ޔުއެފާ ޔޫރޯ 2024 ކޮލިފައިންގ ގްރޫޕް ޖޭގައި ރޭ ރަށުން ބޭރުގައި އައިސްލެންޑާއި ދެކޮޅަށް ކުޅުނު މެޗުގެ ފަހު މިނެޓްގައި ކްރިސްޓިއާނޯ ރޮނާލްޑޯ ކާމިޔާބުކޮށްދިން ލަނޑާއެކު 1-0 ގެ ނަތީޖާއަކުން މޮޅުވެ ގްރޫޕްގެ އެއްވަނައިގައި ދެ ޕޮއިންޓްގެ ލީޑެއް ޕޯޗުގަލް އިން ނަގައިފި އެވެ.

މިރޭގެ މެޗަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ގައުމީ ޓީމަށް ކުޅުން 200 ވަނަ މެޗެވެ. އަދި މިއީ ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލުން ބަލިވެ ކެޓުމާއިއެކު ކުރީގެ ކޯޗު ފެނާންޑޯ ސަންޓޯސް މަގާމުން ވަކިކޮށް ރޮބާޓޯ މަޓިނޭޒް ޕޯޗުގަލްގެ ކޯޗުކަމާއި ހަވާލުވި ފަހުން އެޓީމު ކުޅުނު ހަތަރު ވަނަ މެޗެވެ.

ޔޫރޯ ކޮލިފައިންގ ގުރޫޕް ޖޭގައި ޕޯޗުގަލް ކުޅުނު ހަތަރު މެޗުން މޮޅުވެފައިވާއިރު، އެޓީމުން ވަނީ މި ހަތަރު މެޗުގައި ބައިކޮޅަށް ލަނޑެއް ވަނަނުދީ 14 ލަނޑު ކާމިޔާބުކޮށްފައެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ އިރު، ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު އައިސްލޭންޑަށް މި މެޗުގައި މައްސަލަ ދިމާވީ ދެވަނަ ހާފުގެ 81 ވަނަ މިނެޓުގައި އެޓީމުގެ މިޑްފިލްޑަރު ވިލަމް ތޯރް ވިލަމްސަން އަށް ދެވަނަ ރީނދޫ ކާޑާއެކު ރަތްކާޑު ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މި މެޗުން ޕޯޗުގަލް މޮޅުވި ލަނޑު ދެވަނަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު ހަތަރު މެޗުން ޕޯޗުގަލްއަށް 12 ޕޮއިންޓް ލިބިފައިވާއިރު ގްރޫޕް ޖޭގެ އެއްވަނައިގައި މިވަގުތު އޮތީ އެޓީމުވެ. ދެވަނަގައި އޮތީ ހަތަރު މެޗުން 10 ޕޮއިންޓާއެކު އޮތް ސްލޮވާކިއާ އެވެ. މިގުރޫޕްގެ ތިންވަނައިގައި ލަގްޒަމްބާގް އޮތީ 07 ޕޮއިންޓާއެކު އެވެ.