ފީފާ ރޭންކިންގެ 149 ވަނައިގައި އޮތް އިންޑޮނޭޝިޔާ އާއި ދެކޮޅަށް ދުނިޔޭގެ ޗެމްޕިއަން އާޖެންޓީނާ ކުޅުނު މެޗު 2-0 ގެ ނަތީޖާއަކުން އާޖެންޓީނާ ކާމިޔާބުކޮއްފިއެވެ. މި މެޗުގައި އާޖެންޓީނާގެ މުހިންމު ބައެއް ކުޅުންތެރިން ކުޅެފައި ނުވާއިރު އޭގެތެރޭގައި އެޓީމުގެ ކެޕްޓަން ލިއޮނަލް މެސީ ވެސް ހިމެނެއެވެ.

އިންޑޮނޭޝިޔާގެ ވެރިރަށް ޖަކާޓާގައި މިރޭގެ ކުޅެވުނު މި މެޗުގެ ފުރަތަަމަ ހާފުގައި އާޖެންޓީނާ އިން ގިނަވަގުތު ބޯޅަ ހިފަހައްޓައިގެން މޮޅަށް ކުޅުނު އިރު، މިހާފުގައި އެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން ފުރަތަަމަ ހާފުގެ 18 ވަނަ މިނެޓުގައި އެޓީމުގެ ޒުވާން ފޯވާޑް ޖޫލިއަން އަލްވަރޭޒް އިންޑޮނީޝިއާގެ ދެ ކުޅުންތެރިން ކައިރިން ނައްޓާލުމަށް ފަހު ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބާރު ހަމަލާ އިންޑޮނޭޝިޔާގެ ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

Advertisement

މީގެއިތުރުން ވެސް ފުރަތަަމަ ހާފުގައި އަލްވަރޭޒް އަށް ވަނީ ލަނޑު ޖަހާނެ ރަގަޅު ހުސް ދެ ފުރުސަތެއް ލިބި ބޭނުން ނުކުރެވިފައެވެ.

މި މެޗުގައި އާޖެންޓީނާ އިން ކާމިޔާބުކުރި ފުރަތަަމަ ލަނޑު ފުރަތަމަ ހާފުގެ 38 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ލިއަންޑްރޯ ޕެރެޑެސް އެވެ. މިއީ އެޓީމުގެ މިޑްފިލްޑަރު ޕަލާސިއޯސް ތަނަވަސްކޮށްދިން ފުރުސަތެއްގައި ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ މަތީ ކަނަށް އަމާޒުކޮށްލައިގެ އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފު ނިމުމުގެ ކުރިން މެޗުގެ ނަތީޖާ އެއްވަރު ކުރުމަށް އިންޑޮނޭޝިޔާގެ މިޑްފީލްޑަރު އިވާރް ޖެނަރ ލިބުނު ހުސް ފުރުސަތުގައި އޭނާ ފޮނުވާލި ބޯޅަ އާޖެންޓީނާގެ ކީއްޕަރު މަޓިނޭޒް ވަނީ ފަސޭހަކަމާއި އެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ އާޖެންޓީނާ އިންނެވެ. ނަމަވެސް އެޓީމުގެ އެޓޭކުތައް ހުއްޓުވުމުގައި އިންޑޮނޭޝިޔާގެ ކުޅުންތެރިން މިހާފުގައި ވަނީ ރަގަޅު ޑިފެންސިވް ކުޅުމެއް ދައްކައިފައެވެ.

މި މެޗުގައި އާޖެންޓީނާ އިން ކާމިޔާބުކުރި ދެވަނަ ލަނޑު ފަހުހާފުގެ 55 ވަނަ މިނެޓުގައި ކާމިޔާބުކޮށްދިނީ ކްރިސްޓިއަން ރޮމޭރޯ އެވެ. މިއީ އެޓީމުގެ މިޑްފިލްޑަރު ޖިއޮވާނީ ލޯ ސެލްސޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.