​ސްކޫލްތަކުގެ ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމްކުރި ހެލްޕްލައިން 1484 ގެ ޚިދުމަތް މިހާރު ލިބޭނެކަމަށް އެޑިޔުކޭޝަން މިނިސްޓްރީން ވިދާޅުވެއްޖެއެވެ.

މިފަދަ ހެލްޕްލައިނެއް ޤާއިމުކުރުމުގެ މައިގަނޑު މަޤްޞަދަކީ ކޮންމެ ކުއްޖަކަށްވެސް ނަފްސާނީ ދުޅަހެޔޮކަމާއި، ނަފްސާނީ ގޮތުން ލިބިދޭން ޖެހޭ އެހީތެރިކަން ލިބޭނެ އިންތިޒާމު ރަސްމީ ނިޒާމެއްގެ ތެރެއިން ހަމަޖެއްސުން ކަމަށާއި އަދި ސްކޫލް ކައުންސެލިންގެ ޚިދުމަތް ހަރުދަނާކޮށް، ރާއްޖޭގެ އެކި ކަންކޮޅުތަކުގައި ކިޔަވާ ދަރިވަރުންނަށް ސައިކޮލޮޖިކަލް ސަޕޯޓް ފޯރުކޮށްދިނުމުގައި މިހާރު ތިބި ކައުންސެލަރުން ބޭނުންކުރުން ކަމަށް އެޑިޔުކޭޝަން މިނިސްޓްރީ އިން ބުނެފައިވެއެވެ.

ހަމައެހެންމެ އިތުރު ފަރުވާ އަށް ބޭނުންވާ ކުދިންގެ ޢަދަދު މަދުކޮށް، އެހީތެރިކަން ފޯރުކޮށްދިނުމާއި، އަވަހަށް ފަރުވާހޯދުމަށް މަގުފަހިކޮށްދީ ސްކޫލް ފެންވަރުގައި އެހީތެރިކަން ފޯރުކޮށްދެވޭނެ ދަރިވަރުން ދެނެގަނެ އެދަރިވަރުންނަށް ބޭނުންވާ އެހީފޯރުކޮށްދިނުން ކަމަށް އެޑިޔުކޭޝަން މިނިސްޓްރީން ވިދާޅުވެއެވެ.

މި ހެލްޕްލައިން ބޭނުންކުރާނީ ހަމައެކަނި ދަރިވަރުންނަށް ނަފްސާނީ ފުރަތަމަ އެހީ ދިނުމަށް ކަމަށާއި ބޭސްފަރުވާއަށް ބޭނުންވާ ކުއްލި ޙާލަތްތަކުގައި މި ހެލްޕްލައިން ބޭނުން ނުކުރާނެކަމަށް އެޑިޔުކޭޝަން މިނިސްޓްރީން ވިދާޅުވެއެވެ. 1484 ހެލްޕްލައިންގެ ޚިދުމަތް ހުކުރު ދުވަސް ފިޔަވައި ކޮންމެ ދުވަހެއްގެ 15:00 އިން 21:00 އަށް ލިބޭނެއެވެ.

މިއީ ރާއްޖޭގެ ސްކޫލް މަދަރުސާތަކުގެ ދަރިވަރުންނަށް ނަފްސާނީ އެހީތެރިކަން ފޯރުކޮށްދިނުމަށް ޤާއިމްކުރެވުނު މިފަދަ ފުރަތަމަ ހެލްޕްލައިނެވެ.

ސްކޫލް މަދަރުސާތަކުގެ ދަރިވަރުންނަށް މި ހެލްޕްލައިން މެދުވެރިކޮށް ނަފްސާނީ ފުރަތަމަ އެހީ ފޯރުކޮށްދެއްވުމުގެ މަސައްކަތް ކުރައްވާނީ އެކަމަށްޓަކައި ޚާއްޞަކޮށް ތަމްރީން ދެެއްވާފައިވާ ސްކޫލްތަކުގައި މިހާރު ތިއްބެވި ކައުންސިލަރުން ކަމަށާއި މި ހެލްޕްލައިނުން ރާއްޖޭގެ ހުރިހާ ކަންކޮޅެއްގައި ތިބި ސްކޫލް މަދަރުސާތަކުގެ ދަރިވަރުންނަށް ޚިދުމަތް ހޯދޭނެ ކަމަށް އެޑިޔުކޭޝަނުން ބުނެފައިވެއެވެ.

މި ހެލްޕްލައިނަކީ ޑަބްލިއުއެޗްއޯއާއި ޔުނިސެފްގެ އެހީތެރިކަމާއެކު ދަރިވަރުންނަށް ޚާއްސަކޮށްގެން ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމުކުރި ހެލްޕްލައިނެކެވެ. މި ހެލްޕްލައިން އިފްތިތާޙްކޮށްދެއްވީ މިމަހުގެ 13 ވަނަ ދުވަހު ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ.