ފާރު ތަޅާލައިގެން ދެ އެޕާޓްމަންޓް އެއްކުރި މައްސަލައިގައި، އެއްކޮށްލި ހިޔާގެ ދެ ފްލެޓް އަތުނުލުމަށް އަރބަންކޯއިން ނިންމައިފިއެވެ.

އަރބަންކޯއިން ބުނީ، ހިޔާގެ ދެ ފުލެޓު އެއްކޮށްލުމާއި ގުޅިގެން އެ ކޯޕަރޭޝަންގެ ފަރާތުން ވަނީ އެފަރާތްތައް ޖޫރިމަނާކޮށް، ޔުނިޓުތައް ހަވާލު ކުރި އިރު ހުރިގޮތަށް އަލުން ބަދަލު ކުރުމަށް އަންގާފައި ކަމަށެވެ.

އެކަން ކުރުމަށް ދިން މުއްދަތު އިތުރު ކޮށްދިނުމަށް އެދި ފުލެޓުގެ ވެރިފަރާތުން އަރބަންކޯއަށް ހުށަހަޅާފައިވާތީ، އެ ހުށަހެޅުމުގައި ހިމަނާފައިވާ ސަބަބުތަކަށް ބަލައި، ޔުނިޓްތަކަށް ގެނެސްފައި ބަދަލުތައް ހައްލު ކުރުމަށް އިތުރު ހަތް ދުވަހުގެ ފުރުސަތެއް ދީފައި ވާކަމަށް އަރބަންކޯއިން ބުންޏެވެ.

Advertisement

އަދި ފްލެޓް އެއްކޮށްލި ފަރާތުން މި މުއްދަތުގެ ތެރޭގައި އެ މަސައްކަތް ފަށާފައި ވާތީ، ފުލެޓް އަތުނުލުމަށް މިހާރުނިންމާފައި ވާކަމަށް އަރނބަންކޯއިން ބުންޏެވެ. 

"ނަމަވެސް ކޮށްފައިވާ ޖޫރިމަނާއަށް އެއްވެސް ލުއެއް މިކޯޕަރޭޝަނަކުން ނުދޭނެ. މިކޯޕަރޭޝަނުން މަސައްކަތް ކުރަމުން މިދަނީ މިފަދަ ކަންކަން ތަކުރާރުވެ ނުދިއުމަށް" އަރބަންކޯއިން ބުންޏެވެ.

އެއްބަސްވުމާ ޚިލާފަށް ހިޔާ ޔޫނިއަންގެ ނައިބު ރައީސް އަހުމަދު ޝަމާލު އަދި އާއިލާ މީހާކާއެކު ދެ އެޕާޓްމަންޓް އެއްކޮށްލައިގެން އުޅެނިކޮށް ފަޅާއެރުމުން އާބަންކޯ އިން ވަނީ އެ ދެތަނުގެ ވެރިފަރާތްވެސް 100،000 ރުފިޔާއިން ޖޫރިމަނާކޮށްފައެވެ.

އަދި ތަން ކުރިން ހުރި ގޮތަށް ހަދަން ދިން މުއްދަތު ހަމަވިއިރު ޖޫރިމަނާ ނުދައްކައި، ތަން އަލުން ރާނާފައެއްވެސް ނުވެއެވެ. އެހެންކަމުން މީގެ ކުރިން އަރބަންކޯއިން ނިންމާފައި ވަނީ ތަން އަތުލުމަށެވެ.

ދެ އެޕާޓްމެންޓް އަތުލުމަށް އާބަންކޯ އިން ނިންމި ނިންމުން ހުއްޓުވަން އެ ދެފްލެޓްގެ ވެރިން ސިވިލް ކޯޓަށް ދިއުމުން  އެގޮތަށް އަމުރު ނެރެނުދެވޭނެ ކަމަށް ސިވިލްކޯޓުން ވަނީ ބުނެފައެވެ.

އެފަދައިން ފްލެޓްގެ އިންފާރު އެއްކޮށްކަހަލަ ގޮތަކަށް ތަޅާލައި ގުޅުވާލުމަކީ  25 ބުރީގެ ހިޔާ އިމާރާތައް ވެސް ބޮޑެތި ގެއްލުން ލިބޭނެ ކަމެކެވެ.