ޕްރިމިއާ ލީގުގެ ވުލްވްސްއަށް ކުޅެމުން އަންނަ ޕޯޗުގަލްގެ މިޑްފީލްޑަރ ރުބެން ނެވޭސް ސައުދީ ލީގުގެ އަލް ހިލާލް އަށް ވިއްކާލަން އެ ކުލަބުން ނިންމައިފިއެވެ.

މިދިޔަ ސީޒަންގައި ވުލްވްސްގެ ކެޕްޓަންކަން ކުރި އުމުރުން 26، އަހަރުގެ ނެވޭސް އަލް ހިލާލް އަށް ވިއްކާލަން އެ ކުލަބުން ނިންމާފައި ވަނީ ކްލަބުގެ ރެކޯޑް ފީއަކަށެވެ. މީޑީއާ ރިޕޯޓްތައް ބުނެފައިވާ ގޮތުގައި ނެވޭސް އަލް ހިލާލަށް ވިއްކާލަނީ 47 މިލިއަން ޕައުންޑްގެ ޓްރާންސްފާ ފީއަކަށެވެ.

ސައުދީ ލީގުގެ ޓީމްތަކުން އަންނަނީ ޔޫރަޕްގެ ބޮޑެތި ލީގުތަކުގައި ކުޅޭ ކުޅުންތެރިންގެ ސޮއި ހޯދުމުގެ މަސައްކަތް ކުރަމުންނެވެ. މިގޮތުން ރެއާލް މެޑްރިޑްގެ ކަރީމް ބެންޒެމާ އާއި ޗެލްސީގެ އެންގޯލޯ ކާންޓޭ ވަނީ ސައުދީ ލީގުގެ އަލް އިއްތިހާދަށް ބަދަލުވެފައެވެ. ނެވޭސް މިއީ ޔޫރަޕްގެ ބޮޑެތި ލީގުގެ ޓީމްތަކުން ސައުދީ ލީގަށް މި ޓްރާންސްފާ މާކެޓްގައި ބަދަލުވި ތިންވަނަ ކުޅުންތެރިޔާއެވެ. މިވަގުތު ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވެސް ކުޅެމުން އަންނަނީ ސައުދީ ލީގުގައެވެ.

Advertisement

ނެވޭސް ސައުދީ ލީގަށް ބަދަލުވާން ނިންމާފައި މިވަނީ ވުލްވްސްއާއި އެކު ހަދާފައިވާ އެއްބަސް ވުމުގައި ބާކީ އެއް އަހަރު އޮއްވައެވެ. ނެވޭސް ވުލްވްސްއާއި ގުޅުނީ 2017 ވަނަ އަހަރު ޕޯޗުގަލްގެ ޕޯޓޯއިންނެވެ. އޭނާ ވަނީ ވުލްވްސްއަށް 253 މެޗު ކުޅެދީ 30 ލަނޑު ޖަހާފައެވެ.

ނެވޭސް އަލް ހިލާލަށް ބަދަލުވާން ނިންމީ އޭނާގެ ސޮއި ހޯދުމަށް ސްޕެއިންގެ ބާސެލޯނާގެ އިތުރުން ޔޫރަޕުގެ ބޮޑު ބައެއް ކުލަބުތަކުން މަސައްކަތް ކުރަމުން ދަނިކޮށެވެ.