ދަ ޑިމޮކްރެޓްސްގެ މެންބަރޝިޕް ފޯމުތައް ފަށްފަށްކޮށް، ތަކުރާރުކޮށް ބަލާންޖެހޭ ކަމަށް އިލެކްޝަންސް ކޮމިޝަންގެ މެންބަރު ޢަލީ ނަޝާތާއި، މުޙައްމަދު ޢާސިފް ކުރައްވާ ވަކާލާތުގެ ފަހަތުގައިވަނީ ޒާތީ ތަޢައްސުބާއި ރައީސް އިބްރާހިމް މުޙައްމަދް ޞާލިޙްގެ ނުފޫޒު ކަމަށް ދަ ޑިމޮކްރެޓްސް އިން ބުނެފިއެވެ.

ދަ ޑިމޮކްރެޓްސް އިން މިހެން ބުނެފައިވަނީ އެޕާޓީ އުފެއްދުމުގެ ހުއްދަ ނުދީ ދިގުދަންމާ މައްސަލައިގައި އެޕާޓީއިން ނެރުނު ނޫސްބަޔާނެއް ގައެވެ.

"ކަނޑައެޅި ބަޔާންކޮށްފައިވާ ހަމަތަކުގެ ބޭރުން، އިތުރު ޗެކްތަކާއި، ވެރިފިކޭޝަން ޕްރޮސެސްތައް އުފަންކޮށްގެން ދަ ޑިމޮކްރެޓްސްގެ މެންބަރޝިޕް ފޯމުތައް ފަށްފަށްކޮށް، ތަކުރާރުކޮށް ބަލާންޖެހޭ ކަމަށް އިލެކްޝަންސް ކޮމިޝަންގެ މެންބަރު ޢަލީ ނަޝާތާއި، މުޙައްމަދު ޢާސިފް ކުރައްވާ ވަކާލާތުގެ ފަހަތުގައިވަނީ ޒާތީ ތަޢައްސުބު  އަދި ރައީސް އިބްރާހިމް މުޙައްމަދު ޞާލިޙުގެ ސީދާ ނުފޫޒާއި ނަހަމަ ބާރު" އެ ޕާޓީގެ ނޫސްބަޔާނުގައި ވެއެވެ.

Advertisement

އެޕާޓީގެ ނޫސް ބަޔާނުގައި ބުނެފައިވަނީ ދަ ޑިމޮކްރެޓްސް އުފެއްދުމުގެ ހުއްދަ ނުދީ ތިން މަސް ދުވަހަށް ދިގުދަންމާން އިލެކްޝަންސް ކޮމިޝަންގެ ދެމެންބަރުން ސަރުކާރާ ގުޅިގެން ކުރަމުން ގެންދާ މަސައްކަތާމެދު ކަންބޮޑުވުން ފައުޅުކޮށް، އެކަން ކުށްވެރިކުރާކަމަށެވެ.

އަދި ޕާސްޕޯޓް ސައިޒުގެ ފޮޓޯއާއި، މަންމަގެ ވަނަވަރު ހިމެނޭހެން މީގެކުރިން ސިޔާސީ ޕާޓީއެއް އުފެއްދުމުގައި ނެތްފަދަ އައު، ހަރުކަށި ޝަރުތުތަކެއް ފުރިހަމަކުރުމަށްފަހު ސިޔާސީ ޕާޓީތަކާބެހޭ ޤާނޫނުގައި ޝަރުތުކުރާ 3000 މެންބަރުން ހަމަކޮށް އެޕާޓީއިން އިލެކްޝަންސް ކޮމިޝަނަށް ހުށަހެޅީ 1 ޖޫން 2023 ގައި ކަމަށެވެ.

އެފޯމުތަކުގެ ސައްޙަކަން ކަށަވަރުކުރުމަށް ރެންޑަމްކޮށް ހޮވި ފަރާތްތަކަށް ގުޅައިގެންނާއި، އިލެކްޝަންސް ކޮމިޝަންގެ ޑޭޓާބޭސްއާ އަޅާކިޔައިގެން އެކޮމިޝަންގެ މުވައްޒަފުން ކުރި މަސައްކަތް 18 ޖޫން 2023 ވީ އާދިއްތަ ދުވަހުގެ ނިޔަލަށް ފުރިހަމަކޮށް، ނިންމާފައި ވާކަމަށް އެބަޔާނުގައި ބުނެފައިވެއެވެ.

