ޢީދު ދުވަހު އުފާ ކުރުމާއި އުފާ ފައުޅުކުރުމަކީ އިސްލާމްދީން ހުއްދަ ކުރައްވާފައިވާ ކަމެއް ނަމަވެސް، ޢީދު ކުޅިވަރުތައް ކުޅެ އުފާ ފައުޅުކުރަންޖެހޭނީ އިސްލާމީ ހަމަތަކާއި، އަޚްލާގީ އިމުން ބޭރު ނުވާގޮތަށް ކަމަށް މިއަދުގެ ޚުތުބާގައި ބުނެފިއެވެ.

"އަރަފާތު ދުވަހުގެ މާތްކަން" މި މައުޟޫއަށް އަލިއަޅުވާލާފައިވާ މިއަދުގެ ޚުތުބާގައި ބުނީ، ހައްޖުގެ އަޅުކަމަށްފަހު އަންނަ އަޟުހާ ޢީދުގެ އުފާވެރި ދުވަސްތަކަކީ، ކެއިން ބުއިމާއި، ޒީނަތްތެރި ވުމާއި، ކުޅިވަރުކުޅެ އުފާ ފައުޅުކުރުމުގެ ދުވަސްތަކެއް ކަމަށެވެ. އެހެންނަމަވެސް އިސްލާމްދީނުގައި މިއިން ކޮންމެ މުނާސަބަތެއްވެސް ފާހަގަކުރެވެނީ މާތް الله އަށް ކުރެވޭ މަތިވެރި އަޅުކަމަކުން ކަމަށާއި އެއީ ޝުކުރުވެރިކަމާއެކު ކުރެވޭ ނަމާދެއް ކަމަށް ހުތުބާގައި ބުނެފައިވެއެވެ. އެހެންކަމުން ޢީދު ނަމާދުގައި ކުދި، ބޮޑު، އަންހެން އަދި ފިރިހެނުންނާއި އެންމެން ކުރުން ސުންނަތްކަން ގަދަވެގެންވާ ނަމާދެއްކަމަށެވެ.

އަދި މީގެ އިތުރުން، ޢީދުގެ މި ދުވަސްތަކަކީ ގާތްތިމާގެ މީހުންނާއި، ރަހުމަތްތެރިންނަށް ޒިޔާރަތްކޮށް ތަހުނިޔާ ކިޔުމުގެ ދުވަސްތައް ކަމަށާއި، މިއީ އެކަކު އަނެކަކާއި ބައްދަލުކޮށް ހެޔޮ ދުއާކޮށް އުފާވެރިކަމުގެ ޝުޢޫރުތައް ފައުޅުކުރުމުގެ ދުވަސްތައް ކަމަށްވެސް ޚުތުބާގައި ފާހަގަކޮށްފައިވެއެވެ.

މިއާއެކު މިއަދުގެ ޚުތުބާގައި ވަނީ ޢީދު ދުވަހު އުފާ ކުރުމާއި އުފާ ފައުޅުކުރުމަކީ އިސްލާމްދީން ހުއްދަ ކުރައްވާފައިވާ ކަމެއްކަން ފާހަގަކުރައްވައި، ޢީދު ކުޅިވަރުތައް ކުޅެ އުފާ ފައުޅުކުރަންޖެހޭނީ އިސްލާމީ ހަމަތަކާއި، އަޚްލާގީ އިމުން ބޭރު ނުވާގޮތަށްކަން ހަނދާންކޮށްދީފައެވެ. އަދި ހަމައެހެންމެ، ތިމާގެ އަމިއްލަ ނަފްސަށާއި، އެހެން މީހުންނަށްވެސް ގެއްލުމާއި އުނދަގޫ ނުވާގޮތަށް، އާއްމު މަސްލަހަތަށްޓަކައި ހެދިފައިވާ ގާނޫނާއި، ގަވާއިދު ތަކާއިވެސް ޚިލާފްނުވާގޮތަށް ޢީދު އުފާ ފައުޅުކުރުމަށް މިއަދުގެ ޚުތުބާގައި ވަނީ ނަސޭހަތްތެރިވެފައެވެ.

"ރަސޫލާ ﷺ ހަދީޘް ކުރައްވާފައިވާ ބަސްފުޅެއްގެ މާނާގައި ވެއެވެ. "ހަމަކަށަވަރުން މާތް الله ކަންތައްތަކެއް ފަރުޟު ކުރައްވާފައިވެއެވެ. ފަހެ ތިޔަބައިމީހުން އެކަންތައްތަކާއިމެދު އިހުމާލު ނުވާހުށިކަމެވެ. އަދި އެކަލާނގެ އިންތަކެއް ކަނޑައަޅުއްވާފައިވެއެވެ. ފަހެ ތިޔަބައިމީހުން އެ އިންތައް ފަހަނައަޅައި ނުދާ ހުށިކަމެވެ. އަދި އެކަލާނގެ ކަންތައްތަކެއް ހަރާމް ކުރައްވާފައިވެއެވެ. އެ ކަންތައްތަކަށް ތިޔަބައިމީހުން އަރައި ނުގަންނަ ހުށިކަމެވެ. އަދި އެކަލާނގެ ހަނދުމަނެތިވޮޑިގަތުމަކާނުލައި ތިޔަބައިމީހުންނަށް ރަހުމަތެއްގެ ގޮތުން ކަންތައްތަކެއް ބަޔާން ނުކުރައްވައި ދޫކޮށްލާފައިވެެއެވެ. ތިޔަބައިމީހުން އެކަންކަން ހޯދަން ނޫޅޭށެވެ."" ހުތުބާގައި ބުނެފައިވެއެވެ.

މިއަދުގެ ޚުތުބާގައި އިތުރަށް ބުނީ، ޢަރަފާތު ދުވަހަކީ ހައްޖުގެ އެންމެ މުހިއްމު ރުކުން އަދާކުރާ ދުވަސް ކަމަށާއި، ޢަރަފާތު ދުވަހު ހައްޖުވެރިން ޢަރަފާތުގައި ތިބެ الله ގެ ރަޙްމަތާއި ދިންނެވުމަށް އެދި ދުއާކުރާނެ ކަމަށެވެ. އެގޮތުން މިދުވަހު ގިނަގިނައިން ފާފަ ފުއްސެވުން އެދި الله ގެ ހަޞްރަތުގައި ދުއާ ދެންނެވުމަށް އަންގާފައިވާ ކަމަށާއި، ޢަރަފާތު ދުވަހަކީ ދުއާ އިޖާބަކުރައްވާ ދުވަހެއް ކަމަށްވެސް ޚުތުބާގައި ބުނެފައިވެއެވެ.