ޙައްޖުމަހުގެ މަތިވެރި ދުވަސްތަކުގައި ފާފަތަކަށް އަރައިގަތުމާއި, މަލާމާތް ކުރުމާއި ފުރައްސާރަ ކުރުމާއި ބާތިލު ވާހަކަ ދެއްކުމާއި އަދި ފިތުނަ އުފައްދައި، ފަސާދަ ކުރުންފަދަ އެންމެހައި ނުބައިކަންކަމުން ދުރުހެލިވެތިބޭ ބަޔަކަށް ވުމަށް މިއަދުގެ ޚުތުބާގައި ނަސޭހަތްތެރުވެއްޖެއެވެ.
"ހައްޖު މަހުގެ ފުރަތަމަ ދިހަ ދުވަސް" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ބުނީ الله ގެ ހަޟްރަތުގައި އެންމެ ލޮބުވެތިކަން ބޮޑުވެގެންވާ މައްސަރަކީ ހައްޖު މަސް ކަމަށާއި އަދި ދުނިޔެއަށް އަންނަ އެންމެ މާތް ދުވަސްތަކަކީ ހައްޖު މަހުގެ ފުރަތަމަ ދިހަ ދުވަސް ކަމަށެވެ.
އެހެންކަމުން، ޙައްޖުމަހުގެ މަތިވެރި ދުވަސްތަކުގެ ބޭނުން ހެޔޮގޮތުގައި ހިފުމަށްޓަކައި މި ދުވަސްތަކުގައި ނުބައިކަންކަމާއި ދުރުހެލިވުމަކީ ވަރަށް މުހިއްމުކަމެއް ކަމުގައިވެސް ޚުތުބާގައި ބުނެފައިވެއެވެ.
"ހެޔޮކަންކަމަކީ މީހާއަށް الله ގެ ރަޙްމަތާއި ނިޢުމަތްތައް ލިބުމުގެ ސަބަބެއްކަމުގައި ދަންނަން ޖެހެއެވެ. ހަމައެފަދައިން ފާފަތަކަށް އަރައިގަތުމަކީ الله ގެ ރަޙްމަތުން ދުރުކުރެވި ނިޢުމަތްތަކުން މަޙްރޫމު ވެދާނެ ސަބަބެއްކަމުގައި ހަނދާންކުރަން ޖެހެއެވެ." ޚުތުބާގައި ބުނެފައިވެއެވެ.
ވުމާއެކު ޙައްޖުމަހުގެ މަތިވެރި ދުވަސްތަކުގައި ފާފަތަކަށް އަރައިގަތުމާއި ނެތިމޮށުމާއި، ދެބައޮޑުވުމާއި، ދޮގުހެދުމާއި އަރާރުންވުމާއި މަލާމާތް ކުރުމާއި ފުރައްސާރަ ކުރުމާއި ބާތިލު ވާހަކަ ދެއްކުމާއި އަދި ފިތުނަ އުފައްދައި، ފަސާދަ ކުރުންފަދަ އެންމެހައި ނުބައިކަންކަމުން ދުރުހެލިވެތިބޭ ބަޔަކަށް ވުމަށް ޚުތުބާގައި ވަނީ ނަސޭހަތްތެރިވެފައެވެ.
އަދި ހަމައެހެންމެ، މާތްالله ލޯބިވެ ވޮޑިގެންނުވާ އެއްވެސް އަމަލަކަށް އަރައިނުގަނެ، ދުނިޔެއަށް އަންނަ އެންމެ މާތް ދުވަސްތަކުގެ ބޭނުން ހެޔޮގޮތުގައި ހިފުމަށްވެސް ޚުތުބާގައި ވަނީ ނަސޭހަތްތެރިވެފައެވެ.
"އެންމެ ފުރަތަމަ ކަމަކަށް ތެދުވެރި އިހްލާސްތެރި ތައުބާއަކުން ތައުބާވެ މި ދުވަސްތައް ފަށާށެވެ. ތައުބާވާ އަޅުންދެކެ މާތް ﷲ ލޯބިވެ ވޮޑިގަންނަވަ އެވެ،" ހުތުބާގައި ބުނެފައިވެ އެވެ.
މިއާއެކު ޚުތުބާގައި ވަނީ، މި ދުވަސްތަކުގައި ކުރެވެން އޮތް އެންމެ ހެޔޮ އަމަލުތަކުގެ ތެރޭގައި ރޯދަ ހިފުން ހިމެނޭކަން ފާހަގަކޮށް، މިމަހުގެ 9 ވަނަދުވަހުގެ ރޯދައިގެ ސަވާބާއި ދަރުމަށްއަށް އަލި އަޅުވާލާފައެވެ.
"ހާއްސަކޮށް ހައްޖު މަހުގެ ނުވަވަނަ ދުވަހުގެ ރޯދަގެ ސަވާބާއި ދަރުމަ މަތިވެރިވެގެންވެ އެވެ. ރަސޫލާ (ޞ) ގެ ހަދީޘް ބަސްފުޅެއްގައި ވަނީ އެދުވަހުގެ ރޯދައަކީ ވޭތުވެދިޔަ އަހަރާއި އަންނާން އޮތް އަހަރުގެ ފާފަތައް ފުއްސަވާނެ ރޯދައެއް ކަމުގަ އެވެ،" ހުތުބާގައި ބުނެފައިވެ އެވެ.
Advertisement
This content is created and paid for by advertisers and does not involve Voice Journalists
