ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމްގެ ވެރިކަމުގައި މަޖިލީހަށް ނުފޫޒު ފޯރުއްވީ ގަދަ ބާރުން ކަމަށާ، އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެކަން ކުރައްވަމުން ގެންދަވަނީ މަޑުން ހުންނަވައިގެން ކަމަށް، މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުالله ވިދާޅުވެއްޖެ އެވެ.
ސަންގު ޓީވީން ގެނެސްދިން އިލްމީ ބަހުސް ޕްރޮގްރާމް ގައި، "ޑިމޮކްރަސީ- ރާއްޖެއަށް ހެޔޮވަރު ނުކުރެވުނު ލިބާހެއް؟" މައުލޫއަށް ބަހުސް ކުރައްވަމުން އީވާ ވިދާޅުވީ، ދިވެހިރާއްޖެއަށް ޑިމޮކްރަސީ ގެނައީ މިހާރު އަމަލު ކުރަމުންދާ ގާނޫނު އަސާސީން ކަމަށެވެ. އަދި އެ ގާނޫނު ތަސްދީގު ކުރެވުނު ފަހުން ހަތަރު ވެރިކަން ފެނިގެން ގޮސްފައިވާ ކަމަށެވެ. އަދި އެ ހަތަރު ވެރިންވެސް ޑިމޮކްރަސީ މާނަކުރައްވަމުން ދިޔައީ ވަރަށް ތަފާތު ގޮތަކަށް ކަން އީވާ ފާހަގަކުރެއްވި އެވެ.
މިއާއެކު އީވާ ވިދާޅުވީ، ގާނޫނު އަސާސީ ތަސްދީގު ކުރެވުނު ފަހުން ތިން ދައުރެއްގައި، އެކިއެކި ރޯލުގައި މަޖިލީހުގެ މެންބަރުކަން އޭނާ އަދާކުރައްވާފައިވާނެ ކަމަށެވެ. އެގޮތުން، ސަރުކާރު ހިންގާ ޕާޓީގެ މައިނޯރިޓީ ގެ މެންބަރު ކަމާއި، ސަރުކާރުގެ ސުޕާމެޖޯރިޓީ އޮތް މަޖިލީހެއްގައި އިދިކޮޅު މެންބަރެއްގެ ގޮތުގަޔާއި، އަދި ސަރުކާރު ހިންގާ ޕާޓީގެ ސުޕަރ މެޖޯރިޓީ މެންބަރެއްގެ ގޮތުގައި ވެސް މަޖިލީހުގައި މަސައްކަތް ކުރެއްވިކަން އޭނާ ފާހަގަކުރެއްވިއެވެ.
އީވާ ވިދާޅުވީ، ޑިމޮކްރަސީ އަކީ، ރައްޔިތުންގެ އަތަށް ވޯޓު ކަރުދާސް ކޮޅެއް ދީފައި، ވޯޓުލުމުގެ ހައްގު ދިނުން އެކަނި ނޫން ކަމަށާ، އޭގ އިތުރުންވެސް ވަށައިގެންވާ ގިނަ ކަންކަން އޭގެ ތެރޭގައި ހިމެނޭ ކަމަށެވެ.
އޭގެ މިސާލެއްގެ ގޮތުން އީވާ ނެންގެވީ މަޖިލީހުގެ ބާރުތަކާއި ސަރުކާރުގެ ނުފޫޒުން މަޖިލީސް އެއްކިބާ ކުރުމެވެ. އެގޮތުން، ސަރުކާރުގެ ނުފޫޒު މަޖިލީހަށް ނުފޯރުވުމަކީ ޑިމޮކްރަސީގައި ހިމެނޭ ކަމެއް ނަމަވެސް އެކަން އެގޮތަށް ވާތަން ނުފެންނަ ކަމަށް އޭނާ ވިދާޅުވި އެވެ.
