ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ގްރޫޕް ބީގައި މިއަދު ހަވީރުގެ ކުޅެވުނު މެޗުގައި ވިލުރީފް އާއި ނިޔާމަ ވާދަކުރި މެޗު 7-0 ގެ ނަތީޖާއަކުން ކާމިޔާބުކޮށް  ނިޔާމަ އިން ގުރޫޕް ބީ ގެ އެއްވަނައަށް ކުރިއަށް ޖެހިލައިފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފުރަތަަމަ ހާފުގައި ނިޔާމަ އިން މެޗުގެ ލީޑު ނެގީ ފުރަތަމަ ހާފުގެ 12 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޙުސައިން ޝާރިޤު އެވެ. މިއީ އެޓީމުގެ އަބްދުﷲ ރަމްޒީ މުޅިން ހުސްކޮށްލާފައި ޖައްސާލި ބޯޅައެއް ވިލުރީފު ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ނިޔާމަ އިން ކާމިޔާބުކުރި ދެވަނަ އޭގެ ތިން މިނެޓު ފަހުން ކާމިޔާބުކޮށްދިނީ ވެސް ޙުސައިން ޝާރިޤު އެވެ. މިއީ ވެސް އެޓީމުގެ އަބްދުﷲ ރަމްޒީ ތަނަވަސްކޮށްދިން ފުރުސަތެއްގައި ވިލުރީފްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ނިޔާމަ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ނިޔާމަ އިން އިތުރު ފަސް ލަނޑު ކާމިޔާބުކުރިއިރު، ދެވަނަ ހާފުގެ ފުރަތަަމަ ދެމިނެޓުތެރޭގައި އެޓީމުން ވަނީ ދެލަނޑު ކާމިޔާބުކޮށްފަ އެވެ. އެގޮތުން އެޓީމުގެ ތިންވަނަ ލަނޑު ދެވަނަ ހާފުގެ ފެށިގެން ފުރަތަަމަ މިނެޓުގައި އިބްރާހިމް ސައިފް ކާމިޔާބުކޮށްދިންއިރު، އެޓީމުގެ ހަތަރުވަނަ ލަނޑު ފަހުހާފުގެ 24 ވަނަ މިނެޓުގައި ކާމިޔާބުކޮށްދިނީ ފަވާޒު ޔޫސުފް އެވެ.

ނިޔާމަ މި މެޗުގައި ކާމިޔާބުކުރި ފަސްވަނަ ލަނޑު ފަހުހާފުގެ 31 ވަނަ މިނެޓުގައި އަބްދުﷲ ރަމްޒީ ކާމިޔާބުކޮށްދިންއިރު، މިއީ ވިލުރީފު ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި އެޓީމުގެ ކީއްޕަރު ކައިރިން ނައްޓާލުމަށް ފަހު ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ތިން މިނެޓު ފަހުން އެޓީމުގެ ހަވަނަ ލަނޑު ވެސް ކާމިޔާބުކޮށްދިނީ ރަމްޒީ އެވެ.

މިއީ އެޓީމުގެ ކެޕްޓަން މުޅިން ހުސްކޮށްލާފައި ޖައްސާލި ބޯޅައެއް ވިލުރީފު ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ފޮނުވާލި ބޯޅަ ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. 

މިމެޗުގައި ނިޔާމަ އިން ކާމިޔާބުކުރި ހަތްވަނަ ލަނޑަކީ މެޗުގެ އެންމެ ފަހު މިނެޓްގައި ވިލުރީފުގެ ކީއްޕަރު އަހުމަދު ޖަޒުލާން އަތުން ބައިކޮޅަށް ވަން ލަނޑެކެވެ.

މި މެޗުގެ މޭން އޮފް ދަ މެޗަކަށް ހޮވުނީ ނިޔާމަ ޓީމުގެ ޖޯޒީ ނަންބަރު 07 އަބްދުﷲ ރަމްޒީ އެވެ. އޭނާ ވަނީ މި މެޗުގައި ދެ ލަނޑު ކާމިޔާބުކުރުމުގެ އިތުރުން އިތުރު ދެލަނޑު ޖެހުމަށް ފުރުސަތު ތަނަވަސްކޮށްދީފައެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ދެގުރޫޕަކަށް ބަހާލައިގެންނެވެ.

ގްރޫޕް އޭގައި 04 ޓީމު ހިމެނޭއިރު ގްރޫޕް ބީގައި ހިމެނެނީ 03 ޓީމެވެ. ގުރޫޕް އޭގެ އެއްވަނަ އަދި ދެވަނަ ޓީމަށް މުބާރާތުގެ ސެމީ ފައިނަލުން ޖާގަލިބޭއިރު، ގްރޫޕް ބީ އިން ސެމީގެ އޮޓެމެޓިކް ޖާގައެއް ލިބޭނީ އެއްވަނަ ޓީމަށެވެ. އަދި ސެމީގެ ފަހު ޖާގަ ލިބޭނީ ގްރޫޕް ބީގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅުމަށްފަހު އެ މެޗުން މޮޅުވާ ޓީމަކަށެވެ