ވައިފުޅި އަޅައިގެން ހުއިފިލަނޑާ ނެގުމުގެ ހުއްދަ ދީފިއެވެ.

މިހުއްދަ ދީފައިމިވަނީ މަސްވެރިކަމުގެ ޢާންމު ޤަވާއިދަށް ގެނައި ބަދަލުގެ ތެރެއިންނެވެ.

އެގޮތުން އަންގާރަ ދުވަހުން ފެށިގެން ޢަމަލު ކުރަން ފެށި އެ ޤަވާއިދާއެކު ވައިފުޅިއާއެކު ފީނައިގެން ހުއިފިލަނޑާ ނެގުން ހުއްދަވާނެއެވެ.

މިކަމާއި ގުޅިގެން ފިޝަރީޒް މިނިސްޓްރީ އިން ބުނެފައިވަނީ ވައިފުޅި އަޅައިގެން ހުއިފިލަނޑާ ނެގުމުގެ ހުއްދަ ދޭން ނިންމީ އެބާވަތުގެ މަސްވެރިކަން ކުރާ މީހުންގެ އެދުމުގެ މަތިން ކަމަށެވެ.

މަސްވެރިކަމާއި ގުޅޭ ޢާންމު ޤަވާއިދުގައި ވަނީ ޤައުމީ ގޮތުންނާއި ބައިނަލްއަގުވާމީގޮތުން ގަބޫލުކުރާ ފީނުމުގެ ތަމްރީނު ފުރިހަމަކޮށް ސެޓްފިކެޓާއެކު ވައިފުޅި އަޅައިގެން ފީނައިގެން މަސްވެރިކަން ކުރުން ނުވަތަ މަސްވެރިކަމާ ގުޅުންހުރި ހަރަކާތް ހިންގޭނެ ކަމަށެވެ. ރާއްޖޭގައި ކުރިންސުރެވެސް ހުއިފިލަނޑާ ނަގައި ކައްކާ ހިއްކައިގެން އެކްސްޕޯޓް ކުރެ އެވެ. ހުއިފިލަނޑާގެ މަސްވެރިކަން ކުރާ އާބާދީތަކެއް ރާއްޖޭގައި އޮވެއެވެ.

ހުއިފިލަނޑާ އާލާކޮށް ބޮޑުކޮށް އެ މާކެޓް ކުރުމަށް އިންޓަނޭޝަނަލް ފަންޑް ފޯ އެގްރިކަލްޗަރަލް ޑިވެލޮޕްމެންޓް (އިފާޑް) އާއި ފިޝަރީޒް މިނިސްޓްރީ ގުޅިގެން 2016 ވަނަ އަހަރު ދެރަށެއްގައި ބޮޑު މަޝްރޫއެއް ވެސް ފެށިއެވެ.