ޔޫރޯ 2024 ކޮލިފައިންގ ގްރޫޕް ބީގައި އަމިއްލަ ދަނޑުގައި ގްރީސް އާއި ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް ގުރޫޕް ބީގެ އެއްވަނައިގައި ފްރާންސް އިން ހަމަޖެހިލައިފި އެވެ.

މިރޭގެ މެޗަކީ ޔޫރޯ ކޮލިފައިންގ މެޗެއްގައި ފްރާންސް އަމިއްލަ ދަނޑުގައި ބަލިނުވެ ފުރިހަމަކުރި 11 ވަނަ މެޗެވެ. އެންމެ ފަހުން ޔޫރޯ ކޮލިފައިންގ މެޗެއްގައި ފްރާންސް އަމިއްލަ ދަނޑުގައި ބަލިވެފައި ވަނީ 2010 ވަނަ އަހަރު ބެލަރޫސް އަތުން މެވެ.

ފުރާންސްގެ ވެރިރަށް ޕެރިހުގައި ކުޅެވުނު މި މެޗުގެ ފުރަތަަމަ ހާފުގައި ފްރާންސް އިން ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރި ނަމަވެސް ގްރީސް އިން ވަނީ ފްރާންސްގެ އެޓޭކުތައް ހުއްޓުވުމުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކައިފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފު ފެށިގެން ފަސްވަނަ މިނެޓްގައި ގްރީސްގެ ޕެނަލްޓީ އޭރިއާ ތެެރެއިން އެޓީމުގެ ޑިފެންޑަރު ކޮންސްޓަންޓިނޯސް މަވްރޯޕާނޯސް ފްރާންސްގެ ފޯވާޑް ގްރިޒްމަން އަށް ކުރި ނުރައްކާތެރި ފައުލަކާ ގުޅިގެން ރެފްރީ ވަނީ ފުރާންސްއަށް ޕެނަލްޓީއެއް ދީފައެވެ. މި ޕެނަލްޓީ ގޯލުގެ ތެރެއަށް ފޮނުވާލައިގެން ފްރާންސަށް މެޗުގެ ލީޑު ހޯދައިދިނީ ކެޕްޓަން ކިލިއަން އެމްބާޕޭ އެވެ.

ގްރީސް އަށް މި މެޗުގައި އިތުރު މައްސަލަތަކެއް ކުރިމަތިވީ ދެވަނަ ހާފުގެ 69 ވަނަ މިނެޓުގައި އެޓީމުގެ ޑިފެންޑަރު ކޮންސްޓަންޓިނޯސް މަވްރޯޕާނޯސް ކުރި ފައުލަކާއި ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މެޗުގެ ފަހު 20 މިނެޓު އެއްކުޅުތެރިއަކު މަދުކޮށް ކުޅުނު ނަމަވެސް ގްރީސް އިން ވަނީ އެޓީމުގެ ކޮޅަށް އިތުރު ލަނޑެއް ވަނަނުދީ ހިފަހައްޓާފައެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު ކުޅުނު ހަތަރު މެޗުން 12 ޕޮއިންޓް ހަމަކޮށް ގުރޫޕް ބީގެ އެއްވަނައިގައި މިވަގުތު އޮތީ ފްރާންސް އެވެ. އަދި މި މެޗުން ބަލިވި ގްރީސް ކުޅުނު ތިން މެޗުން ލިބުނު 06 ޕޮއިންޓާއެކު މިވަގުތު އޮތީ ގްރޫޕްގެ ދެވަނައިގައެވެ.