ޔުއެފާ ޔޫރޯ 2024 ކޮލިފައިންގ ގްރޫޕް ސީގައި މިރޭ ރަށުން ބޭރުގައި މޯލްޓާ އާއި ވާދަކުރި މެޗު 4-0 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނައިގައި އިގިރޭސިން ހަ ޕޮއިންޓްގެ ލީޑެއް ނަގައިފިއެވެ.

މިރޭގެ މެޗުގެ ފުރަތަަމަ ހާފުގެ ވަރަށް ކުރީކޮޅު އިގިރޭސިން ލަނޑެއް ކާމިޔާބުކޮށް މެޗުގެ ލީޑު ހޯދިއިރު، މި ލަނޑަކީ މެޗުގެ އަށްވަނަ މިނެޓްގައި އިގިރޭސި ފޯވާޑް ބުކަޔޯ ސަކާ މޯލްޓާގެ ގޯލު ކުރިމައްޗަށް ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި އެޓީމުގެ ފާޑިނަންޑޯ އަޕަޕް ފައިގައި ޖެހިފައި ބައިކޮޅަށް ވަން ލަނޑެކެވެ.

މި މެޗުގައި އިގިރޭސިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 28 ވަނަ މިނެޓުގައި ކާމިޔާބުކޮށްދިނީ ޑިފެންޑަރު އެލެގްޒެންޑަރ އާނޯލްޑް އެވެ. މިއީ މޯލްޓާގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

އިގިރޭސިން ދެ ލަނޑުގެ ލީޑެއް ނެގިތާ ތިން މިނެޓު ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ ކެޕްޓަން ހެރީ ކޭން އެވެ. މިއީ މޯލްޓާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ދިން ޕެނަލްޓީއެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އިގިރޭސިން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ އިގިރޭސިން ނެވެ. ނަމަވެސް މިހާފުގައި އެޓީމަށް ލަނޑު ޖަހާނެ މާރަގަޅު ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. އަދި މި މެޗުގައި އެޓީމުން ކާމިޔާބުކުރި ހަތަރުވަނަ ލަނޑަކީ ދެވަަނަ ހާފުގެ 83 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކުރި ލަނޑެކެވެ.

މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް  ނިއުކާސަލް ޔުނައިޓެޑްގެ ފޯވާޑް ވިލްސަން އެވެ. މިއާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން އިގިރޭސިން ކުރީގައި އޮވެގެންނެވެ.

މިރޭ ކުޅެވުނު ޔޫރޯ ކޮލިފައިންގ އިތުރު މެޗުތަކުގެ ނަތީޖާތަކަށް ބަލާއިރު، ސްލޮވޭނިއާ އާއި ފިންލޭންޑް ވާދަކުރި މެޗު 2-0 ގެ ނަތީޖާއަކުން ކާމިޔާބުކުރީ ފިންލޭންޑެވެ. އެންޑޯރާ އާއި ސްވިޒަލޭންޑް ވާދަކުރި މެޗު 2-1 ނަތީޖާއަކުން ސްވިޒަލޭންޑް މޮޅުވިއިރު، ކޮސޯވޯ އާއި ރޫމޭނިއާ ވާދަކުރި މެޗު ނިމުނީ ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެގެންނެވެ.

މީގެ އިތުރުން ގްރީސް އާއި އަޔަލެންޑް ވާދަކުރި މެޗު 2-1 ގެ ނަތީޖާއަކުން ކާމިޔާބުކުރީ ގްރީސް އެވެ. ލެޓްވިއާ އާއި ތުރުކީ ވާދަކުރި މެޗު 3-2 ގެ ނަތީޖާއަކުން ތުރުކީ ކާމިޔާބުކުރިއިރު، ޔުކްރެއިން އާއި ނޯތު މެސެޑޯނިއާ ވާދަކުރި މެޗު 3-2 ގެ ނަތީޖާއަކުން ކާމިޔާބުކުރީ ޔުކްރެއިން އެވެ. އަދި ސަންމަރީނޯ އާއި ކަޒަކިސްތާން ވާދަކުރި މެޗު 3-0 ގެ ނަތީޖާއަކުން ކަޒަކިސްތާން ކާމިޔާބުކުރިއިރު، ވޭލްސް އާއި އަރުމީނިއާ ވާދަކުރި މެޗު 4-2 ގެ ނަތީޖާއަކުން ކާމިޔާބުކުރީ އަރުމީނިއާ އެވެ.