‏މާލޭ ބިމުގެ ބޭނުން ޢާންމު މަސްލަޙަތަށް އެންމެ ހެޔޮ ގޮތުގައި ހިފުމާއި، އެތަންތަނުން އާމްދަނީ އުފައްދާ ހޯދުމަކީ މާލެ ސިޓީ ކައުންސިލްގެ މަސްއޫލިއްޔަތެއް ކަމަށާ، އެކަން ހިންގާންޖެހޭނީ ދެފުށްފެންނަ ގޮތަށް ކަމަށް މާލެ ސިޓީ ކައުންސިލުގެ ގަލޮޅު އުތުރު ދާއިރާގެ ކައުންސިލަރު ސައިފް ފާތިހު ވިދާޅުވެއްޖެއެވެ.

މާލޭގެ އެއްވެސް ހުސް ޖާގައެއް، މަގެއް، މައިޒާނެއް، ޕާކެއް، ބިމެއް ވަކި ކަމަކަށް-ވިޔަފާރިއަށް އެކަށައަޅައި، ކުއްޔަށް ދޫކުރުމާއި، އެތަންތަނަށް ބަދަލުގެނެސް، ތަރައްޤީކުރުމާއި، އެތަންތަނާ ގުޅޭގޮތުން ލިބޭ ޕްރޮޕޯޒަލް ވިލަރެސްކޮށް، ފަހުބަސް ބުނެ، ގޮތް ނިންމުމުގެ އިޚްތިޔާރެއް ކައުންސިލުގެ ކޮމިޓީއަކަށް ލިބިގެންނުވާކަމަށާއި، އެފަދަ ނިންމުމެއް ނިންމޭނީ މާލޭ ސިޓީ ކައުންސިލްގެ ޢާންމު ރަސްމީ ޖަލްސާއަކުން ވޯޓުލާ ފާސްކޮށްގެން ކަމަށް ހަމަޖެއްސުމަށް ކައުންސިލްގެ ޖަލްސާއަށް ހުށަހަޅައި އެގޮތަށް ވަނީ ފާސްކޮށްފައެވެ. 

އެ ހުށަހެޅުން ހުށަހެޅުއްވީ، މާލެސިޓީ ކައުންސިލްގައި ހިމެނިވަޑައިގަންނަވާ ކައުންސިލަރުންގެ ތެރެއިން، ދަ ޑިމޮކްރެޓްސް އަށް ނިސްބަތްވާ ކައުންސިލަރުންނެވެ. އެއީ ގަލޮޅު މެދު ދާއިރާގެ ކައުންސިލަރު މަރިޔަމް ރީހާން ނާޒިމް(ރީނު) އާއި، ސައިފުގެ އިތުރުން ގަލޮޅު ހުޅަނގު ދާއިރާގެ ކައުންސިލަރު މަރިޔަމް ނާޒިމާ މުހައްމަދު ފާއިޒެވެ. 

އެކަމާއި ގުޅިގެން ސައިފް ކުރެއްވި ޓުވީޓެއްގައި ވިދާޅުވީ، މާލޭ ބިމުގެ ބޭނުން ޢާންމު މަސްލަޙަތަށް އެންމެ ހެޔޮ ގޮތުގައި ހިފުމާއި، އެތަންތަނުން އާމްދަނީ އުފައްދާ ހޯދުމަކީ މާލެސިޓީ ކައުންސިލްގެ މަސްއޫލިއްޔަތެއް ކަމަށެވެ.

"އެކަން ހިންގާންޖެހޭނީ ދެފުށްފެންނަ، ހާމަކަން ބޮޑު، ހުޅުވާލެވިފައިވާ ޑިމޮކްރެޓިކް ހަމަތަކުގެ މަތިން!" ސައިފް ވިދާޅުވި އެވެ. 

މިއާއެކު ސައިފް ވަނީ، އެކަން ފާސްކުރުމަށް ވޯޓުދެއްވި ހުރިހާ ކައުންސިލަރުންނަށް ޝުކުރު އަދާކުރައްވާފައެވެ.