ޙަލާލް ސެޓްފިކެޓް ދިނުމަށް ރާއްޖެއިން ވަމުންދާ ތައްޔާރީތަކަށް މެލޭޝިޔާއިން މިހާރު ރާއްޖެ އަށް ޒިޔާރަތްކުރަމުންދާ ތަޖުރިބާކާރުންގެ ފަންނީ އެހީދޭނެ ކަމަށް އެ ޓީމުން ހާމަކޮށްފިކަމަށް އިސްލާމިކް މިނިސްޓްރީ އިން ބުނެފިއެވެ.
އިސްލާމިކް މިނިސްޓްރީ އިން މިކަން ހާމަ ކޮށްފައިވަނީ މެލޭޝިޔާއިން މިހާރު ރާއްޖެ އަށް ޒިޔާރަތް ކުރަމުންދާ މެލޭޝިއާގެ ސެރުނާއީ ޙަލާލް އީކޮމާސްގެ އެކްސްޕާޓުންގެ ޓީމާއި އިސްލާމިކް މިނިސްޓަރ ޑރ އަހްމަދު ޒާހިރާއި އެކު ބޭއްވެވި ބައްދަލުވުމުގެ ޚަބަރާއި އެކުއެވެ.
ސެރުނާއީ ޙަލާލް އީކޮމާސްއަކީ ޑިޖިޓަލް ޙަލާލް އެޝުއަރެންސް ސިސްޓަމެއް މެދުވެރިކޮށް، އެފަރާތްތަކަށް ޙަލާލް އިންޑަސްޓްރީ ކުރިއެރުވުމަށާއި އެކަމަށްބޭނުންވާ ފަންނީ އެހީފޯރުކޮށްދިނުމުގައި މަސައްކަތްކުރާ ބައެއް ކަމަށް އިސްލާމިކް މިނިސްޓްރީ އިން ބުނެފައިވެއެވެ.
މިކަމާގުޅޭ މައުލޫމާތު ހިއްސާކުރެއްވުމަށާއި ހޭލުންތެރިކުރުވުމުގެ ވޯކްޝޮޕްތައް ކުރިއަށްގެންދިޔުމަށް މިހާރު ރާއްޖޭގައި ހަރަކާތްތެރިވަމުންދާ ތަޖުރިބާކާރުން ރާއްޖޭގައި ޙަލާލް ސެޓްފިކެޓްގެ ޚިދުމަތްދިނުމަށް ވަމުންދާ ތައްޔާރީތަކަށް ފަންނީ ގޮތުން އެހީތެރިވެދޭނެ ކަމަށް އިސްލާމިކް މިނިސްޓްރީ އިން ހާމަ ކޮށްފައިވެއެވެ.
މި ޓީމާއި ބައްދަލުކުރައްވައި މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ދެއްކެވި ވާހަކަފުޅުގައި ރާއްޖެއަށް ޒިޔާރަތްކޮށް، އެޓީމުން ކުރައްވަމުންގެންދަވާ މަސައްކަތްތައް ފާހަގަކުރައްވައި، އެކަމަށްޓަކައި ޝުކުރު އަދާކުރެއްވި ކަމަށް އިސްލާމިކް މިނިސްޓްރީ އިން ވިދާޅުވެފައިވެއެވެ.
ރާއްޖެއަކީ ގިނަ އަދަދެއްގެ ތަކެތި އިމްޕޯޓްކުރާ ޤައުމަކަށްވާއިރު ޙަލާލް ސެޓްފިކެޓް ލިބިފައިވާ ޤައުމުތަކާއި ތަކެތި، އެނގުމުގެ މުހިންމުކަން ފާހަގަކުރައްވައި މިނިސްޓަރ ވިދާޅުވީ ރާއްޖެއަކީ އިސްލާމީ ޤައުމަކަށްވާއިރު ރާއްޖެއަށް އިމްޕޯޓްކުރާ އަދި ރާއްޖެއިން އެހެން ޤައުމުތަކަށް އެކްސްޕޯޓްކުރާ ތަކެއްޗަކީ ޙަލާލް ސެޓްފިކެޓް ލިބިފައިވާ ތަކެއްޗަށްވުމަށް ބޭނުންވާކަމަށް މިނިސްޓަރ ވިދާޅުވިކަމަށް މިނިސްޓްރީ އިން ފާހަގަ ކުރައްވާފައި ވެއެވެ.
މި ޓީމުން މިނިސްޓަރާ ބައްދަލުކޮށް ދެއްކިވާހަކައިގައި ރާއްޖެއިން އެޓީމަށް ދެމުންދާ އެއްބާރުލުން ފާހަގަކޮށް ޝުކުރުއަދާކޮށްފައި ވާކަމަށް މިނިސްޓްރީ އިން ބުނެފައިވެއެވެ. އަދި ކުރިއަށް އޮތްތަނުގައިވެސް ރާއްޖޭގެ އެކިއެކި މުއައްސަސާތަކާއިއެކު މަސައްކަތްކުރުމުގެ ޝައުޤުވެރިކަން އެ ޓީމުންވަނީ ފާހަގަކޮށްފައި ވާކަމަށް އެމިިނިސްޓްރީ އިން ބުނެފައިވެއެވެ.
މި ޓީމުން ރާއްޖޭގެ ކަމާގުޅުންހުރި މުއައްސަސާތަކާ ބައްދަލުކޮށް، މިކަމަށްބޭނުންވާ މަޢުލޫމާތު ވަނީ ޙިއްސާކޮށްފައި ވާނެ ކަމަށާއި ކުރިއަށް އޮތްތަނުގައިވެސް ފަންނީ ގޮތުން އެކިއެކި އެހީތެރިކަން ފޯރުކޮށްދޭނެ ކަމަށް އިސްލާމިކް މިނިސްޓްރީ އިން ހާމަކޮށްފައިވެއެވެ. ސެރުނާއީ ޙަލާލް އީކޮމާސްއިން މި މަސައްކަތް ކުރަނީ އިސްލާމިކް ޑިވޮލަޕްމެންޓް ބޭންކްގެ އެހީތެރިކަމާއެކުގައެވެ.
Advertisement
This content is created and paid for by advertisers and does not involve Voice Journalists
