މިއަހަރުގެ ބޮޑު ޢީދު ނުވަތަ އަޟްހާ ޢީދުގެ ޢީދު ނަމާދުވެސް މާލޭގައި ބޮޑު ޖަމާޢަތުގައި ކުރާނެ ކަމަށް އިސްލާމިކް މިނިސްޓެރީއިން ބުނެފިއެވެ.

އެމިނިސްޓްރީ އިން ބުނީމާލެ ސަރަހައްދުގައި ބޮޑު ޖަމާއަތުގެ އިތުރުން 25 މިސްކިތެއްގައި އަޟްހާ އީދު ނަމާދު ކުރާނެ ކަމަށެވެ.

އިސްލާމިކް މިނިސްޓްރީން ބުނީ މާލޭ ސްޓޭޑިއަމާއި، ހުޅުމާލޭ ސިންތަޓިކް ޓްރެކްގެ އިތުރުން ހުޅުމާލެ ދެވަނަ ފިޔަވަހީގެ ކްރިކެޓް ސްޓޭޑިއަމާއި، ވިލިނގިލީގެ ބޯޅަދަނޑުގައި ވެސް ޢީދު ނަމާދު ބޮޑުޖަމާއަތުގައި ކުރާ ގޮތަށް ހަމަޖެހިފައިވާ ކަމަށެވެ.

މީގެ އިތުރުން މާލެ އާއި ހުޅުމާލެ އާއި ވިލިމާލޭ ހިމެނޭހެން އިތުރު 25 މިސްކިތެއްގައި ވެސް ޢީދު ނަމާދު ކުރުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެ އެވެ.

މީގެ ތެރޭގައި ހިމެނެނީ މާލޭގެ 17 މިސްކިތަކާއި، ހުޅުމާލޭ ފުރަތަމަ ފިޔަވަހީގެ ތިން މިސްކިތަކާއި، ދެވަނަ ފިޔަވަހީގެ ދެ މިސްކިތެއްގެ އިތުރުން ހުޅުލޭގެ ދެ މިސްކިތަކާއި، ވިލިމާލޭގެ މިސްކިތެކެވެ.

މިފަހަކަށް އައިސް ރާއްޖޭގައި ޢީދުނަމާދު ކޮށް އުޅެނީ ބޮޑު ޖަމާޢަތް ހަދައިގެނެވެ. މާލެ ސަރަހައްދުގެ އިތުރުން ރަށްރަށުގައިވެސް ޢީދު ނަމާދުގެ ޖަމާޢަތް މިސްކިތް ތަކުން ބޭރުގައި ބޮޑު ޖަމާޢަތް ހަދައިގެން ދަނީ ކުރަމުންނެވެ.

ކަލަންޑަރުގައި ވާގޮތުން މިއަަހަރުގެ އަޟްޙާ ޢީދު ދުވަހަކީ މި ހިނގާ ޖޫން މަހުގެ 28 ވަނަ ދުވަހެވެ.