ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯން ސެމީ ފައިނަލުގެ ފުރަތަަމަ މެޗުގައި މިއަދުގެ ހަވީރު ބަގްލިއޯނީ އާއި ކަނޑިންމަ ވާދަކުރި މެޗު ފަސޭހަކަމާއި އެކު 7-0 ގެ ނަތީޖާއަކުން ކާމިޔާބުކޮށް މުބާރާތުގެ ފައިނަލްގެ ފުރަތަަމަ ޖާގަ ކަނޑިންމަ އިން ހޯދައިފިއެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ބައިވެރި ޓީމުތައް ދެގުރޫޕަކަށް ބަހާލައިގެންނެވެ. އެގޮތުން ގުރޫޕް އޭގައި ހަތަރު ޓީމު އަދި ގުރޫޕް ބީގައި ތިން ޓީމު ހިމެނޭގޮތަށެވެ.

ކަނޑިންމަ މުބާރާތުގެ ސެމީފައިނަލުން ޖާގަހޯދީ ގްރޫޕް އޭގެ އެއްވަނަ ޓީމުގެ ގޮތުގައެވެ. ބަގްލިއޯނީ ސެމީފައިނަލްގެ ޖާގައެއް ހޯދީ ގުރޫޕް ބީގެ ޕްލޭއޮފް މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން ވިލުރީފު ބަލިކުރުމަށްފަހު އެވެ.

Advertisement

މެޗުގެ ފުރަތަަމަ ހާފުގައި ކަނޑިންމަ އިން ތިން ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު ފުރަތަމަ ހާފުގެ 8 ވަނަ މިނެޓުގައި ކާމިޔާބުކޮށްދިނީ އަލީ ޝާމިއުއެވެ. މިއީ ބަގްލިއޯނީގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން ފޮނުވާލި ބާރު ހަމަލާ ގޯލްގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ކަނޑިންމަ އިން މި މެޗުގައި ކާމިޔާބުކުރި ދެވަނަ ލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ ވެސް ޝާމިއުއެވެ. މިއީ ބަގްލިއޯނީގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. 

ފުރަތަަމަ ހާފުގައި ނިމެން ދެ މިނިޓަށްވެފައި ވަނިކޮށް އެޓީމުގެ ތިންވަނަ ލަނޑު ކާމިޔާބުކޮށްދިނީ އަހުމަދު އަހުސަން އެވެ. މިއީ އެޓީމުގެ ކެޕްޓަން މުހައްމަދު އަޔާޒް އަރިމަތިން ހުރަސްކޮށްދިން ބޯޅައެއް ބަގްލިއޯނީގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ކަނޑިންމަ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކަނޑިންމައިން އިތުރުން ހަތަރު ލަނޑު ކާމިޔާބުކުރިއިރު، ފަހު ހާފުގެ 21 ވަނަ މިނެޓުގައި އެޓީމުގެ ހަތަރުވަނަ ލަނޑު ކާމިޔާބުކޮށްދިނީ އަކުރަމް އަހުމަދެވެ. މިއީ އެޓީމުގެ އަހުމަދު އަހުސަން މަތިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ފަސްވަނަ ލަނޑު އޭގެ ހަތަރު މިނެޓު ފަހުން ޝާމިއު ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އަހުސަން އެވެ.

ކަނޑިންމަ އިން މި މެޗުގައި ކާމިޔާބުކުރި ހަވަނަ ލަނޑު ފަހުހާފުގެ 31 ވަނަ މިނެޓުގައި އަލީ ޝާމިއު ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކުރި އިރު، އެޓީމުގެ ފަހު ލަނޑު މެޗު ނިމެން އެއް މިނިޓަށްވެފައި ވަނިކޮށް ކާމިޔާބުކޮށްދިނީ ސުހައިލް އަބްދުއް ސައްތާރު އެވެ. މިއާއެކު މެޗުގެ ކުޅުން ނިމިގެންދިޔައީ 7-0 ގެ ނަތީޖާއަކުން ކަނޑިންމަ ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ކަނޑިންމަ ޓީމުގެ ޖޯޒީ ނަންބަރު 7 އަލީ ޝާމިއުއެވެ.