އިލެކްޝަންސް ކޮމިޝަންގެ ރައީސް ފުއާދު ތައުފީޤް ބައިވެރިވެލައްވާ ޖަލްސާތަކުގައި ބައިވެރިނުވުމަށް އެކޮމިޝަންގެ ތިން މެމްބަރަކު ނިންމައިފިއެވެ.

ފުއާދު އާއި އެކު ޖަލްސާގައި ބައިވެރިނުވުމަށް ނިންމާފައިވަނީ އެ ކޮމިޝަންގެ މެމްބަރުން ކަމަށްވާ އަލީ ނަޝާތާއި މުހައްމަދު އާސިފާއި ޑރ. މުހައްމަދު ޒާހިރުއެވެ.

އިލެކްޝަންސް ކޮމިޝަނުގައި ތިއްބަވަނީ ފަސް މެމްބަރެކެވެ. އެ ކޮމިޝަނުގެ ޖަލްސާއެއް ބޭއްވެނީ ޖަލްސާގައި ތިން މެމްބަރުން ހަމަވެގެނެވެ.
އެހެން ކަމުން މިތިން މެމްބަރުން ބައިވެރި ނުވާނަމަ އީސީގެ  އެއްވެސް ޖަލްސާއެއް ކުރިއަކަށް ނުގެންދެވޭނެއެވެ. 

Advertisement

މިތިން މެންބަރުން މިފަދައިން ނިންމާފައިވަނީ ދަ ޑިމޮކްރެޓްސް ފޯމުތައް ފްރޮސެސްކޮށް ނިންމައި، އެފާޓީ އުފެއްދުމަށް ހުއްދަ ދިނުމަށް މިއަދު 10:30 އަށް ބައްދަލުވުމެއް ތާވަލްކޮށްފައިވަނިކޮށެވެ. މި ތިން މެންބަރުން ހާޒިރުނުވުމުގެ ސަބަބުން ޖަލްސާ ވަނީ ކުރިއަށް ނުގެންދެވިފައެވެ.

އިލެކްޝަން ކޮމިޝަނުގައި މިއާއެކު "މަރުތަޅު" އެޅިފައިވާއިރު ރައްޔިތުންގެ މަޖިލިސް ވެސް ވަނީ ހުއްޓުމަކަށް އައިސްފައެވެ.