ސަރަހައްދީ އެންމެ ބޮޑު ފުޓްބޯޅަ މުބާރާތް ސާފްޗެމްޕިއަންޝިޕްގެ ކުޅުން މިއަދު ހަވީރު އިންޑިޔާގެ ބެންގަލޫރުގައި ފެށިއިރު، މުބާރާތުގެ ދެވަނަ މެޗުގައި އިންޑިއާ އާއި ޕާކިސްތާން ވާދަކުރި މެޗު 4-0 ގެ ތަފާތުބޮޑު ނަތީޖާއަކުން އިންޑިޔާ އިން ކާމިޔާބުކޮށްފި އެވެ.

މިރޭގެ މެޗަށް ޕާކިސްތާނު ޓީމަށް އިންޑިއާއަށް އެތެރެވެވުނީ ރޭގެ ވަގުތެއްގައެވެ. އަދި ބެންގަލޫރަށް އާދެވުނީ މިއަދު ހެނދުނުގައެވެ. މިސަބަބާހުރެ މެޗު ފަސްކޮށްދިނުމަށް ޕާކިސްތާނުން އެދުނު ނަމަވެސް މުބާރާތް އިންތިޒާމްކުރާ ފަރާތުން ނިންމީ މެޗު ޝެޑިއުލް އާއެއްގޮތަށް ކުޅޭށެވެ. އެހެންކަމުން މިރޭގެ މެޗަށް ޕާކިސްތާނުން ނުކުތީ ދިގު ދަތުރަކަށްފަހު އެއްވެސް ވަރެއްގެ ރެސްޓެއް ނެތިއެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އިންޑިޔާ އިން މެޗު ޑޮމިނޭޓުކުރިއިރު، އެޓީމުން ވަނީ ފުރަތަަމަ ހާފުގެ 10 ވަނަ މިނެޓުގައި ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ކެޕްޓަން ސުނިލް ޗެތުރީ އެވެ. މިއީ ޕާކިސްތާންގެ ކީއްޕަރަށް ހެދުނު ގޯހެއްގެ ފައިދާ ނަގައި އޭނާ ކާމިޔާބުކޮށްދިން ލަނޑެކެވެ.

Advertisement

އިންޑިޔާ އިން މި މެޗުގައި ކާމިޔާބުކުރި ދެވަނަ ލަނޑު ފުރަތަމަ ހާފުގެ 16 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ވެސް ޗެތުރީ އެވެ. މިއީ ޕާކިސްތާންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ. މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އިންޑިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން އިންޑިޔާ އިން މެޗު ޑޮމިނޭޓުކުރިއިރު، މި މެޗުގައި އެޓީމުން ކާމިޔާބުކުރި ތިންވަނަ ލަނޑު ފަހުހާފުގެ 74 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ކެޕްޓަން ސުނިލް ޗެތުރީ ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މިއީ ޕާކިސްތާންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ޗެތުރީއަށް ކުރި ފައުލަކާއި ގުޅިގެން ރެފްރީ އެޓީމަށް ދިން ޕެނަލްޓީއެކެވެ.

މިއީ ސާފު ޗެމްޕިއަންޝިޕް ފުޓުބޯޅަ މުބާރާތުގައި ޗެތުރީ ކާމިޔާބުކުރި 21 ވަނަ ލަނޑެވެ. އަދި މިއީ އިންޑިޔާގެ ގައުމީ ޓީމަށް އޭނާ ކާމިޔާބުކޮށްދިން 90 ވަނަ ލަނޑެވެ.

މި މެޗުގައި އިންޑިއާ އިން ކާމިޔާބުކުރި ހަތަރުވަނަ ލަނޑު ފަހުހާފުގެ 81 ވަނަ މިނެޓުގައި ކާމިޔާބުކޮށްދިނީ ބެންގަލޫރު އެފްސީގެ ފޯވާޑް އުދަންތާ ސިންގް އެވެ. މިއީ އިންޑިޔާގެ ފަހަތުން މަތިމަތިން ކުރިއަށް ކުޅުނު ބޯޅައެއް ޕާކިސްތާނުގެ ޕެނަލްޓީ އޭރިއާ ބޭރުން ކޮންޓްރޯލް ކުރުމަށް ފަހު ބޯޅައާއެކު ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން އިންޑިޔާ ކުރީގައި އޮވެގެންނެވެ.

މިރޭގެ މެޗަށް ޕާކިސްތާނު ޓީމަށް އިންޑިއާއަށް އެތެރެވެވުނީ ރޭގެ ވަގުތެއްގައެވެ. އަދި ބެންގަލޫރަށް އާދެވުނީ މިއަދު ހެނދުނުގައެވެ. މެޗު ފަސްކުރާނެ ވާހަކަތައް ކުރިން ދެއްކި ނަމަވެސް، ސާފުން ނިންމީ މެޗު ކުޅޭށެވެ. އެހެންކަމުން މިރޭގެ މެޗަށް ޕާކިސްތާނުން ނުކުތީ އެއްވެސްވަރެއްގެ ހަމަޖެހިލުމެއް ނެތި، ހަމަ ނިދިވެސް ނެތިއެވެ.