ޔުއެފާ ޔޫރޯ 2024 ކޮލިފައިންގައި މިރޭގެ ރަށުން ބޭރުގައި ޖިބްރޯލްޓާ އާއި ދެކޮޅަށް ކުޅުނު މެޗު 3-0 ގެ ނަތީޖާއަކުން ކާމިޔާބުކޮށް ގުރޫޕް ބީގެ އެއްވަނައިގައި ފުރާންސް އިން ތިން ޕޮއިންޓްގެ ލީޑެއް ނަގައިފިއެވެ.

ފީފާ ރޭންކިންގެ ދެވަނައިގައި މިވަގުތު އޮތް ފްރާންސް އާއި 201 ވަނައިގައި އޮތް ޖިބްރޯލްޓާ ވާދަކުރި މި މެޗުގެ ވަރަށް ކުރީކޮޅު ފުރާންސް އިން ވަނީ ލަނޑެއް ކާމިޔާބުކޮށް މެޗުގެ ލީޑުނަގާފައެވެ.

މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ ތަޖުރިބާކާރު ފޯވާޑް އޮލިވިއޭ ޖިރޫޑް އެވެ. މިއީ އެޓީމު ކިންގްސްލީ ކޯމަން އަރިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. ފުރަތަަމަ ހާފުގައި ލީޑު ފުޅާކުރުމަށް ފްރާންސްގެ ކޯމަން އާއި ޗުއަމެނީ އަށް ލިބުނު ފުރުސަތުތަކުގެ ބޭނުން ނުކުރެވުނު އިރު، 29 ވަނަ މިނެޓުގައި އެޓީމަށް ލިބުނު ކޯނަރަކުން ގޯލު ކުރިމައްޗަށް ހުރަސްކޮށްދިން ބޯޅައެއްގައި ރެއާލް މެޑްރިޑްގެ މިޑްފީލްޑަރު ޗުއަމެނީ ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގައި ފުރާންސް އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ކެޕްޓަން ކިލިއަން އެމްބާޕޭ އެވެ. މިއީ  ޖިބްރޯލްޓާ ގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ފްރާންސަށް ދިން ޕެނަލްޓީއެކެވެ. މިލަނޑާއެކު ފުރަތަަމަ ހާފުގައި ކުޅުން ނިމިގެންދިޔައީ 2-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ ފްރާންސް އިންނެވެ. ނަމަވެސް މިހާފުގައި އެޓީމަށް ލަނޑު ޖަހާނެ މާގިނަ ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. މި މެޗުގައި ފުރާންސް އިން ކާމިޔާބުކުރި ތިންވަނަ ލަނޑަކީ ދެވަނަ ހާފުގެ 78 ވަނަ މިނެޓުގައި ޖިބްރޯލްޓާގެ ޑިފެންޑަރު އައިމަން މުއަލްހީ ގެ ފައިގައި ޖެހިފައި ބައިކޮޅަށް ވަން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކޮލިފައިންގ ގްރޫޕް ބީގެ އެއްވަނައިގައި ކުޅުނު ތިން މެޗުން ލިބުނު 09 ޕޮއިންޓާއެކު މިވަގުތު އޮތީ ފްރާންސް އެވެ. މިގުރޫޕްގެ ދެވަނަގައި އޮތީ ކުޅުނު ދެ މެޗުން ލިބުނު 06 ޕޮއިންޓާއެކު ގްރީސް އެވެ. ތިންވަނައިގައި އޮތް ނެދަލޭންޑްސް ދެ މެޗު ކުޅެފައިވާއިރު އެޓީމަށް ލިބިފައިވަނީ 03 ޕޮއިންޓެވެ. މިގުރޫޕްގައި ދެން ހިމެނޭ ދެޓީމަކީ އަޔަލެންޑާއި ޖިބްރޯލްޓާއެވެ.

އަޔަލެންޑް ދެ މެޗު އަދި ޖިބްރޯލްޓާ ތިން މެޗު ކުޅެފައިވާއިރު މި ދެޓީމުންކުރެ ޓީމަކަށް އަދި އެއްވެސް ޕޮއިންޓެއް ނުލިބެއެވެ.