ތަޖުރިބާކާރު މިޑްފިލްޑަރު ސާޖިއޯ ބުސްކެޓްސް، އެމެރިކާ ލީގުގެ އިންޓަ މިއާމީއަށް ބަދަލުވާން އެކުލަބާއިއެކު އެއްބަސްވެފައިވާކަމަށް މީޑިއާ ރިޕޯޓްތައް ބުނެފިއެވެ.

ބާސެލޯނާއިން ސީނިއާ ކެރިއަރު ފެށި ބުސްކެޓްސްއަށް އެކުލަބުގެ ކެޕްޓަން ބޭންޑު ލިބުނީ 2021 ވަނަ އަހަރު އޭރުގެ ކެޕްޓަން ލަޔޮނަލް މެސީ ބާސެލޯނާ ދޫކޮށް ފްރާންސްގެ ޕީއެސްޖީއަށް ބަދަލުވުމާއި އެކު އެވެ. ބުސްކެޓްސް ވަނީ އޭނާ ބާސެލޯނާގައި ހޭދަކުރި 15 އަހަރުތެރޭގައި  އެކުލަބަށް ކުޅެދިން 722 މެޗުގައި 18 ލަނޑު ކާމިޔާބުކޮށްދިނީ، ބާސެލޯނާގެ ޖާޒީގައި 32 ތަށި ކާމިޔާބުކޮށްފައެވެ.

އުމުރުން 34 އަހަރުގެ ބުސްކެޓްސް ބާސެލޯނާ ދޫކޮށްލަން ނިންމީ އެކުލަބުގައި ކާމިޔާބު 15 އަހަރު ހޭދަކުރުމަށްފަހުއެވެ. އަދި ނިމިދިޔަ ސީޒަން ނިމުމާއެކު ބާސެލޯނާ ދޫކޮލުމަށް ނިންމާފައިވާ އެޓީމުގެ ކެޕްޓަން އިންޓަ މިއާމީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ.

Advertisement

އިންޓަ މިއާމީއަށް ބަދަލުވާން އޭނާ ނިންމިއިރު، ސައޫދީ ޕްރޯ ލީގުގެ ކުލަބުތަކުންވެސް ވަނީ އޭނާ ހޯދުމަށް މަސައްކަތްކޮށްފައެވެ. އިންޓަ މިއާމީން ވަނީ އެކުލަބުގެ ޓުވިޓާ އެކައުންޓު މެދުވެރިކޮށް، ބުސްކެޓްސް އެ ކުލަބާއި ގުޅެން އުޅޭކަން އިއުލާންކޮށްފައެވެ. އެ ކުލަބުން އާންމުކޮށްފައިވާ ވީޑިއޯގައިވަނީ؛ މެސީ، ލުކާ މޮޑްރިޗް، ބާސެލޯނާގެ ކޯޗު ޒަވީ ހެނާންޑޭޒް ފަދަ ފުޓްބޯޅައިގެ ލެޖެންޑުން ބުސްކެޓްސްއާއި ގުޅޭގޮތުން ބުނެފައިވާ ވާހަކަތަކެވެ.

އިންގްލެންޑުގެ ކުރީގެ ކެޕްޓަން ޑޭވިޑް ބެކަމްގެ އިންޓަ މިއާމީއަށް ބަދަލުވާން ބުސްކެޓްސް ނިންމި މައިގަނޑު ސަބަބަކީ، ބާސެލޯނާގައި އެކީގައި ގިނަދުވަސްތަކެއް ވަންދެން ކުޅުނު ގާތް ރަހުމަތްތެރިއެއް ކަމަށްވާ ލިއޮނަލް މެސީއާ އެއް ޓީމަކަށް ކުޅުން ކަމަށްވެސް މީޑިއާތަކުން ވަނީ ބުނެފައެވެ.