ވ. އާރަށުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކޮށްފައިވާ 11 އަހަރުގެ ޖަލުހުކުމެ އިސްތިއުނާފު އަޑުއެހުމަށް ބުރާސްފަތި ދުވަހަށް ހައިކޯޓުގައި ތާވަލުކޮށްފި އެވެ.

މި މައްސަލައިގެ ފުރަތަމަ އަޑުއެހުން ބާއްވާފައި ވަނީ މިމަހުގެ ހަތް ވަނަ ދުވަހު އެވެ. އެދުވަހު ކުރިއަށް ގެންގޮސްފައި ވަނީ އެ މައްސަލައިގައި ދެން ދައުވާ ސާބިތުވި ކުރީގެ ފެލިދޫ ދާއިރާގެ މެމްބަރު ޔޫސުފް ނައީމްގެ ބައެވެ.

ބުރާސްފަތި ދުވަހު ހައިކޯޓުގައި އޮންނަ އަޑުއެހުން ތާވަލުކޮށްފައި ވަނީ މެންދުރު 2:00 އަށެވެ. މާދަމާގެ އަޑުއެހުމުގައި ޔާމީންގެ ފަރާތްޕުޅުން ހުށަހަޅާ އިސްތިއުނާފް ނުކުތާތަކަށް ފުރުސަތު ލިބިގެންދާނެ އެވެ.

މި މައްސަލައިގައި ރައީސް ޔާމިނުގެ ބައި ކުރިއަށް ގެންދިއުމަށް މި ހަފްތާގެ ހޯމަ އަދި އަންގާރަ ދުވަހު ވެސް އަޑުއެހުމެއް ތާވަލު ކުރެވުނެވެ.

އެހެން ނަމަވެސް، ދަށު ކޯޓުގައި އޮތް އެމަނިކުފާނުގެ ފުއްގިރި މައްސަލައިގެ ހެކިބަސް ނެގުމުގެ އަޑުއެހުންތަކަށް ފުރުސަތު ދިނުމުގެ ގޮތުން ހައި ކޯޓުން ވަނީ ދެ ދުވަހުވެސް އެ ކޯޓުގައި ތާވަލު ކުރެވުނު އިސްތިއުނާފީ އަޑުއެހުންތައް ކެންސަލްކޮށްފަ އެވެ.

އާރަށު އިސްތިއުނާފީ މައްސަލައަށް ހުރަސްއެޅޭ ގޮތަށް ދަށު ކޯޓުގައި އޮތް މައްސަލަ ކުރިއަށް ނުގެންދިއުމަށް ވެސް ރައީސް ޔާމިނުގެ ފަރާތްޕުޅުން ވަނީ އެދިވަޑައިގެންފަ އެވެ. އަދި އެފަދައިން އެކަން ކުރުމަކީ އެމަނިކުފާނުގެ އިސްތިއުނާފީ ހައްގުތަކަށް ހުރަސްއެޅޭ ކަމެއްކަން ވެސް ގާނޫނީ ވަކީލުން ގެންދަވަނީ ފާހަގަކުރައްވަމުން ނެވެ.

މިހާރު ވެސް އެމަނިކުފާނު ގެންދަވަނީ އާރަށު މައްސަލައާއި ގުޅިގެން ކްރިމިނަލް ކޯޓުން ކޮށްފައިވާ ޖަލު ހުކުމެއް ތަންފީޒުކުރައްވަމުން ނެވެ.

އާރަށު މުއާމަލާތާއި ގުޅިގެން ރައީސް ޔާމިނުގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާފައިވަނީ ގާނޫނާއި ޚިލާފަށް ކަމަށާއި، ހައިކޯޓު މަރުހަލާއިން އެމަނިކުފާނު މިނިވަންވެ ވަޑައިގަންނަވާނެކަމުގެ ފުރިހަމަ ޔަގީންކަން އޮތްކަމަށް ގާނޫނީ ރައީސް ޔާމީންގެ ޤާނޫނީ ވަކީލުން ގެންދަވަނީ ވިދާޅުވަމުން ނެވެ.