ރައްޔިތުންގެ މަޖިލީހުގައި މަރުތަޅު އެޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުން ރާވައިގެންކަމަށް އިދިކޮޅު ކޯލިޝަނުން ތުހުމަތުކޮށްފި އެވެ. 

މިއަދަކީ އާންމުކޮށް ރައްޔިތުންގެ މަޖިލީހުގެ ޖަލްސާ އޮންނަ ދުވަހެއް ނަމަވެސް، މިއަދަށް ޖަލްސާއެއް އެޖެންޑާ ކޮށްފައެއް ނުވެއެވެ.

ސަރުކާރު ހިންގާ މައި ޕާޓީ އެމްޑީޕީން ގިނަ މެމްބަރުންތަކެއްގެ ސޮޔާއެކު މަޖިލީހުގެ ރައީސް އަދި ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމާއި ގުޅިގެން އެ ދެބޭފުޅުން ވެސް ވަނީ މަޖިލީހުގެ ރިޔާސަތު ބެލެހެއްޓެވުމަށް އުޒުރުވެރިވެފަ އެވެ. 

އިތުބާރު ނެތްކަމުގެ މައްސަލަ ވައްދާފައި އޮއްވާ އެކަން ނުބަލާ އިތުރު މަސައްކަތްތެއް ވެސް ނުކުރެވޭނެތީއާއެކު މަޖިލީހުގައި ވަނީ މަރުތަޅު އެޅުވިފައެވެ. 

އެމްޑީޕީން ބުނަމުންދަނީ، މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހުށައަޅާފައި އޮތްއިރު، އޭގެ ތެރެއިން އެއްވެސް ބޭފުޅެއްގެ މައްސަލަ އަނބުރާ ނުނަންގަވާނެ ކަމަށެވެ. 

އެކަމާއި ގުޅޭގޮތުން އިދިކޮޅު ކޯލިޝަނުން މިއަދު ވަނީ ރައްޔިތުންގެ މަޖިލީސް ގޯތި ތެރޭގައި ހިމޭން އިހުތިޖާޖެއް ވެސް ކޮށްފަ އެވެ. އަދި އެކަމާއި ގުޅޭގޮތުން އިދިކޮޅު ކޯލިޝަންގެ އޮތް ކަންބޮޑުވުންތައް މީޑިއާއާއި ވެސް ހިއްސާކޮށްފަ އެވެ. 

އިދިކޮޅު ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި މަޖިލީހުގެ މައިނޯރިޓީ ލީޑަރު އަހުމަދު ސަލީމު ވިދާޅުވީ މީގެ ކުރިންވެސް މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ އެއް ފަހަރާ މަޖިލީހަށް ހުށައަޅާފައިވާ ކަމަށެވެ. 

އެހެން ނަމަވެސް އެ މައްސަލަތަކަކީ އެއްފަަހަރާ ކުރިއަށް ގެންދެވޭނެ މައްސަލަތަކަށް ނުވާތީ، އެކަމަށް ޙައްލު ހޯއްދަވައިގެން ކުރިއަށް ގެންގޮސްފައިވާކަން ޚުދު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެސް ރަނގަޅަށް އެނގިވަޑައިގަންނަވާނެ ކަމަށެވެ. 

އިދިކޮޅުން ބުނީ ރައްޔިތުންގެ މަޖިލީހުގެ މެޖޯރިޓީ މިއަދު ކޮންޓްރޯލު ކުރައްވަނީ ރައީސުލް ޖުމްހޫރިއްޔާ ކަމަށެވެ.

މަޖިލީހުގެ ރައީސާއި ނައިބު ރައީސްގެ މައްސަލަ އެއްފަހަރާ މަޖިލީހަށް ވެއްދީ ފޯޅަވަހި މައްސަލައިގައި ސަރުކާރުގެ ބައެއް ވަޒީރުން އަމަލުކޮށްފައިވާ ގޮތުގެ ސަބަބުން، އެ ވަޒީރުންގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާ، ރައީސުލްޖުމްހޫރިއްޔާގެ އިތުބާރު ނެތްކަމުގެ މައްސަލަ ވެސް މަޖިލީހަށް ހުށައަޅަމުންދާ ދަނޑިވަޅެއްގައި ކަމަށް ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީއެންސީގެ ޕާލަމެންޓްރީ ގުރޫޕުގެ ލީޑަރު އާދަމް ޝަރީފު އުމަރު ވިދާޅުވި އެވެ.

އެކަން ފާހަގަކުރައްވާ އާދަމް ޝަރީފު ވިދާޅުވީ މަޖިލީހުގައި މަރުތަޅު އެޅުވީ ރާވައިގެން ކަމަށާއި، ބޭނުމަކީ ފޯޅަވަހި މައްސަލައާއި ގުޅިގެން މަޖިލީހަށް ހުށައަޅާފައިވާ ވަޒީރުންގެ އިތުބާރު ނެތްކަމުގެ މައްސަލަތައް ކުރިއަށް ނުގެންދެވޭގޮތަށް މަޖިލީސް ތަޅުއަޅުވާލުން ކަމަށެވެ. 

ޕީއެންސީގެ ޕީޖީ ލީޑަރު އާދަމް ޝަރީފު

އިދިކޮޅު ޕާލަމެންޓްރީ ގުރޫޕުން ވަނީ ރައްޔިތުންގެ އަޑުއަހާ، ޖަވާބުދާރީވުމުގެ ޤާބިލުކަން ސަރުކާރުގެ ނެތް ނަމަ، މަޖިލީހުގައި ތަޅުއަޅުވައިގެން ހުންނެވުމުގެ ބަދަލުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އިސްތިއުފާދެއްވުމަށް ގޮވާލާފަ އެވެ. 

އަދި މިހާރުން މިހާރަށް މަޖިލީހުގައި ކުރަންހުރި މުހިންމު މަސައްކަތްތައް ކުރެވޭނެ ގޮތަށް ކަންކަން ފަހިކޮށްދިނުމަށް ވެސް ސަރުކާރަށް ގޮވާލާފަ އެވެ.