ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ގްރޫޕް އޭގައި މިއަދު ހަވީރުގެ ކުޅެވުނު ދެވަނަ މެޗުގައި ކަނޑިންމަ އާއި ވެލާވަރު ވާދަކުރި މެޗު 6-1 ގެ ނަތީޖާއަކުން ކާމިޔާބުކޮށް ކަނޑިންމަ އިން ގުރޫޕް އޭ ގެ އެއްވަނައަށް ކުރިއަށް ޖެހިލައިފިއެވެ.

މެޗުގެ ފުރަތަަމަ ހާފުގައި ކަނޑިންމަ އިން ފަސް ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު ހަތަރުވަނަ މިނެޓުގައި ކާމިޔާބުކޮށްދިނީ އަކްރަމް އަހުމަދެވެ. އަދި އޭގެ އަށް މިނެޓުފަހުން އަކްރަމް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

ކަނޑިންމަ އިން މި މެޗުގައި ކާމިޔާބުކުރި ތިންވަނަ ލަނޑު ފުރަތަަމަ ހާފުގެ 14 ވަނަ މިނެޓުގައި އަބްދުލް މުގްސިތު ކާމިޔާބުކޮށްދިންއިރު ޖެހިގެންއައި މިނެޓުގައި އެޓީމުގެ ހަތަރުވަނަ ލަނޑު ކާމިޔާބުކޮށްދިނީ މުއާލިމް އުމަރު އެވެ. އަދި ފުރަތަމަ ހާފު ނިމެން ދެ މިނިޓަށްވެފައި ވަނިކޮށް އެޓީމުގެ ފަސްވަނަ ލަނޑު ކާމިޔާބުކޮށްދިނީ މުހައްމަދު އަޔާޒުއެވެ.

މި މެޗުގައި ވެލާވަރުން ކާމިޔާބުކުރި ހަމައެކަނި ލަނޑު ފުރަތަމަ ހާފުގެ 18 ވަނަ މިނެޓުގައި ކާމިޔާބުކޮށްދިނީ މުހައްމަދު ޝާއިން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 5-1 ގެ ނަތީޖާއަކުން ކަނޑިންމަ ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެލާވަރުން އެޓީމުގެ ކުޅުން ރަނގަޅުކޮށް ރަގަޅު ދިފާއީ ކުޅުމެއް ދެއްކި އިރު މި ހާފުގައި ކަނޑިންމަ އަށް ކާމިޔާބުކުރެވުނީ އެންމެ ލަނޑެކެވެ. މި ލަނޑު ދެވަނަ ހާފުގެ ހަތަރުވަނަ މިނެޓުގައި ކާމިޔާބުކޮށްދިނީ އަލީ ޝާމިއުއެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-1 ގެ ނަތީޖާއަކުން ކަނޑިންމަ ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ ކަނޑިންމަ ޓީމުގެ އަކްރަމް މުހައްމަދު އެވެ.

މި މެޗުން ލިބުނު ތިން ޕޮއިންޓާއެކު އެކު ދެ މެޗުން ހަ ޕޮއިންޓް ހަމަކޮށް ގުރޫޕް އޭގެ އެއްވަނައިގައި މިވަގުތު އޮތީ ކަނޑިންމަ އެވެ. ދެ މެޗުން ތިން ޕޮއިންޓާއެކު ލަނޑުގެ ތަފާތުން ދެވަނައިގައި މިވަގުތު އޮތީ  ވޮއްމުލި އެވެ. ތިންވަނައިގައި ދެ މެޗުން ތިން ޕޮއިންޓާއެކު ލަނޑުގެ ތަފާތުން އޮތީ ވެލާވަރު އެވެ. އަދި ކުޅުނު ދެ މެޗުން ބަލިވެ ގުރޫޕްގެ ފުލުގައި އޮތީ އިރުވެލި އެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ދެގުރޫޕަކަށް ބަހާލައިގެންނެވެ.

ގްރޫޕް އޭގައި 04 ޓީމު ހިމެނޭއިރު ގްރޫޕް ބީގައި ހިމެނެނީ 03 ޓީމެވެ. ގުރޫޕް އޭގެ އެއްވަނަ އަދި ދެވަނަ ޓީމަށް މުބާރާތުގެ ސެމީ ފައިނަލުން ޖާގަލިބޭއިރު، ގްރޫޕް ބީ އިން ސެމީގެ އޮޓެމެޓިކް ޖާގައެއް ލިބޭނީ އެއްވަނަ ޓީމަށެވެ. އަދި ސެމީގެ ފަހު ޖާގަ ލިބޭނީ ގްރޫޕް ބީގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅުމަށްފަހު އެ މެޗުން މޮޅުވާ ޓީމަކަށެވެ.