އިލެކްޝަންސް ކޮމިޝަންގެ ވާޖިބު އަދާކުރުމަށް އެ ކޮމިޝަން ނުކުޅެދިފައިވާ ކަމަށާ، އެއީ ކޮމިޝަންގެ ރައީސްގެ އިތުރުން މެންބަރުންނަށްވެސް ހުރި ހުތުރެއް ކަމުގައި، އެ ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރައީސް ނަޝީދަށް ވަފާތެރި އެމްޑީޕީ މެންބަރުން އެ ޕާޓީން ކެނޑި އައު ޕާޓީއެއް އުފެއްދުމަށް އިލެކްޝަންސް ކޮމިޝަނަށް ލައި، 3000 އަށްވުރެ ގިނަ މެންބަރުންގެ ސޮއި ހޯދުމަށްފަހު ރެޖިސްޓާރ ކުރުމަށް، ވެސް ވަނީ ހުށަހަޅާފައެވެ.
އަދި އެ ޕާޓީއަށް ހުއްދަ ދިނުމަށް ފާއިތުވި ހަފްތާގައި ބޭއްވި ޖަލްސާގައި، ހުއްދަ ދިނުމަށް ފާސްނުވީ ދެ މެމްބަރަކު އެކަމަށް ދެކޮޅު ހެއްދެވުމުންކަމަށް ފުއާދު ތައުފީގް ވަނީ ކުރިން ވިދާޅުވެފައެވެ. އަދި އެ ދެ މެމްބަރުންނަކީ އެކޮމިޝަނުގެ މެމްބަރު އަލީ ނަޝާތު އާއި މުހައްމަދު އާސިފް ކަމަށްވެސް ފުއާދު ވިދާޅުވި އެވެ.
ފުއާދު އެފަދައިން ވިދާޅުވުމާއި ގުޅިގެން، ނަޝާތުއާއި އާސިފް ވަނީ، ފުއާދު ރިޔާސަތު ބަލަހައްޓަވާ ޖަލްސާއެއްގައި ކޮމިޝަންގެ ޖަލްސާ ތަކުގައި ބައިވެރިވާން ދެކޮޅު ހައްދަވާފައެވެ.
ކޮމިޝަނުގެ އެއް މެމްބަރު މިވަގުތު ހައްޖުގެ އަޅުކަމުގައި މައްކާގައި ހުންނެވުމުން ކޮމިޝަނުގެ އެ ދެ މެމްބަރުން ޖަލްސާތަކުގައި ބައިވެރިވުމަށް ދެކޮޅު ހައްދެވުމުން ދަ ޑިމޮކްރެޓްސް ރެޖިސްޓްރީ ކުރުމަށް ކުރަންޖެހޭ ކަންކަން ފުރިހަމަވެ އެކަމަށް ދޭންޖެހޭ ހުއްދަ ދިނުމަށް އެޖެންޑާކޮށްފައިވާ ޖަލްސާވެސް ކޯރަމް ހަމަ ނުވެގެން ވަނީ ނުބޭއްވިފައެވެ.
އެކަމާއި ގުޅިގެން "ސީއެންއެމް" ގެ ޕްރޮގްރާމެއްގައި ވާހަކަދައްކަވަމުން ފުއާދު ވަނީ، ޑިމޮކްރެޓްސް ރެޖިސްޓާރ ކުރުމަށް ޗެކް ކުރަންޖެހޭ ހުރިހާ ކަމެއް ޗެކް ކޮށް ނިމިފައިވާ ކަމަށެވެ. އެހެން ނަމަވެސް, ދެ މެންބަރުން ޖަލްސާގައި ބައިވެރިވާން ދެކޮޅު ހައްދަވާތީ ޖަލްސާތައް ނުބޭއްވި، ކޮމިޝަންގެ މަސައްކަތްތައް ހުއްޓުމަކަށް އައިސްފައިވާ ކަމަށް އޭނާ ވިދާޅުވި އެވެ. އަދި އެއީ ކޮމިޝަންގެ ހުރިހާ މެންބަރުންނަށްވެސް ހުރި ހުތުރެއް ކަމަށް ވިދާޅުވި އެވެ.
އާދީއްތަ ދުވަހާއި ހަމައަށް އަޅުގަނޑުމެން ކުރަންވީ ޗެކްތަކެއް އޮތީ ކޮށް ނިމިފައި، އަދި އިތުރަށް އެކަމަކު، އެހެން ބޭފުޅުން ބޭނުންވީ އިތުރު ޗެކެއް ކުރަން. އެ ޗެކުވެސް ކޮށް މިހާރު މިވަނީ ނިމިފައި. އެކަމަކުވެސް މި ޖަލްސާ އަށް ބައެއް ބޭފުޅުން ވަޑައިނުގަތުމުގެ ސަބަބުން މިވަނީ، މިދިޔަ ބުދަ ދުވަހުވެސް ޖަލްސާ ނުބޭއްވިފައި، އެ ޕާޓީއަށް ހުއްދަ ނުދެވިފައި. އެހެންވީމާ އަޅުގަނޑު ދެކޭ ގޮތުގައި އެއީ އަޅުގަނޑުމެންގެ ވަރަށް ބޮޑު ވެއްޓުމެއް. އިލެކްޝަންސް ކޮމިޝަންގެ ވާޖިބު އަދާކުރުމަށް އަޅުގަނޑުމެން މިވަނީ ނުކުޅެދިފައި. އެއީ އަޅުގަނޑަށްވެސް ލިބޭ ހުތުރެއް. އަނެއްކާ ކޮމިޝަންގެ ކޮންމެ މެންބަރަކަށް ވެސް ލިބޭ ހުތުރެއް.
އިލެކްޝަންސް ކޮމިޝަންގެ ރައީސް ފުއާދު ތައުފީގު
އީސީގެ ޖަލްސާތަކުގައި ބައިވެރިވެވަޑައިގެންނެވުމަށް އެކޮމިޝަނުގެ ބައެއް މެމްބަރުން ދެކޮޅު ހައްދަވާތީ އެ ކޮމިޝަން މިހާރު ވަނީ "މަރުތަޅު" އެޅުވިފައެވެ. އެކަމާއި ގުޅިގެން ދަ ޑިމޮކްރެޓްސް މެންބަރުން އަންނަނީ ނުރުހުން ފާޅުކުރަމުންނެވެ. އަދި އީސީގެ ދެ މެމްބަރުން ކަމަށްވާ އާސިފާއި ނަޝާތު މަސައްކަތް ކުރައްވަނީ ސަރުކާރާއި ގުޅިގެން ދަ ޑިމޮކްރެޓްސް ރެޖިސްޓްރީވިޔަ ނުދިނުމަށްކަމަށްވެސް ޑިމޮކްރެޓްސްއިން ތުހުމަތު ކުރެއެވެ.
Advertisement
This content is created and paid for by advertisers and does not involve Voice Journalists
