ޕީއެސްޖީ ޓީމުގެ ކެޕްޓަން ކީލިއަން އެމްބާޕޭ މިހާރު އެ ކުލަބާއެކު ހަދާފައިވާ އެއްބަސްވުމުގެ މުއްދަތު ހަމަވުމުން، ދެން އެއްބަސްވުން އައުނުކުރާނެ ކަމަށް އޭނާ އެ ކުލަބަށް އަންގާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ޕީއެސްޖީއާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. އަދި އެ އެއްބަސްވުމުގައި ވާ ގޮތުން ދެފަރާތް އެއްބަސްވާ ނަމަ އެ މުއްދަތު އިތުރު އެއް އަހަރަށް އިތުރުކުރުމުގެ ފުރުސަތު އެބައޮތެވެ.

ނަމަވެސް މިހާރު އެމްބާޕޭ ވަނީ އިތުރަށް ޕީއެސްޖީގައި މަޑުކުރަން ބޭނުން ނުވާކަން އެކުލަބަށް އަންގާފައެވެ. ޕީއެސްޖީއާއެކު އެންމެ ފުރަތަމަ އެމްބާޕޭ ސޮއި ކުރި ދާއިމީ އެއްބަސްވުމުގެ މުއްދަތު ހަމަވާން އޮތީ މިދިޔަ ސީޒަނުގެ ނިޔަލަށެވެ. އެއާއެކު އޭނާ އެ ކުލަބު ދޫކޮށް، ސްޕެއިންގެ ރެއާލް މެޑްރިޑަށް ބަދަލުވާން އުޅޭ ކަމުގެ އަޑުތަކެއް ފެތުރުނެވެ. ނަމަވެސް ޕީއެސްޖީން ވަނީ އެމްބާޕޭގެ އެއްބަސްވުން ދެ އަހަރަށް އައު ކޮށްފަ އެވެ. އޭނާ ރެއާލަށް ނޫނެކޭ ބުނީ ފަހު ވަގުތު ކަމަށް ވެސް މީޑިއާތަކުން ބުނެ އެވެ. އޭރު އެމްބާޕޭ ޕީއެސްޖީގެ އެއްބަސްވުން އައު ކުރީ ފުރާންސްގެ ރައީސް ގެ އިތުރުން އެގައުމުގެ ނުފޫޒުގަދަ އެތައް ބައެއްގެ ޕްރެޝަރާ އެކު ކުލަބުން އޭނާ އަށް ބޮޑެތި ބާރުތަކެއް ވެސް ލިބޭ ގޮތަށެވެ.

ނަމަވެސް، ރެއާލް މެޑްރިޑުން އަދިވެސް އުންމީދު ކަނޑައެއް ނުލައެވެ. އެކުލަބުން އަންނަނީ އަދިވެސް އެމްބާޕޭ އަށް ފާރަލަމުންނެވެ. މީޑިއާ ރިޕޯޓްތައް ބުނާގޮތުގައި ޕީއެސްޖީގެ އެއްބަސްވުން އެމްބާޕޭ އައު ނުކޮށްފި ނަމަ، ކުލަބުން ވިސްނަނީ ހިލޭ ޓްރާންސްފާއެއްގެ ބަދަލުގައި، ރަނގަޅު އަގެއް ލިބޭ ގޮތަށް އޭނާ ވިއްކާލުމަށެވެ. ނަމަވެސް މިވަގުތު އެކުލަބުން މަސައްކަތް ކުރަމުން އަންނަނީ އިތުރު އެއް އަހަރަށް އެމްބާޕޭ އެކުލަބުގައި މަޑުކުރުމަށް އެއްބަސްކުރުވޭތޯ އެވެ. 

2017 ވަނަ އަހަރު މޮނާކޯ ދޫކޮށް 180 މިލިއަން ޔޫރޯގެ ޓްރާންސްފާ އެއްގައި ޕީއެސްޖީއަށް ބަދަލުވި ފަހުން އެމްބާޕޭ އަންނަނީ އެ ކުލަބުގައި މޮޅު ކުޅުމެއް ދައްކަމުންނެވެ. އެމްބާޕޭ ވަނީ މިހާތަނަށް ޕީއެސްޖީ އަށް ކުޅެދިން 260 މެޗުގައި 212 ލަނޑު އެކުލަބަށް ކާމިޔާބުކޮށްދީފައެވެ.

ޕީއެސްޖީގެ ތާރީޚުގައި އެކުލަބަށް އެންމެ ގިނަ ލަނޑުޖެހި ކުޅުންތެރިއާ އެމްބާޕޭ ވަނީ ފާއިތުވެދިޔަ 06 ސީޒަނުގައި އެކުލަބާއެކު ގިނަ ކާމިޔާބީތަކެއް ހޯދާފައެވެ. އޭގެތެރޭގައި އެކުލަބުގެ ތާރީޚްގައި ފުރަތަމަ ފަހަރަށް ޗެންޕިއަންސް ލީގުގެ ފައިނަލަށް ގެންގޮސްދިނުން ވެސް ހިމެނެއެވެ.

މީގެއިތުރުން ވެސް މިސީޒަން ނިމުމާއެކު ޕީއެސްޖީގެ މުހިންމު ދެކުޅުންތެރިން ކަމަށްވާ މެސީ އާއި ނޭމާ ކުލަބު ދޫކޮށްލަން ނިންމާފައިވާއިރު އެއްފަހަރާ މި ތިން ކުޅުންތެރިން ކުލަބު ދޫކޮށް ދިއުމަކީ ޕީއެސްޖީއަށް ފޫނުބެއްދޭނެ ވަރުގެ ގެއްލުމެކެވެ.