މިއާއެކު އެފޯމުތަކުގެ ސައްޙަކަން "ޝައްކެއް ވަސްވާހެއް ނެތް މިންވަރަށް" ކަށަވަރުކުރެވިފައިވާ ކަމަށް ކޮމިޝަންގެ ރައީސް ފުއާދް ތައުފީޤް ވިދާޅުވެފައި ވާކަަމަށާއި، އިލެކްޝަންސް ކޮމިޝަންގެ އަމީން ޢާންމު ޙަސަން ޒަކަރިއްޔާވެސް ތަކުރާރުކޮށް މިކަން ފާހަގަކުރައްވާފައި ވާކަމަށް އެޕާޓީގެ ނޫސްބަޔާނުގައި ބުނެފައިވެއެވެ.

މީގެ އިތުރުން ސުލްޙަވެރި ސިޔާސީ ހަރަކާތް ހިންގުމަކީ ދިވެހި ރައްޔިތުންނަށް ޤާނޫނުއަސާސީއިން ކަށަވަރުކޮށްދޭ އަސާސީ ޙައްޤެއްކަމަށް ވީހިނދު، އަމުދުން ރިޔާސީ އިންތިޚާބު ބޯމަތިވެފައިވާ މިދަނޑިވަޅު ދިވެހި ރައްޔިތުންގެ ސިޔާސީ އުންމީދުތަކާއި މަސައްކަތްތަކާއި ޙައްޤުތަކާ ސީދާ ގުޅިފައިވާ ދަ ޑިމޮކްރެޓްސް އުފެއްދިޔަ ނުދީ ހިފަހައްޓަމުންދަނީ ކޮންމެ ގޮތަކުންވެސް ރައީސް އިބްރާހިމް މުޙައްމަދު ޞާލިޙްގެ ޚުދުމުޚްތާރު ވެރިކަން ދެމެހެއްޓުމަށް ޖަހާ މަރު ފައްޔެއް ކަމަށް އެނޫސްބަޔާނުގައި ބުނެފައިވެއެވެ.

"ދަ ޑިމޮކްރެޓްސް އިން ގޮވާލަނީ މިހިނދުން މިހިނދަށް މިޕާޓީ ރެޖިސްޓަރކުރުމަށް ބާއްވަން ޤާނޫނު ލާޒިމުކުރާ ޖަލްސާ ބޭއްވުމުގެ ހުއްދަ، އިތުރު ޢުޒުރާއި، ހާސަރާ ނުލާ އިލެކްޝަންސް ކޮމިޝަނުން ދިނުން" އެ ޕާޓީ އިން ނެރެފައިވާ ނޫސް ބަޔާނުގައި ވެއެވެ.

އަދި ސަރުކާރު ރުހުނަސް އަދި ނުރުހުނަސް ކުރިއަށް އޮތް ރިޔާސީ އިންތިޚާބުގައި މިޕާޓީގެ ފަރާތުން ކެންޑިޑޭޓަކު ވާދަކޮށް، ރައީސް އިބްރާހިމް މުޙައްމަދު ޞާލިޙްގެ އަނިޔާވެރި ވައްކަމާއި ފަސާދައިގެ ވެރިކަން މާތް ޢަމުރާއި އިރާދަފުޅުން ނިމުމަކަށް ގެންނާނެކަމުގެ ޔަޤީންކަން ދިވެހި ރައްޔިތުންނަށް އަރުވާކަމަށް އެ ބަޔާނުގައިވެއެވެ.

މިމައްސަލާގައި އެޕާޓީގެ މެމްބަރުން އިއްޔެ އީސީ އަށް ގޮސް އެތަނުގައި ގިނަ ވަގުތު ތަކެއް ވަނީ ހޭދަކޮށްފައެވެ.