ތުރުކިޔޭ-ސީރިޔާއަށް ސިލްސިލާކޮށް އައި ބާރުގަދަ ބިންހެލުން ތަކުގައި ގެދޮރު ގެއްލުނު މީހުންނަށް ވަގުތީ ބޯހިޔާ ވަހިކަން ފޯރުކޮށްދިނުމަށް، ދިވެހިންގެ އެހީގައި، ހެދި 30 "ކޮންޓެއިނާ ހައުސް" ގެ މަސައްކަތް ނިންމާލައި، އެ ގެ ތަކަށް މީހުން ވަންނަން ފަށައިފި އެވެ. 

ފެބްރުއަރީ 6 ވަނަ ދުވަހު ތުރްކިޔޭ އާއި ސީރިޔާ އަށް އައި ބިންހެލުންތަކުގައި ނިޔާވި މީހުންގެ ޢަދަދު ވަނީ 50,000 އަށް ވުރަ ގިނައިރު، ބިންހެލުމުގައި ފުރާނަ ސަލާމަތްވި ނަމަވެސް، ބޯހިޔަލެއް، ފެނެއް، ކަރަންޓެއް، ތެލެއް، ކާނެ އެއްޗެއް ނުލިބި ހާލުގައިޖެހުމުގެ ސަބަބުން އެތައް ބަޔަކު މަރުވެދާނެ ކަމުގެ އިންޒާރު ޑަބްލިޔުއެޗްއޯ އިން މީގެ ކުރިން ވަނީ ދީފަ އެވެ. 

އެފަދަ ފަރާތްތަކަށް، ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް ތުރުކިޔޭ ސަރުކާރުން ކުރަމުން އަންނައިރު، ދިވެހިރާއްޖޭގައި ހުންނަށް ތުރުކިޔޭ ކޮންސިއުލޭޓް ގެ އެދުމުގެ މަތިން، އިންޓަނޭޝަނަލް އެއިޑް ކެންޕެއިން، އައިއޭސީން އެކަމުގައި ތުރުކިޔޭ ސަރުކާރަށް ދަނީ އެހީ ފޯރުކޮށްދެމުންނެވެ. 

އެކަމާއި ގުޅޭ އެންމެ ފަހުގެ އަދާހަމަ ދެއްވަމުން، އައިއޭސީގެ އިންޓަނޭޝަނަލް ރިލޭޝަންސް ޑިރެކްޓަރު މުހައްމަދު އަލީ (އަދީން) ވިދާޅުވީ، ތުރުކިޔޭ ރައްޔިތުންނަށް ދާއިމީ ބޯހިޔާވަހިކަން ހަމަޖެހެންދެން، ވަގުތީ ބޯހިޔާވަހިކަން ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން، ދިވެހިންގެ އެހީގައި، 30 ކޮންޓެއިނާ ގެ އެޅުމަށް ސްޕޮންސާ ކޮށްފައިވާ ކަމަށެވެ. އަދި އެ 30 ގޭގެ ތެރެއިން ގިނަ ގެތަކަށް މިހާރު މީހުންވެސް ވަދެފައިވާކަން އަދީން ފާހަގަކުރެއްވިއެވެ. 

މިއާއެކު އަދީން ވިދާޅުވީ، ތުރުކިޔޭގެ އިތުރުން ބިންހެލުމުގައި ގެއްލުންވި ސީރިޔާގެ ރައްޔިތުންނަށް ދާއިމީ ބޯހިޔާވަހިކަން ފޯރުކޮށްދިނުމުގެ މަސައްކަތް ވެސް އައިއޭސީން ފަށައި ކުރިއަށްދާ ކަމަށެވެ. 

ކޮންޓެއިނާ ގެތައް ހުންނަ ސަރަހައްދު--ފޮޓޯ/ އައިއޭސީ

"ސީރިޔާގެ ރައްޔިތުންނަށް ޚާއްސަކޮށް ދާއިމީ ބޯހިޔާވަހިކަން، ތުރުކިޔޭ ގެ މި ކޮންޓެއިނާ ހައުސް ވެސް މިއީ ވަގުތީ ބޯހިޔާވަހިކަން. އެހެން ނަމަވެސް، ދެތިން އަހަރު ރައްޔިތުންނަށް އޭގައި ތިބެވޭނެ. ސީރިޔާގައި، ދާއިމީ ބޯހިޔާވަހިކަމުގެ ގޮތުގައި 40 އެޕާޓްމަންޓް ގެ ބިލްޑިންގ ތަކެއް، ހަތަރު ބިލްޑިންގ އެޅުމުގެ މަސައްކަތް މިހާރު ކުރިއަށްދަނީ. އަދި ބައެއް އެޕާޓްމަންޓްތައް އެއްކޮށް ނިމި، ޢާއިލާތައް ވެސް ވަނީ ވަދެފައި." އަދީން ވިދާޅުވި އެވެ. 

އަދީން އިތުރަށް ވިދާޅުވީ، ކޮންޓެއިނާ ގެތައް ހުރި ވިލެޖަށް އައިއޭސީގެ ޗެއާމަން އަހުމަދު އިގްބާލް އާއި އޭނާ ޒިޔާރަތް ކޮށް، އެ ކޮންޓެއިނަރ ގެތައް މޮނިޓަރ ކޮށްފައިވާ ކަމަށެވެ. އެގޮތުން، ބެލި ބެލުމުން ބައެއް ކޮންޓެއިނާ ގެތަކުގައި ޝަވަރ ކާޓެއިން ނެތް ކަން ފާހަގަކުރެވިފައިވާ ކަމަށް އޭނާ ވިދާޅުވި އެވެ. 

ކޮންޓެއިނާ ގެތައް މޮނީޓަރ ކުރުމުގައި އައިއޭސީގެ ޓީމް--ފޮޓޯ/ އައިއޭސީ 

"އެހެންކަމުން އެ ހިސާބުގެ މޭޔަރ، ރިކުއެސްޓް ކުރީ އެކަމަށް އެހީވުމަށް. އެހެންވީމާ އައިއޭސީން ވަނީ ހުރިހާ ކޮންޓެއިނާ ގެތަކެއްގައި ޝަވަރ ކާޓެއިން ހަރުކުރުމަށް ސްޕޮންސަރ ކޮށްފައި. އެއީ 1000 ޝަވަރ ކާޓެއިން. މިއީ ދިވެހި ރައްޔިތުންގެ އެހީގައި ތުރުކިޔޭ ރައްޔިތުންނަށް ދެވުނު އެހީއެއް." އަދީން ވިދާޅުވި އެވެ.

އަދީން ވިދާޅުވީ، އަދިވެސް ބިންހެލުމާއި ގުޅިގެން ބޯހިޔާވަހިކަން ގެއްލިފައިވާ ފަރާތްތައް ތިބި ކަމަށާ، އެހެންކަމުން، އެފަރާތްތަކަށް ބޯހިޔާވަހިކަން ފޯރުކޮށްދީ، ދިރިއުޅުން އާރާސްތުކުރުމަށް ތުރުކިޔޭ އެމަޖެންސީ ރިލީފް ފަންޑުގެ އެހީގައި މަސައްކަތް ކުރައްވަމުންދާނެ ކަމަށެވެ.