ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ގްރޫޕް އޭގައި މިއަދު ހަވީރުގެ ކުޅެވުނު ދެވަނަ މެޗުގައި ވެލާވަރު އާއި އިރުވެލި ވާދަކުރި މެޗު 8-0 ގެ ތަފާތުބޮޑު ނަތީޖާއަކުން ވެލަވަރު ކާމިޔާބުކޮށްދިނެވެ.

މެޗުގެ ވަރަށް ކުރީކޮޅު ވެލާވަރު ޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއިރު، މެޗު ފެށިގެން ދެވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ މުހައްމަދު ޝާއިން އެވެ. މިއީ އިރުވެލި މެދަށްވުރެ މެދުގޮނގާއި މައިން އަރިމަތީ ރޮނގުމަތިން އެޓީމަށް ލިބުނު ޖެހުމެއްގައި ޝައިހާން ކުރިއަށް ފޮނުވާލި ބޯޅައެއް އިރުވެލި ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ އެއްފަހަރުން ޖަހައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ވެލާވަރުގެ ދެވަނަ ލަނޑު އޭގެ ދެމިނެޓު ފަހުން ކާމިޔާބުކޮށްދިނީ އިބްރާހިމް ފަޒީލްއެވެ. އަދި އޭގެ މިނެޓެއް ފަހުން ފާޒިލް ތަނަވަސްކޮށްދިން ފުރުސަތެއްގައި ޝައިހާން ވަނީ އެޓީމުގެ ތިންވަނަ ލަނޑު ކާމިޔާބުކޮށްދީފައެވެ.

ފުރަތަަމަ ހާފު ނިމުމުގެ ކުރިން ވެލާވަރު ހަތަރުވަނަ ލަނޑު ކާމިޔާބުކޮށްދިނީ ފުރަތަމަ ހާފުގެ 16 ވަނަ މިނެޓުގައި ޝައިހާން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ވެލާވަރު ކުރީގައި އޮވެގެންނެވެ.

ދެވަނަ ހާފުގާއި ވެލާވަރުން އިތުރު ހަތަރު ލަނޑު ކާމިޔާބުކުރިއިރު، އެޓީމުގެ ފަސްވަނަ ލަނޑު ކާމިޔާބުކޮށްދިނީ އިބްރާހިމް ފަޒީލްއެވެ. މިއީ ދެވަނަ ހާފުގެ ފެށިގެން ތިންވަނަ މިނެޓުގައި އެޓީމުގެ ޝާއިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ މިނެޓެއް ފަހުން އެޓީމުގެ ހަވަނަ ލަނޑު ކާމިޔާބުކޮށްދިނީ މުހައްމަދު ރިއާޝް އަހުމަދެވެ.

ވެލާވަރުގެ ހަތްވަނަ ލަނޑު ޝާއިން ކާމިޔާބުކޮށްދިންއިރު، މެޗުގެ ފަހުވަގުތު ކޮޅުގެ ތެރޭގައި އެޓީމަށް ލިބުނު ދުރު ޕެނަލްޓީގައި ޝައިހާން ވަނީ އެޓީމުގެ 08 ވަނަ ލަނޑު ކާމިޔާބުކޮށްދީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މި ލަނޑާއެކު މެޗުގެ ކުޅުން ނިމިގެންދިޔައީ 8-0 ގެ ނަތީޖާއަކުން ވެލާވަރު ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ވެލާވަރުގެ ޖޯޒީ ނަންބަރު 07 އަހުމަދު ޝައިހާން އެވެ.