ބައިނަލްއަގުވާމީ އެކުވެރިކަމުގެ މެޗެއްގައި ރޭ އެފްރިކާގެ ޗެންޕިއަން ސެނަގާލް އާއި ބްރެޒިލް ވާދަކުރި މެޗު 4-2 ގެ ނަތީޖާއަކުން ސެނަގާލް އިން ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ބްރެޒިލް އިންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ޕަކުއެޓާ އެވެ. މިއީ އެޓީމުގެ ފޯވާޑް ވިނީޝިއަސް ޖޫނިއަރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސެނެގާލް އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 22 ވަނަ މިނެޓުގައި ކާމިޔާބުކޮށްދިނީ ފޯވާޑް ހަބީބް ޑިއާލޯ އެވެ. މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން ވަރަށް ކުރީކޮޅު ސެނަގާލް އިން ފުރަތަަމަ ފަހަރަށް މެޗުގެ ލީޑު ހޯދިއެވެ. މި ލަނޑަކީ ފަހު ހާފުގެ 52 ވަނަ މިނެޓުގައި ބްރެޒިލްގެ ޑިފެންޑަރު މާކީނިހޯސް އަތުން ބައިކޮޅަށް ވަން ލަނޑެކެވެ. އަދި އޭގެ ތިން މިނެޓު ފަހުން ސެނަގާލްގެ ފޯވާޑް މާނޭ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

ބްރެޒިލް އިން މި މެޗުގައި ކާމިޔާބުކުރި ދެވަނަ ލަނޑު ދެވަނަ ހާފުގެ 58 ވަނަ މިނެޓުގައި ކާމިޔާބުކޮށްދިނީ މާކީނިހޯސް އެވެ.

ސެނަގާލް އިން މިމެޗުގައި ކާމިޔާބުކުރި ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ މާނޭ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-2 ގެ ނަތީޖާއަކުން ސެނަގާލް ކުރީގައި އޮވެގެންނެވެ.

ރޭގެ މެޗުން ލިބުނު މޮޅާ އެކު ސެނަގާލް ވެގެން ގޮސްފައިވަނީ ބްރެޒިލް އަތުން މޮޅުވި އެފްރިކާގެ ތިންވަނަ ގައުމަށެވެ. މީގެ ކުރިން ކެމަރޫން އާއި މޮރޮކޯ އިން ވަނީ ބްރެޒިލް މަށްޗަށް ކުރި ހޯދާފައެވެ.