ޕްރޮސިކިޔުޓަރ ޖެނެރަލްގެ އޮފީހުގެ މުވައްޒަފުން ތަޖުރިބާއަކަށް ހަތަރު ދުވަހު އޮފީހަށް ނުކުންނަން ނިންމައިފިއެވެ.

ޕީޖީ މުވައްޒަފުން ހަފްތާއަކު ހަތަރު ދުވަހު އޮފީހަށް ނުކުންނަން މި ހަމަޖެއްސީ ހަފްތާއަކު ހަތަރު ދުވަހު އޮފީހަށް ނުކުމެ މަސައްކަތް ކުރުމުން ނެރެވޭ ނަތީޖާ ތަޖުރިބާ ކުރުމަށެވެ.

ޕްރޮސިކިއުޓާ ޖެނެރަލް ހުސައިން ޝަމީމް މިގޮތަށް ކަނޑައަޅުއްވައި ހަމަޖައްސަވާފައި ވަނީ އަންނަ ހަފްތާއިން ފެށިގެން އޮގަސްޓް މަހުގެ ހަތަރު ވަނަ ދުވަހާ ހަމަޔަށް ހަފްތާއަކު ހަތަރު ދުވަހު ޕީޖީ އޮފީހުގެ މުވައްޒަފުން އޮފީހަށް ނުކުމެ މަސައްކަތްކުރާ ގޮތަށެވެ.

Advertisement

މިގޮތަށް ހަމަޖެއްސިޔަސް ހަފްތާގެ ރަސްމީ ފަސް ދުވަހު ވެސް ޕީޖީ އޮފީހުންދޭ ޚިދްމަތްތައް މިހާރު ވެސް ލިބޭ އުސޫލުން ލިބެމުންދާނެ އެވެ.

އަލަށް މިކަނޑައެޅި އުސޫލުން މަސައްކަތްތައް ކުރިއަށް ދާއިރު ހަފްތާގެ ފަސް ދުވަހުގެ ތެރެއިން އެއް ދުވަހު މުވައްޒަފު އޮފީހަށް ނުކުމެ މަސައްކަތް ކުރަން ނުޖެހޭ ގޮތަށް ހަމަޖައްސާނެއެވެ.

މިގޮތަށް އޮފީހަށް ނުކުމެ މަސައްކަތް ނުކުރާ ދުވަސް އޮފީހުގެ މަސައްކަތްތަކަށް ހުރަސް ނޭޅޭ ގޮތަށް މުވައްޒަފުންގެ މެދުގައި ބަހާލާނެއެވެ.

ގޭގައި މަސައްކަތްކުރާ ދުވަސްތަކުގައި ވެސް ޕްރޮސިކިއުޓަރުން ކޯޓަށް ދާން ޖެހުން ފަދަ، އޮފީހަށް ނުކުމެ މަސައްކަތްކުރަންޖެހޭ ފަދަ މަސައްކަތެއް އޮތް ނަމަ އޮފީހަށް ނުކުމެ މަސައްކަތް ކުރާނެ ކަމަށާއި، އެހެން ދިމާވާ ދުވަހަކު އޮފީހަށް ނުކުމެ އެ ކުރަން ޖެހުނު މަސައްކަތެއް ކުރުމުން މަސައްކަތް ފުރިހަމަވީ ކަމުގައި ބަލައި  ގަޑި ނުޖެހޭ ދުވަހެއް ގޮތުގައި ވެސް ބަލާނެއެވެ.

މި މުއްދަތުގައި މުވައްޒަފު ސަލާމް ނުވަތަ އާއިލީ ޒިންމާގެ ޗުއްޓީއެއް ނެގިޔަސް ޖެހިގެން އަންނަ ހަފްތާގައި އާންމު އުސޫލުން ފަސް ދުވަހު އޮފީހަށް ނުކުމެ މަސައްކަތްކުރަން ޖެހެއެވެ.

ހަފްތާއަކު ހަތަރު ދުވަހު އޮފީހަށް ނުކުމެ މަސައްކަތްކުރުމުގެ ނަތީޖާ ތަޖުރިބާ ކުރުމުގެ މުއްދަތުގައި ހުރިހާ މުވައްޒަފުންގެ ވެސް ޕާފޯމަންސް ބަލަމުން ގެންދާނެ އެވެ. މަސައްކަތު ހަތަރު ދުވަހުގެ ގޮތުގައި ދާއިމީކޮށް ހަމަޖައްސާނީ ނަތީޖާ ރަނގަޅު ނަމަ އެވެ. އެހެން ނޫން ނަމަ ހަމަ އާންމު އުސޫލުން ހަފްތާއަކު ފަސް ދުވަހު ވެސް އޮފީހަށް ނުކުމެ މަސައްކަތްކުރަން ފަށާނެ އެވެ.

މިދިޔަ ރޯދަމަހު ވެސް ޕީޖީ އޮފީހުން މަސައްކަތްކުރީ ހަފްތާއަކު ހަތަރު ދުވަހު އޮފީހަށް ނުކުމެގެންނެވެ. އެ އޮފީހުން ބުނެފައިވަނީ އެއީ މިގޮތަށް މަސައްކަތްކުރުމުގެ ތަޖުރިބާގެ ފުރަތަމަ މަރުހަލާ ކަމަށާއި އެ ތަޖުރިބާގެ ނަތީޖާ ރަނގަޅު ކަމަށެވެ.