މީގެ 18 އަހަރު ކުރިންވެސް އަދި މިހާރުވެސް، ޕާޓީ އުފައްދަން ދަތިވީ ރައީސުލްޖުމްހޫރިއްޔާގެ ނުފޫޒު އޮތުމުން ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ. 

ކުރީގެ ރައީސް މުހައްމަދު ނަޝީދުގެ ވަފާތެރިން އުފެއްދުމަށް މަސައްކަތް ކުރަމުން އަންނަ ދަ ޑިމޮކްރެޓްސް ޕާޓީ ރަޖިސްޓްރީ ކުރުމުގެ ހުއްދަ އަދި ހުއްދަ ނުދޭން އިލެކްޝަންސް ކޮމިޝަނުން އިއްޔެ ވަނީ ނިންމާފައެވެ. 

އެކަމާއި ގުޅިގެން މީގެ 18 އަހަރު ކުރިން އެމްޑީޕީ އުފައްދަން ކުރި މަސައްކަތުގެ ތެރެއިން އެޕާޓީގެ އިސް ފަރާތްތަށް މިނިސްޓްރީ އަކަށް ވަޑައިގެން ތިއްބެވި ފޮޓޯ އަކާއި، މިހާރު 'ދަ ޑިމޮކްރެޓްސް' އުފައްދަން ހުއްދަ ނުލިބިގެން އެޕާޓީގެ އިސް ފަރާތްތައް އިލެކްޝަންސް ކޮމިޝަނަށް ވަޑައިގެން ތިއްބެވި ފޮޓޯ ހިއްސާ ކުރައްވަމުން ވައްޑެ ކުރެއްވި ޓުވީޓެއްގައި ވިދާޅުވީ، މީގެ 18 އަހަރު ކުރިންވެސް ޕާޓީ އުފައްދަން މިނިސްޓްރީއަކުން ހުއްދަ ހޯދަން އުނދަގޫވީވެސް ރައީސުލްޖުމްހޫރިއްޔާގެ ނުފޫޒު އޮތުމުން ކަމަށެވެ. 

Advertisement

އަދި މިހާރު މިނިވަން މުސްތަޤިއްލު އިލެކްޝަން ކޮމިޝަނުން ހުއްދަ ދޫކުރަން ދަތިކުރަނީވެސް ހަމަ ރައީސުލްޖުމްހޫރިއްޔާގެ ނުފޫޒުން ކަމަށް ވައްޑެ ވިދާޅުވި އެވެ.

އިލެކްޝަންސް ކޮމިޝަންގެ ބައްދަލުވުމުގައި ޑިމޮކްރެޓްސް ޕާޓީ ރަޖިސްޓްރީ ކުރުމުގެ ހުއްދަ ދިނުމާއި ގުޅޭ ގޮތުން ނެގި ވޯޓްގައި އެޕާޓީ ރަޖިސްޓްރީ ކުރުމުގެ ހުއްދަ ދޭން ވޯޓް ދިނީ ދެމެންބަރުން ކަމަށާއި، ދެމެންބަރަކު ވޯޓް ދިނީ ރަޖިސްޓްރީ ކުރުމުގެ ހުއްދަ ދޭން ނުފެންނަ ކަމަށް ކަމަށް އެ ކޮމިޝަންގެ ރައީސް ފުއާދު ތައުފީގު ވަނީ ވިދާޅުވެފަ އެވެ. 

އަދި ޕާޓީ އުފެއްދުމުގެ ވޯޓު ނުދިން މެންބަރުން ބުނަމުން އަންނަނީ ހުއްދަ ދިނުމުގެ މުއްދަތަކީ 3 މަސް ދުވަސް ކަމަށާ، ބަލަންޖެހޭ އިތުރު ކަންކަން ހުރި ކަމަށް ކަމަށްވެސް ފުއާދު ވިދާޅުވި އެވެ.