ޢާންމު ބަލިތައް ފެތުރުން އިތުރުވެފައިވާތީ ޗުއްޓީ އަށް ފުރާއިރި ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.

އެޗްޕީއޭ އިން މިގޮތަށް އިލްތިމާސް ކޮށްފައިވަނީ މިދުވަސްވަރު ޑެންގީ ހުމާއި، އަރިދަފުސް ރޯގާ އަދި ބޭރަށް ހިންގުން އާންމުކޮށް އޫޅޭ މިންވަރަށްވުރެ އިތުރުވެފައި ވުމާއި މި ދުވަސް ވަރަކީ ސްކޫލް ޗުއްޓީ ދުވަސްވަރަށް ވުމުންނެވެ.

އެޗްޕީއޭއިން ނެރުނު ބަޔާނުގައި ބުނެފައިވަނީ، ކުރިއަށް އޮތީ ޢީދު ބަންދާ، ސްކޫލު ޗުެއްޓީކަމުން މި ދުވަސްވަރު ރާއްޖެއިން ބޭރަށާއި، އަތޮޅުތެރެއަށް ދަތުރުކުރުމާއި، ގޭގެއަށް ޒިޔާރަތްކޮށް މީހުން އެއްވެ އުޅޭ ތަންތަނަށް ދިއުން އިތުރުވެގެންދާނެ ކަމަށެވެ.

Advertisement

މިދުވަސްވަރު ޑެންގީ، އަރުދަފުސް ރޯގާ އަދި ބޭރަށް ހިންގުން އާންމުކޮށް އުޅޭ މިންވަރަށް ވުރެ އިތުރުކަމަށް ތަފާސްހިސާބުތަކުން ދައްކާތީ، ގައިން ގަޔަށް އަރާ ބަލިތައް ފެތުރުން ކުޑަކުރުމަށް ބަލިތަކުން ރައްކާތެރިވުމުގެ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސް ކޮށްފައެވެ.

އެގޮތުން ބަލި ޖެހިއްޖެނަމަ ގޭގައި ދެވިދާނެ ބައެއް ފަރުވާގެ ތެރޭގައި އަރާމު ކުރުން ހިމެނެއެވެ. މީގެ ސަބަބުން ބަލި ފަސޭހަވުން އަވަސްވުމާއެކު ބަލި ފެތުރުމުންވެސް ރައްކާތެރިވެއެވެ. މީގެ އިތުރުން ގިނަގިނައިން ދިޔާ އެއްޗެހި ބޭނުންކުރުން ވެސް ހިމެނެއެވެ. އެގޮތުން ފައިދާ ހުރި ދިޔާތަކެތީގެ ތެރޭގައި ކުރުބާފެން، ލޮނުޕެކެޓް އަދި ސޫޕް ފަދަ ތަކެތި ހިމެނެއެވެ. ހުން މަޑުކުރުމާއި ގައިގައި ރިއްސުމަށާއި ހުޅުހުޅުގައި ރިއްސުމަށް ޕެރަސިޓަމޯލް ބޭނުން ކުރެވިދާނެއެވެ.

މީގެ އިތުރުން މި ބަލީގައި މާ ބޮޑުވަރުވާނަމަ ޑޮކްޓަރެއްގެ ލަފާ ހޯދުމަށް އެޗްޕީއޭއިން ވަނީ އިރުޝާދުދީފައެވެ.

ޢާންމު ބަލިތަކަށް ރައްކާތެރިވުމަށް އެޗްޕީއޭ އިން އިރުޝާދު ދީފައިވާއިރު މިދުވަސްވަރަކީ ސްކޫލް ޗުއްޓީގެ އިތުރުން ޢީދު ޗުއްޓީއަށްވެސް އެކިތަންތަނަށް މީހުން ފުރައިގެން ދާ ދުވަސްވަރެވެ.

ޢީދު ބަންދު ކަމުން މީހުން އެއްވެ އެކުވެ އުޅުން ގިނަވާއިރު ބަލިތައް ފެތުރުން އިތުރުވެގެން ދިޔުމަކީވެސް ކޮންމެ އަހަރަކުވެސް ދިމާވާ ކަމެކެވެ.