މި މަހުގެ 15-18 އަށް އިންޑިއާގެ ބުބަނޭޝްވަރުގައި ކުރިއަށްދާ އިންޑިއާގެ 62 ވަނަ ނެޝަނަލް އިންޓަ ސްޓޭޓް ސީނިއާ އެތުލެޓިކްސް ޗެމްޕިއަންޝިޕްގައި ރާއްޖޭގެ ޒުވާން އަންހެން ދުވުންތެރިޔާ ޒިވާ މޫސާ ޝަފީއު ގައުމީ ޖޫނިއަރ 400މ ދުވުމުގެ ރެކޯޑް މުގުރާލައިފިއެވެ.

މިއަދު ހެނދުނު ކުރިއަށް ދިޔަ 400މ ދުވުމުގެ ހިތް ހަތަރެއް ގައި ދުވެ ޒިވާ ރޭސް ނިންމީ 58.86 ސިކުންތުން ނެވެ. މި ހީޓުގައި ޖުމްލަ ހަތް އެތްލީޓުން ދުވިއިރު، ޒިވާ ރޭސް ނިންމީ ހަތް ވަނައަށެވެ.

ކުރިން 400މ ގައުމީ ޖޫނިއަރ ރެކޯޑް އޮންނަނީ އައިޝަތު ހިމްނާ ހަސަން އަތުގައެވެ. ހިމްނާ މި ރެކޯޑް ހަދާފައިވަނީ 2019 ވަނަ އަހަރު ބޭއްވުނު އޭޝިއަން ޔޫތް ޗެމްޕިއަންޝިޕްގައި 59.18 ސިކުންތުން ދުވެގެންނެވެ.

Advertisement

މި މުބާރާތުގައި ޒިވާގެ އިތުރުން ރާއްޖޭގެ ހަސަން ސާއިދު، އަހުމަދު ނަޖުދާން އަބްދުﷲ، ހުސެއިން ރިޒާ އިތުރުން ހުސެއިން ފަޒީލް ހާރޫން ވާދަކުރަމުން އަންނައިރު މިއަދު ހެނދުނު ކުރިއަށް ގެންދިޔަ 800މ ދުވުމުގައި ހިތް ތިނެއްގައި ހުސެއިން ރިޒާ ވަނީ ދުވެފައެވެ.

މި ހީޓުގައި 10 އެތްލީޓުން ބައިވެރިވިއިރު، ރިޒާ ރޭސް ނިންމީ 1:55.77 އިން ދުވެގެން ހީޓުގެ 9 ވަނައިގައެވެ.

އިންޑިއާގެ 62 ވަނަ ނެޝަނަލް އިންޓަ ސްޓޭޓް ސީނިއާ އެތުލެޓިކްސް ޗެމްޕިއަންޝިޕްގައި ވާދަކުރަމުން އަންނަ ފަސް ދުވުންތެރިންނަކީވެސް އަންނަ އޮގަސްޓް މަހު މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް ތައްޔާރުވަމުން އަންނަ އެތުލެޓިކްސް ސްކޮޑުގައި ހިމެނޭ ދުވުންތެރިންނެވެ.

ރާއްޖޭގެ ގައުމީ އެތުލެޓިކްސް ސްކޮޑުގައި ހިމެނޭ ގިނަ ދުވުންތެރިން މިވަގުތު ތަމްރީން ހަދަމުން އަންނަނީ ރާއްޖެއިން ބޭރުގަ އެވެ. މިގޮތުން ހަތަރު ދުވުންތެރިއަކު ޖެމެއިކާގައި ތަމްރީން ހަދަމުން އަންނައިރު، އިންޑިއާގެ ބެންގަލޫރުގައިވެސް ގިނަ ދުވުންތެރިންތަކެއް އަންނަނީ ތަމްރީން ހަދަމުންނެވެ.