މިއަހަރުގެ ސާފްޗެމްޕިއަންޝިޕް ފުޓްބޯޅަ މުބާރާތް މިއަދު ފެށުމަށް ހަމަޖެހިފައިވާއިރު ގްރޫޕް ބީގެ ފުރަތަަމަ މެޗުގައި ބުރާސްފަތި ދުވަހު ދިވެހިރާއްޖޭ ނުކުންނާނީ ބޫޓާން އާއި ދެކޮޅަށެވެ.

ވާދަވެރި މެޗެއްގައި ދިވެހިރާއްޖޭ އެންމެ ފުރަތަަމަ ބޫޓާން އާއި ދެކޮޅަށް ކުޅުނީ 1984 ވަނަ އަހަރު ނޭޕާލުގެ ވެރިރަށް ކަތަމަންޑޫގައި ބޭއްވުނު ސާފް ގޭމްސްގެ ފުޓްބޯޅަ އިވެންޓުގައެވެ. އެމެޗު 1-0 ގެ ނަތީޖާއަކުން ދިވެހިރާއްޖެ ކާމިޔާބުކުރިއިރު، ފާއިތުވެދިޔަ 39 އަހަރުތެރޭގައި މިދެޓީމު ވަނީ 09 ފަހަރެއްގެ މަތިން ވާދަކޮށްފައެވެ.

ބޫޓާނާއި ދެކޮޅަށް ކުޅުނު 09 މެޗުން ވެސް ދިވެހިރާއްޖޭގެ މޮޅުވެފައިވާއިރު، ރާއްޖެއިން ވަނީ މިހާތަނަށް ކުޅުނު މެޗުތަކުގައި ބޫޓާން ކޮޅަށް 33 ލަނޑުޖަގާފައެވެ. އަދި ބޫޓާނަށް ދިވެހި ޓީމު ކޮޅަށް މިހާތަނަށް ކުޅުނު މެޗުތަކުގައި ޖެހިފައިވަނީ ޖުމްލަ 10 ލަނޑެވެ.

އެންމެ ތަފާތުބޮޑު ނަތީޖާއަކުން ދިވެހިރާއްޖެ ބޫޓާން އަތުން މޮޅުވެފައިވަނީ 2018 ވަނަ އަހަރު މާޗު މަހު މާލޭގައި ކުޅެވުނު އޭއެފްސީ އޭޝިއަން ކަޕް ކޮލިފައިންގެ މެޗުގައި 7-0 ގެ ނަތީޖާއަކުންނެވެ. ނަމަވެސް 2013 ވަނަ އަހަރުގެ ސާފްޗެމްޕިއަންޝިޕް ފުޓްބޯޅަ މުބާރާތުގައި މިދެޓީމު ވާދަކުރި މެޗުގައި ރާއްޖެއިން ބޫޓާން ކޮޅަށް 8 ލަނޑު ޖެހިއެވެ. އަލީ އަޝްފާގު 4 ލަނޑު ޖެހި އެ މެޗު ނިމުނީ 8-2 ގެ ނަތީޖާއަކުންނެވެ.

މިއަހަރުގެ މުބާރާތަށް ތައްޔާރުވުމުގެ ގޮތުން ދުރާލައި ބޫޓާނުން ޕްރެކްޓިސް ފަށާފައިވާއިރު މިއަހަރުގެ މެއި މަހު އެޓީމުން ވަނީ އެކުވެރިކަމުގެ ދެ މެޗެއް ކުޅެފައެވެ. ފުރަތަަމަ މެޗުގައި ލާއޯސް އަތުން 2-1 ގެ ނަތީޖާއަކުން އެޓީމު ވަލިވި ނަމަވެސް ދެވަނަ މެޗުގައި އެޓީމުން ވަނީ ނޭޕާލް އާއެކު ކުޅުނު މެޗު 1-1 ގެ ނަތީޖާއަކުން އެއްވަރުކޮށްފައެވެ.

މީގެއިތުރުން މިއަހަރުގެ ސާފްޗެމްޕިއަންޝިޕް ބާއްވާ ގައުމު އިންޑިއާގެ މާހައުލަށް ބޭނުމުގެ ގޮތުން އެޓީމުން ވަނީ ޖޫން 14 ވަނަ ދުވަހުން ފެށިގެން އިންޑިއާގެ ކަލްކަތާގައި ކޭމްޕްކޮއްފައެވެ. އަދި މުބާރާތް ބާއްވާ ބެންގަލޫރަށް އެޓީމު ދިޔައީ އިއްޔެގެ ވަގުތެއްގައެވެ.

ދިވެހިރާއްޖެ އިން ސާފްޗެމްޕިއަންޝިޕް ފުޓްބޯޅަ މުބާރާތަށް ތައްޔާރުވުމުގެ ގޮތުން މަހިބަދޫގެ އާއިއެކު އެކުވެރިކަމުގެ މެޗެއް ކުޅެފައިވާއިރު، ބެންގަލޫރަށް ދިއުމުގެ ކުރިން ޖަޕާނުގައި ދިވެހި ޓީމުން ވަނީ 10 ދުވަހުގެ ޓްރެއިނިންގ ޕްރޮގްރާމެއް ފުރިހަމަކޮށްފައެވެ. 

މީގެއިތުރުން ސާފްޗެމްޕިއަންޝިޕަށް ގައުމީ ސްކޮޑް އެކުލަވާލުމުގެ ކުރިން ދިވެހި ޓީމު ވަނީ ޕާކިސްތާނާއި ދެކޮޅަށް ރާއްޖޭގައި އެކުވެރިކަމުގެ މެޗެއް ކުޅެފައެވެ. އެމެޗު 1-0 ގެ ނަތީޖާއަކުން ދިވެހި ކާމިޔާބުކުރިއިރު، މިއީ 2023 ވަނަ އަހަރު ދިވެހި ޓީމު ކުޅުނު ވާދަވެރިކަމުގެ ހަމައެކަނި މެޗެވެ.

ޕްރެކްޓިސް އަކާއި ނުލައި ޕާކިސްތާނު އަތުން މޮޅުވެފައި އޮތުމުން މާބޮޑު ތައްޔާރީއަކާއި ނުލައި ވެސް ބޫޓާން އަތުން މޮޅުވެވިދާނެކަމަށް ދިވެހިން ގަބޫލުކުރެއެވެ. ނަމަވެސް ހަނދާނަށް އަންނަނީ 2015 ވަނަ އަހަރު ވޯލްޑްކަޕް ކޮލިފައިންގައި ދިވެހިރާއްޖެ 4-0 ގެ ނަތީޖާއަކުން ކުރީގައި ވަނިކޮށް މެޗުގެ ފަހު 5 މިނެޓުތެރޭގައި ބޫޓާނުން ދިވެހިރާއްޖެ ކޮޅަށް ތިން ލަނޑު ކާމިޔާބުކުރި ހަނދާނެވެ.

ހަމަ ޔަގީނުން ވެސް މިއީ އަހަރެންގެ ފަހަރެކޭ ބުނާކަށް ނުކެރޭނެ އެވެ. ނަމަވެސް ހިތަށް އަރަނީ މިއީ ބޫޓާން އަތުން ދިވެހި ޓީމު ބަލިވާ ފަހަރަށް ނުވެދާނެބާއެވެ.