ރާއްޖޭގެ ވެރިކަމުގައި ތިބޭ މީހުންނަކީ، ކޮންމެ ތަނަކުން އައި ބަޔަކަށް ވީ ނަމަވެސް، އެމީހުންނަށް ލިބިފައިވާ ބާރުތައް ދޫކުރަން ވަރަށް ބޮޑަށް ދަތިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކުޅުދުއްފުށީ ސިޓީ ކައުންސިލަށް ދެ އަހަރު ފުރުމުގެ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ރާއްޖޭގެ ލާ މަރުކަޒީ ނިޒާމަށް 10 އަހަރުވެފައިވީ ނަމަވެސް، އެ ނިޒާމް އަދި ފުރިހަމަ ނުވާކަމަށެވެ. އެގޮތުން އެ ނިޒާމްގެ ތެރެއިން ކައުންސިލްތަކަށް ބޭނުންވާ ކަންކަން އަދިވެސް ފުރިހަމަށް ކޮށްދެވިފައި ނުވާ ކަމަށް ނަޝީދު ވިދާޅުވި އެވެ. 

ކަންމިހެން ހުރި ނަމަވެސް، ރައްޔިތުންނާއި ގާތުން ކުރާ ވެރިކަމާއި، ރައްޔިތުންނާއި ދުރުން ކުރާ ވެރިކަމަށް ބަލާއިރު, ފައިދާ ބޮޑީ ރައްޔިތުންނާއި ގާތުން ކުރާ ވެރިކަން ކަން ދުނިޔޭގެ ގިނަ ގައުމުތަކަށް ބަލާލުމުން އެނގިގެންދާ ކަމަށް ނަޝީދު ވިދާޅުވި އެވެ. 

އެގޮތުން، ކައުންސިލްތަކުގެ މަސައްކަތް، އެ ކައުންސިލަކުން ހިންގުމަކީ އެންމެ ފައިދާބޮޑު ގޮތް ކަމަށާ، ލާމަރުކަޒީ އުސޫލު ބުނާގޮތުން އެނޫން ގޮތަކަށް އެކަންކަން ކުރުން ނޫން ގޮތެއް ނެތް ކަމަށް ނަޝީދު ވިދާޅުވި އެވެ. 

މިއާއެކު ރައީސް ނަޝީދު ވަނީ ކުޅުދުއްފުށީ ސިޓީ ކައުންސިލްގެ ހުރިހާ ކައުންސިލަރުން ވެރިކަންކުރާ ޕާޓީ ދޫކޮށްލުމުގެ ސަބަބާއިމެދު އެމަނިކުފާނު ވިސްނެވި ކަމަށެވެ. އަދި އެއަށްފަހު ސަބަބު ދެނެގަތުމަށް ކުރި މަސައްކަތުން އެ ސިޓީގައި ސަރުކާރުން ހިންގާނެ ކަމަށް ބުނެފައިވާ މަޝްރޫއުތަކާއި އެ މަޝްރޫއު ތައް ކުރިއަށްދާ މިންވަރު ބެއްލެވި ކަމަށް ވިދާޅުވި އެވެ. އެގޮތުން ބެއްލެވި ބެއްލެވުމުން، އެ ސިޓީގައި ކުރިއަށް ގެންދިޔުމަށް ނިންމާފައިވާ 70 ޕްރޮޖެކްޓަށްވުރެ ގިނަ ޕްރޮޖެކްޓް ހުރިއިރު، އެއިން ގިނަ ޕްރޮޖެކްޓް ތައް ނިމިފައިވާ އިންސައްތަ ހުރީ 2 ނުވަތަ 3 އިއްސައްތައިގައި ކަމަށް އެމަނިކުފާނު ވިދާޅުވިއެވެ. 

ނަޝީދު ވިދާޅުވީ ރަށްރަށުގައި ހިންގުމަށް ކަނޑައަޅާ އެފަދަ ޕްރޮޖެކްޓްތައް ކުރިއަށް ނުދަނީ އެ ޕްރޮޖެކްޓް ތައް ހިންގުމުގެ ބާރު އެ ރަށެއްގެ ކައުންސިލަށް ނުދޭތީ ކަމަށެވެ.