ސްޓެލްކޯއިން ޚިދްމަތް ދިނުމުގައި އެންމެ އިސްކަމެއް ދޭނީ އިޚްލާސްތެރިކަމާއި އެކު ޚިދްމަތް ފޯރުކޮށްދިނުމަށް ކަމަށް އެ ކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ ސްޓެލްކޯއަށް 26 އަހަރު ފުރުން ފާހަގަ ކުރުމަށް ބޭއްވުނު ޖަލްސާގައި ވާހަކަ ދައްކަވަމުންނެވެ.

"ރައްޔިތުންގެ ތެރެއިން ބައެއް މީހުން މިހާރު ވެސް ކުރަމުން އަންނަ ޝަކުވާއެއް ކަރަންޓް ބޭނުން ނުކުރާ ވަރާ ބަލާފައި ބިލު ބޮޑުވާ މައްސަލަ، ސްމާޓް މީޓަރު ލުމުން ޔަގީން ވެގެންދާނެ އެހެން ހުންނަ ކަންކަން، ސްމާޓް މީޓަރު ހަރުކުރުމުން ކޮންމެ ގެއަކަށް ވެސް އެ ގެއިން ބޭނުންކުރި ކަރަންޓްގެ މިންވަރު ބަލައިލެވޭނެ، އަދި، ކޮންމެ މަހެއްގައި ކަރަންޓް ބޭނުންކުރެވޭ ވަރާއި، މަހުން މަހަށް އިތުރުވާ ވަރާއި، އެ ނޫން ވެސް ތަފްސީލީ މައުލޫމާތު ބަލައިލެވޭނެ" ޝަރީފް ވިދާޅުވިއެވެ.

"ސްޓެލްކޯއިން ޚިދުމަތް ދިނުމުގައި އެންމެ އިސްކަމެއް ދޭނީ އިހްލާސްތެރި ކަމާ އެކު ޚިދުމަތް ފޯރުކޮށްދިނުމަށް" ޝަރީފް ވިދާޅުވިއެވެ.

މީގެ އިތުރުން ޝަރީފް ވިދާޅުވީ ސްމާޓް މީޓަރު ހަރުކުރުމުން ވަރަށް ގިނަ ފަސޭހަތަކެއް ލިބިގެންދާނޭ ކަމަށެވެ.

ޝަރީފްގެ ވާހަކައިގައި އިތުރަށް ވިދާޅުވީ ސްޓެލްކޯގެ ތަސައްވުރަކީ އަބަދުވެސް ދިވެހި ރައްޔިތުންނަށް ހިދުމަތް ކުރުން ކަމަށެވެ. އަދި މިކުންފުންޏަކީ ސަރުކާރުން ރައްޔިތުންނަށް ޚިދްމަތްދިނުމަށް އުފައްދަވާފައިވާ ކުންފުންޏެއް ކަމަށެވެ. ސަރުކާރުގެ 100 ޕަސެންޓް ހިއްސާވެ ކަރަންޓުގެ ހިދުމަތް ދިނުމަށް އުފެއްދި ކުންފުނި، މިހާރު އިތުރަށް ފުޅާވެ، ކަރަންޓާއި ފެނާއި ނަރުދަމާގެ ހިދުމަތްވެސް ދޭން ފަށާފައިވާކަން އޭނާ ފާހަގަކުރެއްވި އެވެ.

"ފެނާއި ނަރުދަމާގެ ހިދުމަތަކީ އަޅުގަނޑުމެންނަށް އާ ދެ ޚިދުމަތެއް، އެހެން ނަމަވެސް މިހާރު ފެނާއި ނަރުދަމާގެ ޚިދުމަތްދޭ އެހެން ކުންފުނިތަކާއި އެއްވަރުގެ ހުނަރުވެރި ޤާބިލް މުވައްޒަފުންތަކެއް އަޅުގަނޑުމެންނަށް ސްޓެލްކޯގައި އުފެއްދިފައި އެބަތިބި، މިއީ އަޅުގަނޑުމެން ފަޚުރުވެރިވާ ކަމެއް" ޝަރީފް ވިދާޅުވި އެވެ.

ސްޓެލްކޯގެ މުވައްޒަފުންގެ ކުރިއެރުމާ ގުޅޭ ގޮތުން ވާހަކަދައްކަވަމުން ޝަރީފް ވިދާޅުވީ، މުވައްޒަފުންގެ ކުރިއެރުމާއި އިންސާނީ ވަސީލަތްތައް ތަރައްޤީ ކުރުމަށް އެ ކުންފުނިން ހާއްސަ އިސްކަމެއްދޭ ކަމަށެވެ.

މީގެ އިތުރުން ރޭގެ ޖަލްސާގައި ޝަރީފް ވިދާޅުވެފައިވަނީ ސްޓެލްކޯއަކީ އެ ކުންފުންޏާ ގުޅޭގޮތުން ވާހަކަ ނުދެއްކި މިކުންފުނިން ދޭ ޚިދުމަތުގައި ދެވަނަ އެއް ނެތްކަން ރައްޔިތުންނަށް އެނގެނެ ކަމަށެވެ. އަދި ސްޓެލްކޯއިން ދޭ ޚިދުމަތާއި އެއްވަރު ކުރެވޭނެ ޚިދުމަތެއް ދޭނެ ކުންފުންޏެއް އަދި ވުޖޫދަށް ނާންނަކަމަސް ވެސް އޭނާ ވިދާޅުވި އެވެ.

ރޭ ސްޓެލްކޯގެ އަހަރީ ދުވަސް ފާހަގަކުރުމަށް ބޭއްވުނު ޖަލްސާ ޝަރަފުވެރިކޮށްދެއްވަފައިވަނީ ނައިބު ރައީސް ފައިސަލް ނަސީމެވެ.