17 ވަނަ އޭއެފްސީ އޭޝިއަން ކަޕް ފުޓްސަލް މުބާރާތް ގެ ކޮލިފައިންގައި މުބާރާތުގެ އެންމެ ކާމިޔާބު ޓީމު އަދި އެންމެ ފަހުގެ ރަނަރަޕް އިރާނާއި ދިވެހިރާއްޖެ އެއް ގުރޫޕެއްގައި ހިމެނިއްޖެއެވެ.

2024 ވަނަ އަހަރުގެ އޭޝިއަން ކަޕް ފުޓްސަލް މުބާރާތް ބާއްވާނެ ގައުމެއް އަދި ކަނޑައަޅާފައި ނުވާއިރު، މުބާރާތް ބޭއްވުމަށް މޮންގޯލިއާ، އިންޑޮނޭޝިޔާ، އުޒްބެކިސްތާނުގެ އިތުރުން އީރާނުން ވަނީ ފައިނަލް ބިޑް ހުށަހަޅާފައިވެ.

އޭޝިއަން ކަޕް ފުޓްސަލް މުބާރާތުގެ ކޮލިފައިންގައި އޭޝިއާގެ 31 ގައުމަކުން ވާދަކުރާއިރު، ކޮލިފައިންގ މެޗުތައް ކުރިއަށް ގެންދިއުމަށް ހަމަޖެހިފައިވަނީ 8 ގުރޫޕަކަށް ބަހާލައިގެންނެވެ. އޭގެތެރޭގައި 7 ގުރޫޕެއްގައި 4 ޓީމު ހިމެނޭއިރު އަނެއް ގުރޫޕްގައި ހިމެނެނީ ތިން ޓީމެވެ.

Advertisement

ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު މުބާރާތަށް ކޮލިފައިވާއިރު، ރާއްޖޭ ހިމެނުނީ ގުރޫޕް ސީގައެވެ. މިގުރޫޕްގައި ރާއްޖެއާއި އީރާނުގެ އިތުރުން ފެން ހިމެނެނީ ލެބަނަން އަދި ކިރިގިސްތާން އެވެ. އަދި މި މުބާރާތުގައި އެންމެ ރަގަޅު ނަތީޖާއެއް ހޯދާ ފަސް ޓީމަކަށް 2024 ވަނަ އަހަރު އުޒްބެކިސްތާނުގައި އޮންނަ ފީފާ ފުޓްސަލް ވޯލްޑްކަޕުން ފުރުސަތު ލިބިގެން ދާނެއެވެ.

އޭޝިއަން ކަޕް ފުޓްސަލް މުބާރާތް މިހާތަނަށް 16 ފަހަރެއްގެ މަތިން ބާއްވާފައިވާއިރު، މި މުބާރާތް މިހާތަނަށް ކާމިޔާބުކުރެވިފައި ވަނީ އެންމެ ދެ ގައުމަށެވެ. އެއީ އިރާން ގެ އިތުރުން އެންމެ ފަހުގެ ޗެމްޕިއަން ޖަޕާން އެވެ.

އީރާނުން މި މުބާރާތް ޖެހިޖެހިގެން 07 ފަހަރު ކާމިޔާބުކުރިއިރު، ޖުމްލަ 12 ފަހަރަށް ޗެމްޕިއަންކަން ހޯދާފައިވެއެވެ. އަދި މީގެ އިތުރުން މިހާތަނަށް ބޭއްވި އެއްވެސް މުބާރާތެއްގައި ގަދަ ހަތަރެއްގައި އެޓީމު ނުހިމެނި ނުދެއެވެ.

ޖަޕާނުން މި މުބާރާތުގެ ޗެމްޕިއަންކަން 4 ފަހަރަށް ހޯދާފައި ވާއިރު އެންމެ ފަހުން ގަތަރުގައި 2022 ވަނަ އަހަރު ބޭއްވުނު މުބާރާތުގެ ޗެމްޕިއަންކަން އެޓީމުން ހޯދީ ފައިނަލުގައި އީރާން ބަލިކުރުމަށްފަހުގައެވެ.