ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ކުޅުދުއްފުށި ސިޓީއަށް ވަޑައިގަންނަވާ ގޮތަށް ހަމަޖެހިއްޖެއެވެ.

ރައީސް ނަޝީދު މިއަދު ހަވީރުގެ ވަގުތެއްގައި ކުޅުދުއްފުށްޓަށް ވަޑައިގަންނަވަން ހަމަޖެހިފައިވާއިރު މިއީ އެރަށު ސިޓީ ކައުންސިލަށް ދެ އަހަރު ފުރުމުގެ މުނާސަބާގައި ބާއްވާ ރަސްމިއްޔާތުގައި ބައިވެރިވެ ވަޑައިގެންނެވުމަށް ކުރައްވާ ދަތުރުފުޅެކެވެ. އެ ރަސްމިއްޔާތު އޮންނާނީ މިރޭ، ހދ އަތޮޅު ތައުލީމީ މަރުކަޒުގެ ހޯލުގަ އެވެ.

ކުޅުދުއްފުށީ ސިޓީ ކައުންސިލްގެ އަހަރީ ދުވަހުގެ މި ރަސްމިއްޔާތުގައި ސިޓީ ކައުންސިލަށް އެކި ގޮތްގޮތުން އެހީތެރިކަންފޯރުކޮށްދެއްވި ފަރާތްތަކުގެ އަގުވަޒަން ކުރުން އޮންނާނެ  ކަމަށް އެ ކައުންސިލުން މައުލޫމާތު ދެއެވެ. 

އެމްޑީޕީ މެޖޯރިޓީ އޮތް ކުޅުދުއްފުށީ ސިޓީ ކައުންސިލްގެ ހުރިހާ ކައުންސިލަރުން މިހާރު ވަނީ ރައީސް ނަޝީދު ގެ ވަފާތެރި މެންބަރުން އުފައްދަވާ "ދަ ޑިމޮކްރެޓްސް" އަށް ސޮއި ކުރައްވާފައެވެ. 

ނަޝީދު، މިދިޔަ އަހަރު ޑިސެމްބަރުމަހުވެސް ކުޅުދުއްފުއްޓަށް ވަޑައިގެންނެވި އެވެ. އަދި ދާދި ފަހުން ހއ އަތޮޅު ކައުންސިލުން ބޭއްވި އެވޯޑް ނައިޓެއް ޝަރަފްވެރިކޮށްދެއްވުމަށް ދިއްދޫއަށްވެސް ވަޑައިގަންނަވާފައިވެ އެވެ.