ޔުއެފާ ނެޝަނަލް ލީގް ސެމީފައިނަލުގެ ދެވަނަ މެޗުގައި 2-1 ގެ ނަތީޖާއަކުން އިޓަލީ ބަލިކޮށް ފައިނަލްގެ ދެވަނަ ޖާގަ ސްޕެއިނުން ހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގެ ވަރަށް ކުރީކޮޅު ސްޕެއިން އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ ވިލަރެއާލްގެ ފޯވާޑް ޔެރެމީ ޕިނޯ އެވެ.

އިޓަލީ އިން މެޗުގެ ނަތީޖާ އެއްވަރުކުރި ފުރަތަަމަ ހާފުގެ 11 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ތަޖުރިބާކާރު ފޯވާޑް ސިރީ އިމޮބިލޭ އެވެ. މިއީ ސްޕެއިންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ.

ފުރަތަަމަ ހާފުގެ 21 ވަނަ މިނެޓުގައި އިޓަލީ އިން ލަނޑެއް ކާމިޔާބުކޮށް މެޗުގެ ލީޑު ވެސް ހޯދިއެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަނަ ހާފުގައި ސްޕެއިން އިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، ދެވަނަ ހާފުގެ 49 ވަނަ މިނެޓުގައި އެޓީމަށް ލިބުނު ހުސް ފުރުސަތުގައި މިކެއިލް މެރިނޯ ފޮނުވާލި ބާރު ހަމަލާ އިޓަލީގެ ކީއްޕަރު ވަނީ ދިފާއުކޮށްފައެވެ.

މީގެއިތުރުންވެސް މިހާފުގައި އެޓީމުގެ އަލްވާރޯ މޮރާޓާ އާއި ރޮޑްރީ އަށް ލިބުނު ހުސް ފުރުސަތުތަކުގެ ބޭނުން ނުކުރެވި ދިޔައިރު، ދެވަނަ ހާފުގައި އިޓަލީ ޓީމުން އެންމެ ހުސް ފުރުސަތެއް ލިބުނީ މިޑްފީލްޑަރު ޑޭވިޑޭ ފްރެޓެސީ އަށެވެ. ނަމަވެސް އޭނާ ފޮނުވާލި ބާރު ހަމަލާ ސްޕެއިންގެ ގޯލްކީޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

މި މެޗުން ސްޕެއިން މޮޅުވި ލަނޑު މެޗު ނިމެން ދެ މިނިޓަށްވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަަނަ ހާފްގައި 84 ވަނަ މިނެޓުގައި ކުޅެންއެރި ފޯވާޑް ޖޯސެލޫ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މިއީ ޔުއެފާ ނެޝަނަލް ލީގް ސެމީފައިނަލުގައި ޖެހިޖެހިގެން ސްޕެއިން އަތުން ބަލިވެ އިޓަލީ ކެޓި ދެވަނަ ފަހަރެވެ. މިއަހަރުގެ ޔުއެފާ ނެޝަނަލް ލީގް ފައިނަލުގައި ސްޕެއިން ވާދަކުރަންޖެހެނީ ސެމީފައިނަލްގެ ފުރަތަަމަ މެޗުގައި 4-2 ގެ ނަތީޖާއަކުން ނެދަލޭންޑްސް ބަލިކޮށް ފައިނަލްގެ ފުރަތަަމަ ޖާގަ ހޯދި ކްރޮއޭޝިޔާ އާއި ދެކޮޅަށެވެ.

މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 18 ވަނަ ދުވަހުގެ ރޭ ރާއްޖެ ގަޑިން 23:45 ގައެވެ. އަދި ހަމަ އެރޭ ރާއްޖޭ ގަޑިން އިރުއޮއްސި 18:00 މިނެޓުގައި ކުޅެވޭ މުބާރާތުގެ ތިންވަނަ ހޮވާ މެޗުގައި އިޓަލީ ނުކުންނާނީ ނެދަލޭންޑްސް އާއި ދެކޮޅަށެވެ.