ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ގްރޫޕް އޭގައި މިއަދު ހަވީރުގެ ކުޅެވުނު ފުރަތަމަ މެޗުގައި ވޮއްމުލި އާއި އިރުވެލި ވާދަކުރި މެޗު 11-3 ގެ ތަފާތުބޮޑު ނަތީޖާއަކުން ވޮއްމުލި ކާމިޔާބުކޮށްދިނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ވޮއްމުލި އިންނެވެ. މެޗު ފެށިގެން ދެ ވަނަ މިނެޓުގައި އެޓީމުން ލީޑު ހޯދިއިރު، މިލަނޑު އެޓީމަށް ކާމިޔާބުކޮށްދިނީ އިބްރާހިމް ނަޞާތު އެވެ. އަދި އޭގެ އަށް މިނެޓުފަހުން އެޓީމުގެ ނަސްރުﷲ ޖަމީލް ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ނަމަވެސް ޖެހިގެންއައި މިނެޓުގައި އިރުވެލިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ އަހުމަދު މަސްދޫގްއެވެ.

ވޮއްމުލިން މި މެޗުގައި ކާމިޔާބުކުރި ތިންވަނަ ލަނޑު ފުރަތަަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން އިބްރާހިމް ނަޞާތު އެވެ. ނަމަވެސް ފުރަތަަމަ ހާފު ނިމުމުގެ ކުރިން އިރުވެލި ޓީމުގެ މުހައްމަދު ޝަކީބު ވަނީ ގާތް ގާތުގައި ދެ ލަނޑު ކާމިޔާބުކޮށް މެޗުގެ ނަތީޖާ އެއްވަރުކޮށްދީފައެވެ.

ނަމަވެސް ހާފު ނިމުމުގެ ކުރިން ވޮއްމުލި ޓީމުގެ މުހައްމަދު އަލީ ވަނީ ލަނޑެއް ކާމިޔާބުކޮށް ދެވަނަ ފަހަރަށް މި މެޗުގައި އެޓީމަށް ލީޑު ހޯދައިދީފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން ވޮއްމުލި ކުރީގައި އޮވެގެންނެވެ.

މެޗުގެ ދެވަނަ ހާފުގައި ވޮއްމުލިން އެޓީމުގެ ކުޅުން ރަނގަޅުކޮށް އިތުރު 06 ލަނޑު ކާމިޔާބުކުރިއިރު، މި މެޗުގައި އެޓީމުން ކާމިޔާބުކުރި ފަސްވަނަ ލަނޑަކީ ފަހުހާފުގެ 28 ވަނަ މިނެޓުގައި އިރުވެލި ޓީމުގެ އަބްދުﷲ އަމްޖަދު އަތުން ބައިކޮޅަށް ވަން ލަނޑެކެވެ. އަދި އޭގެ ދެމިނެޓު ފަހުން އެޓީމުގެ ހަވަނަ ލަނޑު ކާމިޔާބުކޮށްދިނީ ނަސްރުﷲ ޖަމީލް އެވެ.

ވޮއްމުލިން މި މެޗުގައި ކާމިޔާބުކުރި 07 ވަނަ ލަނޑު ފަހުހާފުގެ 32 ވަނަ މިނެޓުގައި މުހައްމަދު އަލީ ކާމިޔާބުކޮށްދިންއިރު ޖެހިގެންއައި މިނެޓުގައި އެޓީމުގެ 08 ވަނަ ލަނޑު ކާމިޔާބުކޮށްދިނީ އިބްރާހިމް އަލީ އެވެ. އަދި އެޓީމުގެ 09 ވަނަ ލަނޑާއި 10 ވަނަ ލަނޑު ގާތްގާތުގައި ޝަފީއު ހަސަން ކާމިޔާބުކޮށްދިން އިރު މެޗުގެ އެންމެ ފަހު މިނެޓްގައި އެޓީމުގެ 11 ވަނަ ލަނޑު ކާމިޔާބުކޮށްދީ މުހައްމަދު އަލީ ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ.

މި މެޗުގެ މޭން އޮފް ދަ މެޗަކަށް ހޮވުނީ މި މެޗުގައި ތިން ލަނޑު ކާމިޔާބުކޮށް ހެޓްރިކް ހެދި ވޮއްމުލީގެ ޖޯޒީ ނަންބަރު 55 މުހައްމަދު އަލީ އެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ދެގުރޫޕަކަށް ބަހާލައިގެންނެވެ.

ގްރޫޕް އޭގައި 04 ޓީމު ހިމެނޭއިރު ގްރޫޕް ބީގައި ހިމެނެނީ 03 ޓީމެވެ. ގުރޫޕް އޭގެ އެއްވަނަ އަދި ދެވަނަ ޓީމަށް މުބާރާތުގެ ސެމީ ފައިނަލުން ޖާގަލިބޭއިރު، ގްރޫޕް ބީ އިން ސެމީގެ އޮޓެމެޓިކް ޖާގައެއް ލިބޭނީ އެއްވަނަ ޓީމަށެވެ. އަދި ސެމީގެ ފަހު ޖާގަ ލިބޭނީ ގްރޫޕް ބީގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅުމަށްފަހު އެ މެޗުން މޮޅުވާ ޓީމަކަށެވެ.