އިންޑިއާގެ އެފްކޮންސް ކުންފުންޏާއި ހަވާލު ކޮށްގެން ތަރައްގީ ކުރަމުންދާ ތިލަމާލެ ބްރިޖްގެ މަސައްކަތުގައި އުޅުނު މުވައްޒަފަކަށް ފަރުވާ ނުލިބިގެން ނިޔާ ވެއްޖެއެވެ.

އެގޮތުން މި މަޝްރޫއުގެ މަސައްކަތުގައި އުޅުއްވާ އޮފިޝަލަކު 'ވޮއިސް' އަށް މައުލޫމާތު ދެއްވަމުން ވިދާޅުވީ އެ މީހާ ވަރަށް ބޮޑަށް ހުން އައިސްގެން ފަރުވާއަށް އެދުންތާ 10 ދުވަސް ވަފައިވާ ކަމަށެވެ.

އެހެންނަމަވެސް ފަރުވާއަށް އެދުމުންވެސް ފަރުވާ ނުލިބުމުން ހިފައްޓަމުން އައިސްފައިވަނީ ޕެނަޑޯލް ގުޅަ ކައިގެން ކަމަށެވެ.

Advertisement

މިހާލަތުގައި އުޅެމުން އައިސް މުވައްޒަފު މީހާ ނިޔާވެފައިވަނީ އިއްޔެގެ ވަގުތެއްގައެވެ.

މި ހާދިސާގެ ސަބަބުން މަސައްކަތުގެ ސައިޓްގައި ހިތްހަމަ ނުޖެހި މުވައްޒަފުން ދަނީ އިހްތިޖާޖު ކުރަމުންނެވެ. އެގޮތުން ހިތްހަމަ ނުޖެހުމުގެ ތެރެއިން މަޝްރޫއުގެ މެނޭޖަރުގެ ބޯވެސް ފަޅާލައިފާވާ ކަމަށް ވެސް މައުލޫމާތު ލިބެއެވެ.

މީގެ ކުރިން އައްޑޫގެ ސިޓީގެ މަގުތައް ތަރައްގީ ކުރުމުގައި މަސައްކަތްކުރި އެފްކޮންސް މުވައްޒަފުންނަށް މުސާރައާއި ކާނާއާއި ބޭސް ފަރުވާ ނުދިނުމުގެ މައްސަލަވެސް ފެންމަތި ވިއެވެ.

އަދި މިކަމުގެ ސަބަބުން މުވައްޒަފުން އިހްތިޖާޖު ކުރުމުން މި މުވައްޒަފުންނަށް އަނިޔާ ކުރާނެ ކަމަށް ބުނެ އިންޒާރު ދިނުމުން ފުލުހުންނާއި ހަމައަށް މުވައްޒަފުން ވަނީ މައްސަލަ ގެންގޮސްފައެވެ.

އެފޮކޮންސްގެ އިތުރުންވެސް ރާއްޖޭގެ އެތައް ތަރައްގީގެ މަޝްރޫއުތައް ހަވާލު ކޮށްފައިވާ އިންޑިއާ ކުންފުނިތަކުން މުވައްޒަފުންނަށް މުސާރަ ނުދިނުމާއި ކާން ނުދިނުމާއި ބޭސް ފަރުވާ ނުލިބުމުގެ މައްސަލަތައް ދަނީ އިތުރު ވަމުންނެވެ.

އެގޮތުން އިންޑިއާގެ ޖޭއެމްސީ ކުންފުނީގެ މުވައްޒަފުންވެސް ވަނީ މިކަމުގެ ސަބަބުން މާލޭގައި ހުންނަ އިންޑިއަން ހައި ކޮމިޝަން ކުރިމަތީގައި އިހްތިޖާޖު ކޮށްފައެވެ.