ދެން މިހާރު، މަޖިލީހުގައި ރައީސުލްޖުމްހޫރިއްޔާ އައްޔަންކުރާ މެންބަރުންނެއް ނުތިބޭ. އެކަމަކު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިހަކަށް ދުވަހުވެސް ވިދާޅުވެއްޖެ، ތިމަންނަގެ ފުރިހަމަ ކޮންޓްރޯލް މަޖިލީހުގައި އޮވެއޭ. ދެން އަދު ރައްޔިތުންގެ މަޖިލީސް މިހާރު މަސައްކަތް ކުރާ ގޮތުންވެސް އަޅުގަނޑުމެންނަށް އެނގޭ، ސަރުކާރުގެ، އެމްޑީޕީގެ ފުލް މެޖޯރިޓީއެއް އޮތީމަކަން އަޅުގަނޑުމެންނަށް އެބަ އެނގޭ، މަޖިލީހުގެ އެންމެ ބޮޑު އެއް ބާރު، ސަރުކާރު ޖަވާބުދާރީ ކުރުވުން، ޗެކްސް އެންޑް ބެލެންސް، އެއް ގޮތަކަށްވެސް ހިނގާ ތަނެއް އަޅުގަނޑަކަަށް ނުފެނޭ.
ގަލޮޅު އުތުރު ދާއިރާގެ މެންބަރު އީވާ އަބްދުالله
އެގޮތުން އީވާ ވަނީ މަޖިލީހުގެ ސަރުކާރު ޖަވާބުދާރީ ކުރުވާ ކޮމިޓީން މިވީ 4 އަހަރު ތެރޭގައި ސަރުކާރު ޖަވާބުދާރީ ކުރުވި ތޯ ސުވާލު ކުރައްވާފައެވެ. އަދި މިނިވަން މުއައްސަސާތަކާ ބެހޭ ކޮމިޓީން، އެފަދަ މުވައްސަސާތަކަށް ނުފޫޒް ފޯރުވާތޯ ނުވަތަ ނޫންތޯވެސް ސުވާލު ކުރައްވާފައެވެ.
އެހެންކަމުން، ތިންބާރު ވަކިވެގެން، ވެރިކަން ހިންގާތަން މިހާތަނަށް ފެނިފައި ނުވާ ކަމަށްވެސް އީވާ ވިދާޅުވި އެވެ. އޭގެ ބަދަލުގައި އެމްޑީޕީގެ މެޖޯރިޓީ މަޖިލީހުގައި އޮތުމުން 'ފެންނަމުންދަނީ ފުލް އެބިޔުސް' ކަމަށްވެސް އީވާ ވިދާޅުވި އެވެ.
މިއާއެކު އީވާ ވަނީ، ބާރުގެ ބޭނުން ކުރުމުގައި ކުރީގެ ރައީސް ޔާމީން އަބްދުލްގައްޔޫމް އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުވެސް ތަފާތު ކަން ފާހަގަކުރައްވައި އެ ދެބޭފުޅުން މަޖިލީހަށް ނުފޫޒް ފޯރުވި ގޮތް ކިޔައި ދެއްވާފައެވެ.
ނުފޫޒާއި، ބާރާއި ޚުދުމުޚުތާރުކަން ދައްކާނެ ތަފާތު ގޮތްތައް ހުރޭ. ރައީސް ޔާމީންގެ 5 އަހަރުގައި ވަރަށް ގަދަ ބާރުން ފެނުނު. ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ފެންނަނީ ކިތަންމެ މަޑުމައިތިރި ކަމާއި އެކީގައި ވިޔަސް، ކިތަންމެ ކެތްތެރި ކަމާއި އެކީގައި ވިޔަސް، ހަމަ އެ ޚުދު މުޚުތާރު ކަމެއް އަޅުގަނޑުމެންނަށް މި ފެންނަނީ ނަތީޖާއެއްގެ ގޮތުން.
ގަލޮޅު އުތުރު ދާއިރާގެ މެންބަރު އީވާ އަބްދުالله
އެހެންކަމުން އީވާ ވިދާޅުވީ، ރައްޔިތުންގެ މަޖިލިސް ވަކި ބާރެއްގެ ގޮތުގައި ހިނގަމުންދާތަން މި ވެރިކަމުގައިވެސް ނުފެންނަ ކަމަށެވެ.
Advertisement
This content is created and paid for by advertisers and does not involve Voice Journalists
