ޗެލްސީގައި ކާމިޔާބު ދުވަސްތަކެއް ހޭދަކުރުމަށް ފަހު އެކުލަބުގެ ލެޖެންޑް ސެޒާ އަޒްޕިލިކުއޭޓާ އެޓީމު ދޫކޮށް އިޓަލީގެ އިންޓަމިލާން ބަދަލުވުމަށް އެއްބަސްވެފައިވާކަމަށް މީޑިއާ ރިޕޯޓްތައް ބުނެފިއެވެ.

އުމުރުން 33 އަހަރުގެ ޑިފެންޑަރަށް އިންޓަ މިލާނުން ދެ އަހަރު ދުވަހުގެ ކޮންޓްރެކްޓެއް ހުށަހަޅާފައިވާއި މި އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އަދި މިހާރު އިންޓަ މިލާނާއި އެކު ސެޒާ އަޒްޕިލިކުއޭޓާ އަނގަބަހުން އެއްބަސްވުމަކަށް އައިސްފައިވާއިރު، ޗެލްސީ އިން ވެސް ވަނީ އޭނާގެ ކޮންޓްރެކްޓުގައި ބާކީ އެއްއަހަރު އޮއްވައި އިންޓައަށް ދޫކޮށްލުމަށް އެއްބަސްވެފައެވެ.

ޗެލްސީ އިން އެއްބަސްވެފައިވާ ގޮތަށް ސެޒާ އަޒްޕިލިކުއޭޓާގެ އެއްބަސްވުން އުވާލުމާއެކު ކުރިއަށް އޮތް ހަފްތާގެ ތެރޭގައި މިލާނުގައި އޭނާގެ މެޑިކަލް ކުރިއަށް ގެންދިއުމަށް ވަނީ ހަމަޖެހިފައެވެ.

2012 ވަނަ އަހަރު ފްރާންސްގެ މާސޭ އިން 7 މިލިއަން ޕައުންޑްގެ ޓްރާންސްފާ އެއްގައި ޗެލްސީއަށް ބަދަލުވި ސްޕެނިޝް ޑިފެންޑަރު 2022 ވަނަ އަހަރު އެކުލަބުގެ އެއްބަސްވުން އައު ކޮށްފައިވާއިރު، މި އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ.

ޗެލްސީ އާއެކު ގިނަ ކާމިޔާބީތަކެއް ހޯދާފައިވާ ސެޒާ އަޒްޕިލިކުއޭޓާ ވަނީ އެކުލަބުގައި އޭނ ހޭދަކުރި 12 އަހަރުގެ ތެރޭގައި ޗެލްސީއަށް 508 މެޗު ކުޅެދީ 17 ލަނޑު ކާމިޔާބުކޮށްދީފައެވެ. އަދި މީގެ އިތުރުން އޭނާ ވަނީ އެކުލަބާއި އެކު ޔުއެފާ ޗެންޕިއަންސް ލީގާއި، ޔުއެފާ ސުޕަ ކަޕް، ޔުއެފާ ޔޫރޮޕާ ލީގު ދެފަހަރު ޕްރެމިއާ ލީގު ދެ ފަހަރު، އެފްއޭކަޕް، ލީގު ކަޕްގެ އިތުރުން ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.