މޯލްޑިވްސް އެއަރޕޯޓްސް ކޮމްޕެނީ ލިމިޓެޑް(އެމްއޭސީއެލް) މެރިޓް އެވޯޑުގެ ދަށުން ސެންޓާ ފޯ ހަޔަރ އެޑިޔުކޭޝަން (ސީއެޗެއެސްއީ) ގެ ދަރިވަރުންނަށް ފަހި ފުރުސަތުތަކެެއް ދިނުމަށް އެއްބަސްވުމެއް ގައި ސޮއިކޮށްފިއެވެ.
މިއީ އެމްއޭސީއެލްގެ އިޖުތިމާޢީ ޒިންމާގެ ދަށުން ތަޢުލީމީ ދާއިރާ ކުރިއަރުވައި ދޭން ކުރާ މަސައްކަތްތަކުގެ ބައެކެވެ.
އެމްއޭސީއެލްގައި އިއްޔެ ބޭއްވުނު ރަސްމިއްޔާތެއްގައި މި އެއްބަސްވުމުގައި ސޮއި ކުރެއްވީ، އެމްއޭސީއެލްގެ ފަރާތުން، ސީއީއޯ އަދި އެމްޑީ މަހްޖޫބު ޝުޖާއެވެ. ސީއެޗްއެސްއީން ސޮއި ކުރެއްވީ ޕްރިންސިޕަލް އާއިޝަތު ސޮފޫރާ އެވެ.
އެމްއޭސީއެލްއިން މެރިޓް އެވޯޑް ސްޕޮންސާ ކުރީ ތިން އަހަރަށެވެ.
އެމްއޭސީއެލް މެރިޓް އެވޯޑް ޕާޓްނާޝިޕް އެއްބަސްވުމުގެ ދަށުން ސީއެޗްއެސްއީގެ ގްރޭޑް 11 ނިންމާ ދަރިވަރުންގެ ތެރެއިން އެންމެ މަތީ ފާސް ހޯދާ ދަރިވަރުންނަށް ހިތްވަރު ދިނުމާއެކު ފުރުސަތުތައް ފަހި ކޮށްދޭނެ އެވެ.
އަދި ވީއައިއޭގައި ޝައުގުވެރިކަން ހުރި ދާއިރާއަކުން ތަޖުރިބާއާއި ތަމްރީނު ހޯދުމުގެ ފުރުސަތު ދޭނެ އެވެ. އަންހެން ދެ ދަރިވަރުންނާއި ފިރިހެން ދެ ދަރިވަރަކަށް ކޮންމެ އަހަރަކު މި އެވޯޑް ދޭނެ އެވެ.
ސީއީއޯ މަހްޖޫބު ޝުޖާއު ވިދާޅުވީ، މެރިޓް އެވޯޑަކީ ކާމިޔާބީ ފާހަގަ ކުރުމުގެ އިތުރުން ކާމިޔާބީ ހޯދާ ދަރިވަރުންނަށް ފަހި ފުރުސަތުތައް ހޯދައި ބާރުވެރި ކުރުވައި ދިނުމުގެ އަމާޒެއް ކަމަށެވެ.
އެމްއޭސީއެލްގައި އެ ދަރިވަރުންނަށް ވަޒީފާގެ ތަމްރީނާއި ތަޖުރިބާ ފޯރު ކޮށް ދިނުމަކީ އެމްއޭސީއެލްގެ މުހިންމު ބޭނުމެއް ކަމަށާއި އެމްއޭސީއެލްގެ ވަޒީފާއާ ގުޅޭ ދަރިވަރުންގެ ނިސްބަތް އިތުރު ވާނެ ކަމަށް އުންމީދު ކުރައްވާ ކަމަށެވެ.
Advertisement
This content is created and paid for by advertisers and does not involve Voice Journalists
