޑްގެ ފަރާތުން ފެނިގެންދިޔައީ ވަރަށް އާދައިގެ ކުޅުމެއްކަމަށް އެފަރާތްތަކުން ބުނެއެެވެ.

ހާލަންޑަށް ތާއިދުކުރާ ފަރާތްތަކުން ގަބޫލުކުރާ ގޮތުގައި ވޯލްޑްކަޕް ފުޓްބޯޅަ މުބާރާތުގައި މޮޅު ކުޅުމެއް ދެއްކުމަކީ މުޅި އަހަރުގެ އެންމެ މޮޅު ކުޅުންތެރިއާ ހޮވުމުގައި ހަމައެކަނި ޝަރުތެއް ނޫނެވެ.

ފާއިތުވެދިޔަ 23 އަހަރުގެ ތެރޭގައި ވޯލްޑްކަޕް ޗެމްޕިއަންކަން ހޯދި ޓީމަށް ނިސްބަތްވާ ކުޅުންތެރިއެއް ބެލެންޑޯ އެވޯޑް ހޯދާފައިވަނީ އެންމެ ދެ ފަހަރުއެވެ. އެއީ 2002 ވަނަ އަހަރު ވޯލްޑްކަޕްގެ ޗެމްޕިއަންކަން ހޯދި ބްރެޒިލްގެ ފޯވާޑް ރޮނާލްޑޯ އާއި 2006 ވަނަ އަހަރުގެ ވޯލްޑްކަޕް ޗެމްޕިއަންކަން ހޯދި އިޓަލީގެ ކެޕްޓަން ފަބިއޯ ކަނަވާރޯ އެވެ.

މިއަހަރުގެ އޮކްޓޯބަރު މަހުގެ 30 ވަނަ ދުވަހު ފުރާންސްގެ ވެރިރަށް ޕެރިހުގައި މި އަހަރުގެ ބެލެންޑޯ އެވޯޑް ހަފްލާ ބޭއްވުމަށް ހަމަޖެހިފައިވާ މެސީ އާއި ހާލަންޑްގެ އިތުރުން މިއަހަރުގެ އެވޯޑަށް ވާދަކުރާ ކުޅުންތެރިންގެ ލިސްޓުގެ ތިންވަނަ އަދި ހަތަރުވަނާގައި އުޅެނީ ޕީއެސްޖީގެ ކެޕްޓަން ކިލިއަން އެމްބާޕޭ އާއި ރެއާލް މެޑްރިޑުގެ ބްރެޒިލް ފޯވާޑް ވިނީޝިއަސް ޖޫނިއަރ އެވެ.

މިއަހަރުގެ ބެލެންޑޯ ރޭންކިންގައި މިހާރުވެސް ކުރީގައި އުޅެނީ މެސީ އެވެ. މިއާއެކު އުފެދޭ ސުވާލަކީ މެސީ ފަހަތަށް ޖައްސާލުމަށްފަހު ހާލަންޑަށް މި އެވޯޑް ކާމިޔާބު ކުރެވިދާނެތޯއެވެ.